“Escuelaman rinataca nimamanda na gushtanichu”. ¿Huaquinbica canbash chashnallatachu pensaripashcangui? ¿Estudianata saquinatachu pensajushcangui? ¿Imatata ashtahuan ruraita ushangui? Cai yuyaicunata ashtahuan liishpa ricupangui.

•  Imamandata huaquingunaca estudianataca saquin

•  Ima pasanapi pensaringui

•  Caipi pensaringui

•  Huaquin jovengunaca caitami nin

 Cai temamanda estudiashcacunaca, jovenguna imacunamanda estudianata saquijtami villan:

•   Estudiana shinlli ricurijpi. “Ali notacunataca na llujchita ushanichu”.

•   Estudianata na gushtaimanda. “Cai estudiashcacunaca imapapash na sirvihuangachu”.

•   Culqui faltaimanda. “Ñuca familiata ayudangapami trabajana cani”.

 Bibliapica ninmi: ‘Ali yachajushca runaca, imata rurangapapash aligutami yarin’ (Proverbios 14:15). Caipica ¿imatata yachajupanchi? Estudianata saquinata pensajushpaca cai decisionda nara japishpallata, caita ruranaca ñuca causaipica imashinata afectagrihuan nishpa pensaripangui.

 Tapuripai:

•   Estudiocunata saquinaca ¿imashinata trabajocunata tarinapica afectagrihuan?

   “Shuj punllaca canba familiata mantiningapaj trabajota mascanami tucunga. Trabajocunapica siempremi por lo menos bachilleratota tucuchishca mañan, shina mañajpica ¿imatashi rurangui?” (Julia).

•   Cunanbi estudianata saquishpaca jipacunaman imapash problemacuna ricurijpica ¿imatashi rurasha?

   “Estudianaca ñucanchi causaipallatami sirvin. Escuelapica na rijsishca gentecunahuanmi tuparinchi, imapash situaciongunatami vincina ricurin. Shinallata imapash trabajocunatami pactachina tucun. Shinaca cashna cosascunatallatami ñucanchi causaipipash rurana tucunga” (Daniel).

•   Estudiocunata saquinaca ¿imashinata ñuca causaipica afectagrihuan?

   “Cunan horasca talvezpashmi escuelapi yachajushcacunaca imapapash na sirvihuanllu yashpa pensaripangui. Shinapash can ña 23 huatacunata charishpami imapash gastocunata rurana ricurijpi ‘antsicarin sumanata restanata yachajurca yashpa pensaringui’” (Ana).

•   Ayudata mascapangui. Bibliapica ninmi: ‘Ali yuyaita cungapaj taucacuna tiajpica, ima llaquipash na japingachu’ nishpa (Proverbios 11:14). Escuelapi nali notacunata llujchijushpa mejorangapaj munashpaca, canba taitacunahuan parlapangui. Na cashpaca canba profesorhuan o escuelamanda rectorhuan o shuj mayor persona de confianzahuanmi parlaita ushangui..

   “¿Canba profesorhuan parlanata pensashcanguichu? Canba profesormi nali yachachijun yashpami talvez pensapangui. Shinapash paihuan parlashpa paipa ayudata mañashpaca talvezpashmi mejoraita ushapangui” (Edward).

•   Imata ruranatapash aliguta pensaripangui. Bibliapica: ‘Imatapash rurashpa callarinapa randica, imata ruranatapash ña tucuchinami ashtahuan ali’ nijunmi (Eclesiastés 7:8). Graduaringacamanga canba causaipi sirvina ali cualidadcunatami yachajui ushapangui.

   “Jipacunamanga talvezpashmi shuj escuelapi estudiana o examengunata ruranaca na minishtiringa. Shinapash escuelapi yachajushca cosascunaca quiquinba causaipillatami sirvinga” (Vera).

•   Imashinalla estudiashpa cati ushashcata ricupangui. Bibliapica ninmi: ‘Aliguta yarishpa imatapash rurajpica, tucui alimi llujshinga’ nishpa (Proverbios 21:5). Estudiocunata saquinataca ama ñapash pensaripaichu. Talvezpashmi mediante internet a distancia o huasimandallata estudiashpa catita ushapangui.

   “Estudiante cashpaca esfozarinata, problemacunata solucionatata y grupopi trabajanatami yachajunchi. Y cai cosascunaca causaipami sirvin. Shinaca estudianaca minishtirishcapachami can” (Benjamín).

 Shinaca: Estudiocunata tucuchinaca canba causaipa ashtahuan preparado cachunmi ayudanga.