•  ¿Imamandata ejerciciotaca rurana cani?

•  ¿Imamandata ejerciciotaca na rurani?

•  Ñuca minishtishca ejerciciota rurachunga ¿imata ayudahuanga?

•  Ejerciciota imamanda rurajushcataca yaipimi charina capangui

•  Jovengunaca ¿imatata nin?

 Huaquin llactacunapi jovengunaca ni pugllangapaj, ni ejerciciota rurangapapash ñana munanllu. Chaimandami paicunaca ali saludtapash ñana charin. Shinapash Bibliapica, ejerciciota ruranaca ñucanchipallatami ali can ninmi (1 Timoteo 4:8). Cai cati yuyaicunapi pensaripai:

•   Ejerciciota rurashpaca quiquinllatami ali sintiringui. Ejerciciota rurajpica ñucanchi ñutujupimi endorfina nishcacuna ashtahuan tiai callarin. Chaimi ejerciciota rurashca jipaca cushilla, tranquilo sintirinchi. Huaquingunaca ninmi, ejerciciota ruranaca ama yapata llaquilla cachunmi ayudan nishpa.

   Regina jovenga ninmi: “Tutamandata calpangapaj llujshishpaca ashtahuan alimi trabajaita ushani y ashtahuan alimi sintirini. Calpangapaj llujshishpaca ashtahuan cushillami yalini”.

•   Ejerciciota rurashpaca quiquinllatami ali ricuringui. Ejerciciota ruranaca ashtahuan ali ricurichunmi ayudan. Shinallata ashtahuan fuerzata charichunbashmi ayudan. Ashtahuanbash imata rurangapapash ashtahuan seguromi sintiringui.

   Olivia jovenga ninmi: “Cunanbica 10 flexiongunatami rurai ushani. Chaimi cushilla cani. Caina huataca ni shugutallapash na rurai ushanllu carcani. Shina ejerciciota rurashpa ñuca saludta cuidajushcamandami ali sintirini”.

•   Ejerciciota rurashpaca ashtahuan huatacunatami causai ushangui. Ejerciciota ruranaca ñucanchi shungu sano cachun, shinallata aliguta respirai ushachunmi ayudan. Ashtahuanbash ejerciciota ruranaca, shungu nanaicunata ama charichunbashmi ayudan. Shungu nanaicunahuanmi ashtaca gentecunaca huañun.

   Jessica jovenga ninmi: “Ejerciciota rurana costumbreta charishpaca, Taita Dios carashca cuerpoguta valichishcatami ricuchinchi”.

 ¿Imatata yachajupanchi? Ejerciciota ruranaca ñucanchi saludpallatami ali can. Ashtahuanbash ejerciciota ruranaca cunanbipash ali cachun, jipacunamanbash ali cachunmi ayudanga. Tonya shuti jovenga cashnami nin: “Puringapaj o calpangapaj rishca jipaca nunca na ninguichu imapashi calpangapaj o puringapaj rircani nishpa”. Paica caitapashmi nin: “Ima pretextotapash na churashpa ejerciciota rurashcamandaca na arripintirinichu” nishpa.

 Huaquin razongunami tiaita ushan:

•   Na minishtirinllu yashpa pensarimanda. Sofía jovenga ninmi: “Jovengunaca pensanmi, jovenmi cani imapata ejerciciotaca rurajusha nishpa. Jipa punllacunapi imapash ungüi japinataca na pensarinllu. Mayor gentecunami chaicunamandaca preocuparina can yanmi”.

•   Na tiempota charimanda. Clarissa jovenga ninmi: “Ocupado ocupadomi yalini. Chaimi micungapara, puñungapara tiempotaca llujchina cani. Pero ejerciciota rurangapaj tiempota llujchinaca ñucapaca dificilpachami can”.

•   Gimnasioman ringapaj na culquita charimanda. Gina jovenga ninmi: “Shuj ali cuerpota charingapaca culquimi minishtirin. Gimnasioman ringapapash culquita paganami minishtirin”.

 Caita yuyapai:

 Ejerciciota rurachunga ¿imata ashtahuanbacha jarcan? Imapash jarcachun na saquishpa ejerciciota rurangapaj esforzarishpaca quiquinballata ali cashcatami cuenta japingui.

 Caitami rurana capangui:

•   Quiquinba saludtaca quiquinmi cuidana capangui (Gálatas 6:5).

•   Na yangata pretextocunata churajunachu capangui (Eclesiastés 11:4). Ejerciciota rurangapaca, gimnasioman rijunaca na minishtirinllu. Quiquin gushtashca ejerciciota ruranallami capangui. Shinallata quiquin gushtashca deportetami rurai ushapangui.

•   Ima ejerciciotata rurangui nishpami shujcunata tapui ushapangui (Proverbios 20:18).

•   Ejerciciota rurangapami shuj horariota charina capangui. Ima ejerciciota rurangapaj munashcatami yaipi charina capangui. Shinallata ña chai ejerciciota rurashpaca anotapangui. Shina ruranami ejerciciota rurashpa catichun ayudanga (Proverbios 21:5).

•   Ejerciciotaca pihuanbash cumba tucushpa rurapangui. Shinami paicunaca ejerciciota rurana costumbreta ama saquichun quiquindaca ayudanga (Eclesiastés 4:9, 10).

•   Ejerciciota rurana horas ima jarcaicuna ricurijpipash ejerciciota ruranataca na saquinachu capangui. Chaipa randica ejerciciota rurashpa catingapami esforzarina capangui (Proverbios 24:10).

 Bibliapica, imata rurashpapash aliguta pensarishpami rurana capanchi ninmi (1 Timoteo 3:2, 11). Shinaca imamanda ejerciciota rurajushcata na cunganachu capangui. Ejerciciota ruranapilla empeñarij gentecunataca paicunapilla pensarij gentecunami can ninmi. Julia shuti jovenga ninmi: “Shuj joven ali ñavi, fuerzayuj cashpapash na aliguta pensarishpalla imatapash ruraj cajpica ñana ñucapaca ali ñavishnallapash ricurinllu” nishpa.

 Huaquin cartelcunapica cashnami nin: “Ejerciciota rurashpa yapata shaijushpa ñana valijushpapashmi ejerciciotaca rurashpa catina cangui” nishpa. Chai yuyaicunataca na catinachu capangui. Chai nishcacunata catishpaca quiquinllatami llaqui apai ushangui. Ashtahuanbachaca ashtahuan importante cosascunata ruranatami cungapanguiman (Filipenses 1:10).

 Shinallata cartelcunapi nishcata catishpaca quiquinllatami llaquilla sintiripangui. Vera shuti jovenga ninmi: “Tauca jovengunami pimanbash pariciringapaj munashpa paicunapa fotocunata charin. Callaripi ejerciciota rurachun ayudashpapash jipamanga chai gentecunahuan compararimandami huaquingunaca animarinapa randica, llaquiritara llaquirishca. Ejerciciota rurashpapash tsala o fuerzayuj cangapaj munaimandallaca na ruranachu capanchi. Sino ñucanchi saludta cuidangapami rurana capanchi” nishpa.