Internetta utilizajpica na munajpipash jaricuna, huarmicuna lluchulla pingaipa nalicunata ruranajujcunami jaicata ricurinlla. Chaimi 17 huatacunata charij Hayley shuti jovenga nin, pornografiata ricungapaj mascajunaca na minishtirinllu. Na yashcapimi jaicata ricurinlla nishpa.

 Pornografiata nunca na ricushachu nij gentecunapashmi, pornografiata ricuna munaicunata charishca. Por ejemplo, 18 huatacunata charij Greg shuti jovenga ninmi: “Pornografiataca nunca na ricushachu yarcani. Shinapash shuj viajeca ricurcanimi. Shina pasajpimi ñucapilla na confiana cashcata yachajurcani” nishpa.

 Cunanbica ashtaca jovengunami nali, pinganai fotocunata, videocunata, nali mensajecunata escribishpa shujcunaman cachan. Chaimi pornografiaca tucui ladocunapi ricurin.

 ¿Imatata yachajupanchi? Ñucanchi abuelocuna causaj tiempopica pornografiataca na ricunllu carca. Shinaca quiquinga ¿pornografiata ricunataca saqui ushanguicha? (Salmo 97:​10).

 Saquingapaj munashpaca saqui ushanguimi. Shinaca pornografiata ricuna nali cashcatami ali intindina cangui. Cunanga pornografiamanda gentecuna ima nijta ricupashunchi.

 Llulla: Pornografiata ricunaca alimi can.

 Cierto: Pornografiata ricunaca tabacota fumaj cuendami can. Tabacota fumashpaca pulmondami huaglichin. Shinallata pornografiata ricushpaca cusahuarmi pacta puñunataca mapa, pinganayai, nali ruraicunata rurachunmi pensai callarichin. Ashtahuangarin Taita Diosca shuj jari, shuj huarmi cazarashpa pacta puñuchunmi rurarca. Shinallata cusahuarmicuna cushilla ishcandi pacta causachunmi rurarca (Génesis 2:24). Huaquingunaca nalitarami alitashna ricui callarin. Por ejemplo, estudiashca gentecunaca nishcami, pornografiata ricuj jaricunaca paicunapa huarmicunataca nalimi tratan nishpa.

  Huaquin gentecunamanda parlashpaca Bibliapica cashnami nin, “juizupash tucurijpimi, ima nalita ruranatapash na pinganayachin” nishpa (Efesios 4:19). Nali munaicuna mishachun saquishca gentecunaca, imapash nalicunata rurashpapash llaquillaca na sintirinllu.

 Llulla: Pornografiaca shuj jarihuan shuj huarmihuan imashna puñunatami yachachin.

 Cierto: Pornografiata ricushpaca imata rurashpapash cushillaca na sintiringuichu. Shinallata pitapash ricushpaca nali yuyaihuan, nali munaihuanllami ricui callaringui. Huaquin estudiashcacunaca ninmi, pornografiata ricujcunaca cazarashca jahua huarmihuan pacta puñushpapash cushillaca na sintirinllu nishpa.

  Jesusta ali caticunataca Bibliapica cashnami mandan:“ Huainayanata, Diospaj ñaupajpi mapayanata, nalita rurana yuyaicunata, nali munaicunata, charijyanataca na munanachu canguichi” nishpa (Colosenses 3:5). Pornografiata ricunaca nachu ¿nali ruraicunaman apanman?

 Llulla: Pornografiata na ricungapaj munajcunaca pingaimandallami na ricun.

 Cierto: Pornografiata na ricunayachijcunaca shuj jarihuan, shuj huarmihuan pacta puñunataca Taita Dios churashcatami ricun. Shinallata cusahuarmicuna ishcandi cushilla causanata Taita Dios churashcatami paicunaca ricun. Chaimi ña cazarashcacunaca cusahuarmi pacta puñunataca alicachishpa ricun. Cutin pornografiata ricujcunaca cusahuarmi pacta puñunataca nalicachishpami ricun.

  Bibliapica cusahuarmicunamanga cashnami nin: ‘Huambrara cashpa cazarashca cambaj huarmihuanlla cushijungui, paipa juyaihuanga tucui causaipimi ninandapacha cushijuna’ cangui nishpa (Proverbios 5:18, 19).

 Pornografiata ricunata na saqui ushashpaca ¿imatata rurai ushangui? Chaipaca “¿Imashinata pornografiata ricunataca saqui ushangui?” nishca partepi ricupangui.

 Pornografiata ama ricungapaj esforzari. Pornografiata ricunapi ña urmashca cashpaca saquita ushanguimi. Pornografiata ñana ricushpaca quiquinllatami cushilla sintiringui.

 Cunanga Calvin jovenhuan ima pasashcata ricupashun. Paica 13 huatacunata charishpami pornografiata ricui callarirca. Calvin jovenga ninmi: “Pornografiata ricuna nalipacha cashcataca alimi yacharcani. Ricushca jipaca llaquillami sintirin carcani. Shinapash chaita ricunataca nimamanda na saqui usharcanichu. Shuj punllaca ñuca taitami yachaj chayarca. Shinapash ñuca taita yachaj yachanaca alimi carca. Pipash ayudachunmi minishtijurcani”.

 Calvin jovenga pornografiata ricunataca ñami saquishca. Paica ninmi: “Pornografiata ricui callarinaca nalipachami cashca. Pornografiata ñana ricushpapash ña ricushcacunataca ñuca yuyaimandaca na llujchi ushashcanichu. Huaquinbica cutinmi pornografiata ricuna munaita charini. Shinapash imashna sintirinatami pensarini. Chaita ricuna munai cutin shamujpica Jehová Diosta sirvijuimanda cushilla cashcatami yarini. Shinallata ñuca concienciapash alimi cani. Jipa punllacunapi shuj cushilla causaita charinatapashmi yarini” nishpa.