Maimanbash rishca cashpa, ali yalijujta canba tucui amigocuna yachachun munashpaca ¿imatata ruranguiman?

1.   ¿Shuj cartata escribishpachu cachanguiman?

2.   ¿Computadorapi shuj correota escribishpachu cachanguiman?

3.   ¿Internetpichu fotocunata churanguiman?

 Canba taitamamacunapa tiempopi cashpaca, primer yuyaitami agllanguiman.

 Huaquin huatacuna huashapi causajushpaca cati yuyaitami agllanguiman.

 Shinapash cunanbi ashtaca jovenguna Internetpi fotocunata churanata yachaimandami último yuyaita agllanguiman. Fotocunata internetpi churanata gushtashpaca, huaquin trampacunapi ama urmachunmi caipica yachajungui.

•  Fotocunata Internetpi churanaca ¿imamandata huaquinbica ali caita ushan?

•  Fotocunata Internetpi churanaca ¿imamandata huaquinbica nali caita ushan?

•  Caitami rurai ushangui

•  Jovengunaca ¿imatata nin?

 Uchalla villangapami ali. “Juyailla pushtucunata rijsijushpa, amigocunahuan cushilla yalijujta shujcunaman ñapash villangapami ali” (Melanie).

 Ashtahuan fácil can. “Ñuca amigocuna imashna cajta yachangapaca computadorapi cartata escribishpa tapunapa randica paicuna internetpi churashca fotocunata ricunami ashtahuan fácil can” (Jordan).

 Rijsishcacunamanda yachangapami ali. “Ñucapa huaquin amigocuna, familiacunapash carupimi causan. Chaimi paicuna internetpi churashca fotocunata ricushpaca paicunahuan tucui punllacuna cajtashnami sintini” (Karen).

 Canba causaitaca llaquipimi churanguiman. Huaquin camaracunapica maijan pushtucunapi fotocunata llujchishcapash llujshinllami. Chai fotocunata internetpi churashpaca canba causaitami llaquipi churanguiman. Internetpi Digital Trends nishca paginapica cashnami nirca: “Can maipi cashcata ricuchij fotocunata o videocunata Internetpi churajpica, nali gentecuna computadorata utilizashpa quiquin maipi cashcata yachashpami llaquichita ushan” nishpa.

 Shinaca quiquin imahora huasipi illajtami shuhuacunaca yachangapaj munan. Shinallata Internetpi Digital Trends nishca paginapica, quimsa shuhuacuna 18 huasicunaman pipash illajpi yaicushcatami escribirca. Huasi dueñocuna illajtaca ¿imashinata yacharca? Huasi dueñocunapa fotocunata, shuj cosascunatapash Internetpi churashcata ricushpami pipash illajta yachaj chayarca. Shuhuacunaca 100.000 dólar valijtashnami shuhuarca nircami.

 Imapash pinganai cosascunami ricurinman. Huaquingunaca tucuicuna ricuchun munashpami imapash pinganayai fotocunata churanlla. Sara shuti jovenga cashnami nin: “Na yapa rijsishca gentecunapa fotocunata o shuj cosascunatapash ricunaca na alichu. Chaica na rijsishca llactapi cashpa, shuj mapa nishcata na ricushpa purij cuendami canman. Shuj mapa nishcata na charishpaca, na munashca pushtumanmi chayanguiman” nishpa.

 Ashtaca tiempotami perdinguiman. Yolanda shuti jovenga ninmi: “Shujcunapa fotocunata o shuj cosascunata Internetpi ricushpalla yalinaca facilmi can. Huaquingunaca internetpi shujcuna churashca fotocunata ricungapallami cutin cutin celularta ricunajun” nishpa.

 Samantha shuti jovenbash cashnami nin: “Shucunapaj fotocunata o shuj cosascunata Internetpi ricujushpaca, ama yapa tiempota yalingapami cuidarina cani. Fotocunata churangapaj Internetpi shuj cuentata charingapaj munashpaca, jarcarinatami yachajuna canchi” nishpa.

•   Imapash nalicunata ama ricungapami decidina cangui. Bibliapica cashnami nin: “Imatapash nalita ruranataca, tigrashpapash na ricushachu” nishpa (Salmo 101:3).

   “Rijsishcacunapa fotocunata o shuj cosascunata Internetpi churashcataca alimi ricuni, pipash imapash nalicunata churashca cajpica ñana cutinga ricunichu” (Steven).

•   Camba crishcacunata na charij gentecunamandaca caruyanami cangui. Paicunaca ali crishpa causajushcatapashmi pandachinman. Bibliapica cashnami nin: “Nali cumbacunahuan tandanajushpaca, alita rurashpa causanajushcatapashmi saquinguichi” nishpa (1 Corintios 15:33, NM).

   “Ashtacacunaca Internetpi fotocunata churaimandami yapata rijsi tucushcacuna can. Shinapash paicunapa fotocunata tucuicuna ricujpipash canga na ricujunachu cangui. Huaquinbica chai gentecunapa fotocunapimi imapash nali, pinganai cosascuna ricurita ushan” (Jessica).

•   Mashna tiempota fotocunata ricushpa yaligrijushcata, imahoracunalla canba fotocunata Internetpi churagrijushcatapashmi ali ali ricupangui. Bibliapica cashnami nin: “Ricuichi, imashna causanatapash, aligutapachami yarina canguichi. Juizu illanshnaca, na causanachu canguichi. Ashtahuangarin alipacha yachajushcami causana canguichi. Nali punllacunapimi causanajunchi. Ashalla tiempomi saquirin. Chaimandami, tiempota aliguta utilizashpa causana canguichi” nishpa (Efesios 5:15, 16, NM).

   “Tucui punlla Internetpi fotocunata churashpalla yalij gentecunapa fotocunataca ñana ricunichu. Huaquingunaca playaman rishpa shuj churumandallatami 20 viajeta Internetpi churan. Shuj cosasmandalla ashtaca fotocunata churashcata ricunaca tiempotarapashmi perdichin” (Rebekah).

•   Internetpi fotocunata canmandalla canmandalla churajushpaca, shujcunata yali cashcashnami ricuringuiman. Apóstol Pabloca cashnami escribirca: “Cutimbashmi nini [...]. Na cangunapaj munailla alicachirishpa, jariyanachu canguichi” nishpa (Romanos 12:3). Tucui imata rurajujta Internetpi churashcataca amigocunaca alicachingami yashpaca ama yuyanguichu.

   “Huaquingunaca paicunalla llujshishca fotocunatallami Internetpica churan. Canba amigo caimandaca canba ñavi imashna cajtaca yachanimi. Cutin cutin canba ñavita ricunataca na minishtinichu” (Allison).