¿Imata yuyangui?

•   ¿Horóscopo nishcata liina, adivinocuna ima nijta uyanaca alichu can?

•   Ayacunapa, demoniocunapa ruraicunamanda imapash parlashcacunaca ¿yanga parlashcallachu can? o ¿ayacunapa ruraicunaca ciertopachachu tian?

 Caipica imamanda ashtaca gentecuna ayacunapa o demoniocunapa ruraicunahuan chapurishca ruraicunata alicachijta, imamanda chaicunapi cuidadota charinatami ricupashun.

•  ¿Imashpata ashtaca gentecunaca ayacunapa ruraicunataca ninanda alicachin?

•  Chai ruraicunamandaca ¿imamandata cuidarina capangui?

•  Caita rurapai

•  Jovengunaca ¿imatata nin?

 Cunanbica televisionbi, peliculacunapi, videojuego nishcacunapi, librocunapipashmi ayacunapa o demoniocunapa ruraicunahuan chapurishca ruraicunaca ninanda mirashca. Chaimandami ashtaca jovengunaca astrología nishcacunamanda, demoniocunamanda, vampirocunamanda, imapash shuj shuj ruraicunataca ninanda alicachin. ¿Imamandata ashtaca gentecunaca ninanda alicachin?

•   Paicunaca ciertopacha ayacuna, angelcuna o huañushcacuna maipipash causashpa catijta yachangapaj munaimandami chai ruraicunapica chapurin.

•   Jipa punllacunapi ima pasanata preocuparimandami chai ruraicunataca ruran.

•   Huañushca gentecunahuan parlangapaj munaimanda.

 Jipa punllacunapi ima pasanamanda preocuparina, huañushca familiacunata o amigocunata llaquinaca normalmi can. Shinapash chaicunamanda ayacunapa o demoniocunapa ruraicunapi chapurinami nalipacha can.

 Ayacunapa o demoniocunapa ruraicunapi chapurinamanda Bibliapi imata nijta ricupai:

 “Canguna purapica [...] yachaj cangapaj, brujo cangapaj, jipa punlla ima tucunata yachaj cangapaj, yumbu cangapaj yachajuj runapash na tianachu. Yumbu canata, yachaj canata, ayacunata mañaj canata, huañushcacunata tapuj canata yachajuj runapash na tianachu. Imatapash chashna nalicunata ruranaca, Mandaj Diospaj ñaupajpica millanayaimi” (Deuteronomio 18:10-12).

 Bibliapica ¿imamandata ayacunapa o demoniocunapa ruraicunataca napacha alichu nin?

•   Ayacunaca shuj shuj ruraicunahuanmi umachin. Chaicunapi chapurishpaca ayacunapa ladomi tucunajunchiman. Bibliapica huaquin angelcuna Jehová Diosta na cazushpa, paipa contra tucushcatami parlan (Génesis 6:2; Judas 6). Chai nali angelcunaca gentecunata umachingapaca astrologocunata, brujocunatami utilizan. Paicunaca huañushcacunahuan parlanchi, jipa punllacunapi ima pasanatapash yachanchi ninmi. Chai ruraicunapi chapurishpaca ayacunapa lado tucushpami Jehová Diospa contra tucunchiman.

•   Ayacunaca, gentecunapash jipa punllacunapi ima pasanata yachai ushanmi nishpami crichin. Shinapash Jehová Diosllami jipa punllacunapi ima pasanataca yachai ushan. Chaimandami Jehová Diosca “Jipa punllacuna ima tucunatapash, ñucami callarimandapacha villani. Nara imapash tiajpillatami, pundamandapacha villarcani” nin (Isaías 46:10; Santiago 4:13, 14).

•   Ayacunaca, huañushcacunahuan parlai ushanchimi nishpami crichin. Shinapash Bibliapica “huañushcacunaca, imatapash na yachanllu [...]. Can rina Seolpica, imata ruranapash, imata yarijunapash, imata yachajunapash, ali yachaipash na tianllu” ninmi (Eclesiastés 9:5, 10).

 Chaimandami testigo de Jehovacunaca ayacunapa, demoniocunapa o espiritismo ruraicunapica na chapurin. Shinallata vampirocunamanda, zombis nishcacunamanda o shuj nali cosascunamanda ricuchijuj peliculacunata, musicacunata o videojuegocunatapash na ricunllu. Caimanda parlashpami María huarmiguca cashna nin: “ayacunapa o demoniocunapa ruraicunahuan imapash chapurishca cajpica mejor na ricunami ali can” nishpa. a

•   Ayacunapa o demoniocunapa tucui ruraicunamanda caruyashpaca Jehová Diospa ñaupapica alimi ricuripangui (Hechos 24:16).

•   Ayacunapa o demoniocunapa ruraicunahuan chapurishca cosascunata charishpaca shitanami capangui. Hechos 19:19, 20​ta liishpa, Jesusta punda catijcuna imata rurashcata ricupai.

 Caita yaripai: Imata liinata, imata ricunata, imata pugllanata agllagrijushpaca ayacunapa o demoniocunapa ruraicunahuan na chapurishpami Jehová Diospa lado cashcata ricuchipangui. Shina rurashpami Jehová Diostaca ninanda cushichipangui (Proverbios 27:11).