Ña huaquin tiempota enamoradocuna shina purinajushpaca ¿dudacunata chari callaripashcanguichu? Shina cashpaca ¿enamoradocuna cashpa catinachu capangui, o tucuchinachu capangui? Cai temaca shuj ali decisionda agllachunmi ayudanga.

Cai temapica cai tapuicunatami yachajupashun:

•  Dudacunata charishpaca ¿imatata rurana cani?

•  ¿Ima decisiondata agllana capani?

•  ¿Tucuchinaca alicha canga?

 Huaquin parejacunaca ña unaillaguta enamoradocuna cashpami, na tauca cosascunapi igual cashcata cuenta japin. Por ejemplo:

•   Shujca llujshinatami gushtan. Cutin chaishujca huasipi canatami gushtan.

•   Shujca tucuicunahuan parlajunata, cutin chaishujca upalla canatami gushtan.

•   Shujca gentepica shuj comportamientotami charin. Cutin chaishujca maipi cashpapash siempremi lo mismota portarin.

 Imashinami ricupanchi, quimsa diferente casocunami can. Primer puntopica, diferente gustocunatami charin. Segundo puntopica, diferente personalidadcunatami charin. Cutin tercer puntopica, shuj shuj pensamientotami charin.

 Caipi yuyapai: Si chai personahuan cazaragrijushpaca, chai quimsandi puntocunamandaca ¿imatata na aguantai ushanguiman? ¿Maijandata aguantanguimanlla?

 Huaquin cusahuarmica diferente gustocunata, diferente personalidadcunata charishpapash alimi causaita ushan. Tucui tucuipi parecido canaca na minishtirinllu. Huaquin parejacunaca diferente gustocunata, diferente personalidadcunata charishpapashmi, chaishuj imata gushtashcata paipash alicachi callarin o chaishujpa cualidadcunamanda paipash beneficiarin. a

 Pero pihuan cazaragrijushpapash, chai personaca quiquin charishca creenciacunatallata charishpa o ima comportamiento quiquinba importante cajpipash, chai comportamiento paipapash importante cashpami ali canman. Porque si na shina cajpica, shuj peligropimi caita ushanguiman.

 Por ejemplo. Shuj shuj religionda charij matrimoniocunamanda parlashpaca, shuj libropica ninmi: “Na chai religiondallata charij parejacunaca, taucacunami divorciarinata yachan” ninmi (Fighting for Your Marriage [Luche por salvar su matrimonio]).

 Bibliapica ninmi: “Cristopi na crijcunahuanga yugo caspipi yugushcashnaca na canachu capanguichi. Shina gentecunahuan yugurishcashna cashpaca desigualmi canguichiman” (2 Corintios 6:14).

 Bibliapica “cazarajcunaca ashtaca problemacunatami charinga” ninmi (1 Corintios 7:28) Shinaca enamoradocuna purinajushpallata problemacunata charishpaca na manllarinachu capanchi.

 Uchilla desacuerdocunata charishpaca, na pensanachu capanchi, na ali causai ushashunllu nishpa. Chai desacuerdocunata aliguman arreglai ushanata o na aliguman arreglai ushanatami ricuna capanchi. Cazaragrinajushpaca, ishcandillatami desacuerdocunata aliguman arreglanata yachajuna can. Chaita yachajunaca minishtirishcapachami can.

 Bibliapica ninmi: ‘Caishujhuan chaishujhuanmi ali shungu cana capanguichi. Shinallata caishuj chaishujmi randimanda llaquirishpa aliguta tratarina capanguichi. Shinallatami quiquingunapash tucui shunguhuan perdonarina capanguichi’ (Efesios 4:32).

 Pero si jatun desacuerdocunata charishpa o cutin na de acuerdo caita ushanajushpaca, talvez na igual causaitaca ushanguichichu. Chaitaca mejor enamoradocuna cashpallatami cuenta japina canguichi. Porque cazarashpara cuenta japishpaca llaqui apanguichimi.

 Ashalla shimicunapi nishpaca, si quiquinba enamoradomanda o enamoradamanda dudacunata charishpa, o cazarangapaca nara listochu cani nishpa dudajushpaca aligutami pensarina capangui.

 Bibliapica ninmi: “Ali yuyaita charij runaca, ima llaqui japinata ricushpaca pacajunmi. Ashtahuangarin na yachajushca runacunaca, yangata rishpa llaquichi tucunllami” (Proverbios 22:3).

 Enamoradohuan o enamoradahuan tucuchinaca dificilmi can. Pero si quiquin o ishcandillata jatun dudacunata charinguichica, mejor tucuchishparapashmi alimi canman.

 ¿Imashinata tucuchita ushapangui? Shuj alipacha y jatun razón tiajpillami, shuj mensajeta cachashpa quiquinba enamoradohuanga tucuchita ushapangui. Mensajecunata cachashpa tucuchijunapa randica, ishcandi parlangapaj shuj ali pushtuguta mascashpa, ima ratopi parlana ali cashcata ricushpami parlana capangui.

 Bibliapica ninmi: “Caishujmanda, chaishujmanda na llullashpami parlana canguichi” (Zacarías 8:16).

 Quiquinba enamoradohuan o enamoradahuan tucuchishpaca ¿quiquinga na ali cashcatachu ricuchijungui? Na shinachu can. Yaripangui, enamoradocuna purishpami ricujupangui, si matrimonioman chayanata o mejor ñana enamoradocuna cashpa catinata. Ñana enamoradocuna cashpapash, alipacha yuyaicunatami yachajui ushangui.

 Tapuripai: “Enamoradohuan purijushca tiempopica ¿imatata ñucapica ricupashcani? ¿Imapita talvez mejoraita ushani? Si jipacunaman pihuanbash cutin enamoradocuna puri callarishpaca ¿ima cosascunatata na shinallata ruraiman?” nishpa.