Talvez quiquinba huahuaca uchillagumandapachami shuj gentecunata na ricunayachishpa trataj gentecunapa ladopi viñashca capanga. Chaimi paicunapash shujcunata shinallata tratangapaj munanga. ¿Imashinata ñucanchi huahuacunataca ama shujcunata na ricunayachishpa tratachunga ayudaita ushapanchi? Quiquinba churita na ricunayachishpa tratajpica quiquinga ¿imashinata ayudaita ushapangui?

Cai temapica caicunatami yachajupashun:

•  Quiquinba huahuacunamanga shuj shuj razamanda gentegucuna tiashcatami parlaita ushapangui

•  Quiquinba huahuacunamanga racismo ima cashcata intindichipai

•  Shuj gentecunata juyaihuan tratashpami quiquinba ejemplohuan ayudaita ushapangui

•  Talvez quiquinba huahuacunata shujcuna nali tratajpica ¿imatata rurai ushapangui?

 Caimandaca ¿imatata yachachita ushapangui? Mundo enteropi gentecunaca shuj shuj costumbrecunatami charin. Shuj shuj llactamanda cashcataca paicunapa ñavipillatami ricuita ushanchi. Chaimandami huaquingunaca paicuna imata rurajta ricushpa, imashna cajta ricushpa maltratan.

 Shinapash Bibliapica tucuicuna Adanmanda Evamanda miraicuna cashcatami yachachin. Chaimandami tucuicunallata igual canchi.

 Karen huarmiguca cashnami nin: “Ñucanchi huahuacunaca shuj shuj gentegucunahuan ashtahuan amigashpaca paicunallatami tucuicunata juyaihuan, restepohuan tratana cashcata cuenta japirca”.

 Quiquinba huahuacunaca shuj gentecuna shujcunata paicunapa razamandalla nali tratajtaca imaurapash yachaj chayangami. Chai pasajpica quiquinba huahuacuna imashna huatata charijta ricushpami chai situacionmanda parlaita o intindichita ushapangui.

•   Escuelapi caj huahuacunaman. Allison Briscoe-Smith especialista huarmiguca revista Parents nishcapica cashnami nin: “Uchilla huahuacunaca shujcunata ali o nali tratajtaca jaicatami cuentan urman. Shina pasajpimi imamanda shujcuna nali tratajta quiquinba huahuacunaman parlaita ushapangui”.

•   Joven tucujucunapaj. Entre 6 y 12 huatacunacaman charij huahuacunaca tucuita yachangapaj munashpami difícil tapuicunata ruran. Ushashpaca chai tapuicunata aligutami contestana capangui. Quiquinba huahuacunaca escuelapi o telepi shuj gentecuna shujcunata nali tratajtami ricunga. Chaimi shujcunata ñavita ricushpalla nali tratana na ali cashcata parlaita ushapangui.

•   Jovengunapa. Jovengunaca ashtahuan huatacunata charimandami difícil temacunatapash ña intindita ushan. Quiquinba churi ña joven cashcamandami paihuanga yura gentegucunata yana gentegucunata imamanda shujcuna na ricunayachij temamanda parlaita ushapangui.

 Tanya huarmiguca cashnami nin: “Ñucanchi huahuacunamanga maiman rishpapash maipi cashpapash tucuicunata igual tratana cashcatami yachachipanchi. Cai temamanda huasipillata na parlajpica shujcuna imashna ruranshnallatami paicunapash ruranga. Cai temacunamandaca informaciondaca shujcunaca cierto cashcatashnami ñucanchi huahuacunamanga yachachita ushan”.

 Huahuacunaca taitamamacuna imata rurajtami yachajun, chaimandami taitamamacunaca imata ruragrijushpa o imata nigrijushpapash aliguta pensarishpa nina capanchi. Por ejemplo, cashna tapuripai:

•   ¿Shuj gentecunamandaca nali chistecunatachu rurani o paicunata na ricunayachimandallachu imatapash nalicunata nini? nishpa tapuripai. American Academy of Child and Adolescent Psychiatry (Academia Estadounidense de Psiquiatría Infantil y Adolecente) nishcaca taitamamacunamanga cashnami nin: “Quiquinba huahuacunaca quiquin imata rurajta, imata nijtaca alimi uyanajun chaimandami paicunapash quiquinshnallata imatapash ruran”.

•   “¿Shuj llactamanda gentecunahuan amiganata gushtanichu?” Pediatra Alanna Nzoma huarmiguca cashnami nin: “Quiquinba huahuacuna shuj llactamanda gentegucunahuan amigachun munashpaca quiquinrami chaita rurana capangui”.

 Katarina huarmiguca cashnami nin: “Ñucanchica shuj shuj llactamanda gentegucunatami huasiman invitanchi. Shina invitashpami paicuna imata micujta, ima musicacunata uyajta yachajupashcanchi shinallata paicunapa ropatapashmi churajushcanchi. Ñucanchi huahuacunaman, ñucanchi costumbrecunamanda jariyashpa parlangapaj randica tucuicunallata igual cashcatami parlapanchi”.

 Tucuicuna igual canchi nishpa parlashpapash cada punllami shuj gentecunata na ricunayachishpa tratajta ricupanchi. Chaimandami quiquinba huahuatapash shujcuna nali trataita ushan. Ashtahuangarin shuj llactamanda shamushca cajta ricushpami nali trataita ushan. Cashna pasajpica ¿imatata ruraita ushapangui?

 Imamanda quiquinba huahuata maltratashcata aliguta yachapai. Ñuca huahuataca ¿llaquichina munaihuanllu imatapash nishca? O ¿imatapash nina cashcamandallachu nishca? (Santiago 3:2). ¿Cashna pasashcamandaca paihuan parlanaca minishtirinllu? O ¿imatapash na rurashpallachu saquina cani?

 Bibliapica cai consejotami cun: “Ama ñapash fiñaringuichu” (Eclesiastés 7:9). Shujcunata paicunapa razamanda maltratanaca nalipachami can. Imapash nalica na canllu nishpa quedana nalimi can. Pero huaquingunaca na maltratana yuyaihuanga imatapash ninllu.

 Shinapash cada situacionmi diferente can. Chaimandami nara imatapash rurashpallata aliguta yachana capangui.

 Tucuita aliguta yachashca jipaca cashna tapuripai:

•   “¿Tucui gentecuna nali tratajta pensanaca ñucanchi churipaca alichu can? ¿Paipa razamandalla maltratai tucujushcata pensanaca alichu can?”

•   “Ima parlotapash, ama tucui shungu uyanayachinguichu” nishca consejoca imashinata ñuca churitaca ayudaita ushan (Eclesiastés 7:21).

 ¿Llaquichina munaihuan llaquichishca cajpica? Pipash llaquichijpica quiquinba churimanga na chashnallata llaquichina cashcatami yachachina capangui. Huaquinbica imata rurajta ricungapallami shujcunamanda burlarin chaimi imata ninajujpipash na cazuna canchi.

 Na problema tiana cajpica llaquichishca personahuanmi quiquinba churiguca parlaita ushan. Quiquinba churiguca na colerashpami cashna nita ushan: “Quiquinba nishcaca nalimi sintichihuarca”.

 ¿Ima pasashcataca autoridadcunaman denuncianachu capangui? Quiquinba churi peligropi cajpica escuelapi profesorcunaman, na cashpaca policiamanmi villaita ushapangui.