Carl jovenga ninmi: “Pihuanbash na llevari ushashpaca amigocunata charita, ali causaitapash na usharinllu” nishpa.

 Carl joven yapata nijunshnami uyarin. Shinapash huaquingunaca ama Carl jovendashna pasachunmi paicunaca imagutapash ruranlla. Cutin canga tucuicuna canhuan llevarichunga ¿imatapash ruranguimanllacha? Cati yuyaicunata yachajunami imata ruranata yachachun ayudanga.

•  ¿Imamandata shujcunahuan llevarina munaita charinchi?

•  ¿Imatata ña yachana capangui?

•  Jovengunaca ¿imatata nin?

•   Tucuicuna ñucanchihuan llevarichunmi munanchi. Natalie jovenga ninmi: “Ñuca amigocuna puringapaj rishca fototami internetpica ricurcani. Ñucataca na invitahuashcarcachu. Chaimi imapash nalitami rurajuni yarin yashpa pensai callarircani. Ashtahuangarin ñucahuanga na llevaringapaj munanllu yashpami yapata pinarijurcani” nishpa.

   CAITA YUYAPAI: ¿Huaquinbica ladoman churai tucupashcanguichu? Shujcunahuan ali llevaringapaj munaimanda ¿imatapash rurapashcanguichu?

•   Shujcunashna cangapami munanchi. Mary jovenga ninmi: “Ñuca taitacunaca na celularta charichun saquihuanllu. Cumbacuna número celularta mañajpica na charinichu ninimi. Chaimi cumbacunaca manllarishpa, pero mashna huatatata charinguiyari nihuan. 13 huatatami charini nijpica llaquinayachishpami ricuhuan” nishpa.

   CAITA YUYAPAI: ¿Taitacuna imata jarcajpita na shujcunahuan igual cashcata sintiringui? Chai jarcaicunamanda ama yapata llaquiyangapaca ¿imatata rurapashcangui?

•   Burlai tucungapaca na munanchichu. Olivia jovenga ninmi: “Ñuca cumbacunaca na paicunashna portarijcunahuan, na paicunashna parlajcunahuan, shuj religionmanda cajcunahuanga na llevaringapaj munanllu. Shujcunamanda diferente cajpica tucuicunami burlarin” nishpa.

   CAITA YUYAPAI: Na shujcunashna caimandaca ¿ima horapash nali tratai tucupashcanguichu? Shina nali tratajpica ¿imatata rurapashcangui?

•   Amigocuna illaj quedangapaca na munapanchichu. Rachel jovenga ninmi: “Pihuan tandanajushpapash paicunashna cangapami esforzarin carcani. Chaimi parlocunapipash shujcunashna parlai callarijurcani. Na asinayajpipash asinllami carcani. Ñuca cumbacuna burlarijta ricuimandallami ñucapash shujcunamandaca burlarin carcani. Burlarijpi llaquilla sintirinata yachashpapashmi shina ruran carcani” nishpa.

   CAITA YUYAPAI: Canba cumbacunahuan alipacha llevarinaca ¿minishtirishcapachachu can? Cumbacunahuan ali llevaringapaj munaimandallachu ¿shujcunashna portaripashcangui?

•   Shujcunashna cangapaj imatapash ruraj tucujushpaca nalitami ruranajunchiman. ¿Imamandata shina nipanchi? Nij tucushpalla imatapash rurajujtaca ricunallami. 20 huatata charij Brian jovenga ninmi: “Ñuca cumbacunashna ruraj tucujpica ñucahuanga na ashtahuan llevaringapaj munanllu carca. Chaimandami ñuca imashna cashcashnallata ali cani, nij tucushpalla imatapash rurajpica ñapashmi shujcunaca cuenta urman” nishpa.

   CAITA RURANAMI ASHTAHUAN ALI: Ima ashtahuan importante cashcata yuyapai. Bibliapica ima ashtahuan minishtirishca cashcataca alipacha seguromi cana canguichi ninmi (Filipenses 1:10). Chaimandami ñucapaca ¿imata ashtahuan importante? ¿Taita Diospa yachachishcacunata na cazushpa causajcunashnachu cangapaj munani? o ¿Taita Diosta na rijsijcunahuanllu llevaringapaj munani? nishpami yuyana capanchi.

   James jovenga ninmi: “Shujcunashna ruraj tucunaca imapapash na valinllu. Shujcunapash na alicachinllu, ashtahuan ali gentepash na tucunchichu” nishpa.

•   Shujcunashna imatapash ruranaca candallatami huaglichin. Shujcunahuan ali llevaringapaj munaimandallami imatapash ruranguiman. Shinami tucuita shujcuna munashcashna rurai callaringuiman. Jeremy jovenga ninmi: “Shujcunahuan ali llevaringapaj munaimandaca imatapash rurallashami yuyan carcani. Nalicachitucunapash na importahuanllu carca. Shujcunapa munashcatallami ruran carcani” nishpa.

   CAITA RURANAMI ASHTAHUAN ALI: Imata yachajushcata, imata crishcataca seguromi cana capangui. Na ladoman saquinachu capangui. Shujcuna alicachichunllaca na cambiarinachu capangui. Bibliapica cashnami nin: “Ashtacacunahuan nalita rurangapaca, ama catinguichu” nishpa (Éxodo 23:2).

   Melinda jovenga ninmi: “Ñucaca paicuna gushtashca musicata, televisionbi programacunata, pugllaicunata catingapami munarcani. Paicunashna mudaringapaj, arreglaringapami munarcani. Paicunashna cangapajmi munarcani. Ñuca cumbacunashna tucushcataca tucuicunallatami cuenta urmarca. Ñucapashmi cuenta urmarcani. Chaimi sololla, imata ruranatapash na atinajurcani. Chaimi na tucui gentecuna alicachijpi causana cashcata yachajurcani. Amigocunata charinaca alimi can. Shinapash ali amigocunata charingapaj, ali yuyangapaca tiempomi minishtirin” nishpa.

•   Shujcunashna imatapash rurashpaca nalicunatami rurangui. Chris shuti jovenba primotami shina pasarca. Chris jovenga ninmi: “Ñuca primoca shujcunapa ñaupapi ali quedangapallami drogacunata chupai callarirca. Shuj nali cosascunatapashmi rurai callarirca. Drogata chupana viciota na saquishpaca manllanayai llaquicunahuanllami causanman carca” nishpa.

   CAITA RURANAMI ASHTAHUAN ALI: Nalita rurajcunamanda, nalicunata parlajcunamandaca caruyanami capangui. Bibliapica ninmi: “Alipacha yachajushca runacunahuan tandanajuj runaca, alipacha yachajushcami canga. Ashtahuangarin shinlli shungu runacunahuan tandanajuj runaca, ninandami llaquichi tucunga” nishpa (Proverbios 13:20).

   Melanie jovenga ninmi: Melanie jovenga ninmi: “Shujcunahuan ali llevaringapaj munaimanda imatapash ruranaca huaquinbica alimi can. Shinapash nali cajta ricushpaca ama rurapanguichu. Ali amigocunaca can imasha cashcatami chasquinga. Paicunaca imagupi mejorana cajpica ayudangapaj listomi can” nishpa.

   Caita rurapangui: Pihuanbash llevaringapaj munashpaca na canbapura gentecunahuanllaca llevarinachu capangui. Taita Diospa mandashcacunata catijcunahuanllami amigo tucuna capangui.