María Magdalenaca jahua cielota ricushpandimi viquita ficharijun. Jesús caspipi huarcuriajujta ricushpami ninanda llaquirin. Chaupi punlla chayanapimi chai llactapica yana yana tucun (Lucas 23:44, 45). María Magdalenaca paipa jahualla churajushcata hombrospi churashpami paipa ladopi shayanajuj huarmicunataca ugllajun. Chai punlla eclipse solar cashpaca lunaca inditaca asha minutocunapillami tapanman carca, shinapash chai punllaca quimsa horascamanmi yana yana carca. Chai punllaca tuta huacaj animalcuna huacajtapashmi María, shuj gentecunapash uyai callarishcanga. Chashna pasajujta ricushpami ninanda manllarishpa huaquin gentecunaca: “Cai runaguca, Taita Diospaj Churipachami cashca” ninajurca (Mateo 27:54). Jehová Diosca paipa churita llaquinaita huañuchishcamandami, chashna llaquicunata cachamujun nishpami Jesusta catijcunapash, shuj gentecunapash yuyanajushcanga.

 Jesús ninanda sufrijujta ricushpapash María Magdalenaca chaimandaca na ringapaj munarcachu (Juan 19:25, 26). Jesús chashna llaquicunahuan cashpaca chai ratoca llaqui llaquimi sintirishcanga. Shinallata Jesuspa mamapash paita acompañachun, paita ayudachunbashmi minishtishcanga.

 Jesusca Mariataca tucuipimi ayudarca, chaimi paipash Jesusmanda tucui usharishcaguta rurangapaj munarca. Shuj tiempotaca gentecunaca Mariataca na ricunayachishpami causan carca, chaimi Mariaca llaqui llaqui causajurca. Shinapash Jesusca cushilla ali causaiguta charichunmi ayudarca. Cunanga Mariaca shinlli fetami charin. Shinlli feta charichunga ¿imata ayudashcanga? Mariapa ejemplomandaca ¿imatata yachajui ushapanchi?

 Bibliapica Mariapa causaimanda parlashpaca, Jesús ayacunata llujchishpa, jambishpa ayudashcatami parlan. Chai tiempocunapica ayacunaca ashtaca podertami charirca, chaimi gentecunapa cuerpoman yaicushpaca paicunapa munashcata rurachin carca. Ayacuna Mariata imata rurashcataca na ali yachanchichu. Shinapash Mariapa cuerpo ucupi siete nali ayacuna junda cashcatami yachanchi. Chai ayacunataca Jesusmi Mariapa cuerpomanda llujchirca (Lucas 8:2).

 Mariaca paipa cuerpopi ayacuna junda cashpaca nunca na fangallaca sintirinllu cashcanga. Shinapash cunanga Jesús ayudajpimi paipa causaica cambiarca. Chashna rurashcamandaca Mariaca ¿imashinata Jesusta agradicishcataca ricuchirca? Jesuspa ali catij tucushpa. Imagutapash rurai ushashcata ricushpaca Mariaca cushijushpami ayudan carca. Jesuspash, paipa catijcunapash micunata, ropata, maipi puñunatapashmi minishtirca. Shinallata trabajota na charishcamanda, culquiguta na charishcamandami pipash ayudachun minishtishcanga. Chaicunapi ayudajpimi villachinapi, yachachinapi ashtahuan tiempoguta yalita ushana carca.

 Mariapash shuj huarmigucunapashmi Jesusta, Jesusta catijcunatapash ayudarca. Huaquin huarmigucunaca culquita charishcamandami “paicunapa charishcacunata utilizashpa ayudanajurca” (Lucas 8:1, 3, La Biblia. Traducción del Nuevo Mundo [TNM]). Cai huarmigucunaca yanushpa caran cashcata, ropata tajshashpa cun cashcata o maipi puñunata mascashpa cun cashcataca Bibliapica na nijunllu. Shinapash Jesusta, paipa catijcunatapash tucui shunguhuanmi ayudanajurca. Shina ayudajpimi Jesuspash, paipa catijcunapash villachinapilla yalita ushan carca. Mariaca Jesús ayudashcamanda imahorapash na pagai tucunataca alimi yacharca. Shinapash tucui usharishcaguta rurai ushashcamandami cushilla sintirin carca.

 Cunan punllacunapi gentecunaca shujcunata ayudajta ricushpaca na ricunayachishpami ricun. Shinapash Taita Diosca na shina ricunllu. Chaimi María Jesusta, paipa catijcunata ayudangapaj esforzarijta ricushpaca Jehová Diosca cushilla sintirin cashcanga. Cunanbipash Jehovata sirvijcunaca María cuendami shuj huauquipanicunataca tucui shunguhuan imagupipash ayudan. Huaquinbica huauquipanigucunamanda imagutapash rurana o cushilla shimigucunata ninallami minishtirin. Shina rurajpimi Jehová Diosca ninanda cushijun (Proverbios 19:17; Hebreos 13:16).

 Huata 33 Pascua fiestata Jesús rurangapaj Jerusalenman rijujpica, Jesusta acompañashpa rij huarmipuracunapimi María Magdalenapash rijushcanga (Mateo 27:55, 56). Shinallata chai tutallata Jesusta prezu apashcata, juzgashcata yachaj chayashpaca María Magdalenaca ninandami culirashcanga. Curacunata mandajcuna, gentecunapash Jesusta huañuchina nishpa cutin cutin ninajujpillami Poncio Pilatoca Jesustaca llaquinaita caspipi huañuchichun saquirca. Tal vez María Magdalenaca Jesús yahuarsapa, shaijushca, llaquinaita caspita hombrospi marcashpa rijujtami ricushcanga. (Juan 19:6, 12, 15-17).

 Yana yana caj horasmi María Magdalenapash, shuj huarmigucunapash “Jesús huarcuriaj caspi ladopi shayanajurca” (Juan 19:25, TNM). María Magdalenaca ultimocaman chaipi quidaimandami Jesús paipa mamata cuidapangui nishpa Apóstol Juanman mingajujta uyashcanga. Shinallata Jesús ninanda caparishpa paipa Taitata mañajujta, ña huañugrijushpaca ‘Ñami tucuita pactachircani’ nijujtapashmi uyashcanga. Chaicunata uyashpa, ricushpami María Magdalenaca ninanda llaquirishcanga. Shina llaquilla cashpapash Jesuspa ladomandaca na anchurircachu. Shinallata Arimatea llactamanda José runagu Jesusta pambangapaj utujupi churajpica María Magdalenaca chai utuju pungu ñaupajpimi quidarca (Juan 19:30; Mateo 27:45, 46, 57-61).

 Ñucanchi huauquipanicuna imapash llaquicunata charijpi, paicunata imashina ayudanata yachangapaca Mariapa ejemplomi ayudanga. Ñucanchi huauquipanicuna imapash llaquicunata charijpica María cuendami imapipash ayudangapaj esforzarina capanchi. Aunque paicunapa llaquicunata na anchuchi ushashpapash, paicunata juyashcata, llaquishcatami ricuchita ushapanchi. Shinlli llaquicunata charishpaca shuj ali amigota charinami ñucanchitaca ninanda ayudan. Ñucanchi amigocuna minishtirijuj horaspi paicunata ayudajpica paicunaca ninandami cushijunga. Shina rurashpami huauquipanicunatapash juyashcata, Jehovatapash juyashcata ricuchinchi (Proverbios 17:17).

 Jesusta pambana utujupi churashca jipami Mariapash, shuj huarmigucunapash Jesuspa cuerpopi javingapaj nishpami mishquilla ashnajuj jambicunata randinajurca (Marcos 16:1, 2; Lucas 23:54-56). Mariapash, shuj huarmigucunapash domingo tutamandata jatarishpa rinajushpami ‘Jesusta pambashca utujupi tapashca rumitaca ¿imashinashi anchuchishun?’ nishpa parlarishpandimi rinajushcanga (Mateo 28:1; Marcos 16:1-3). Shina parlarishpa rinajushpapash na manllashpami Jesusta ricungapaj rinajurca. Ashtahuangarin cai huarmigucunaca Jehová Dios ayudanapi confiashpami paicunapa tucui usharishcatalla ruranajurca.

 Mariami chaishuj huarmigucunamandaca Jesús pambashca utujumanga pundapi chayashcanga. Chaiman chayashpaca utujuta tapashca rumita anchuchishcata ricushpaca Mariaca ninandami manllarishcanga. Chaita ricushpami Mariaca calpajushca rishpa Pedroman, Juanmanga cashna villajushcanga “Apunchi Jesustaca utujumanda apashcamari. Maipi churashcatapash, na yacharinllu” nishpa. Chaita uyashpami Jesusta pambashca utujuta ricungapaj rirca. Jesús na chaipi cajta ricushpaca paicunaca huasiman tigrarcallami (Juan 20:1-10). a

 Mariaca Jesús pambashca utujuman tigrashpaca, paillami quidarca. Chaimi Mariaca Jesús utujupi na cajta ricushpaca huacai callarirca. Chaimi cutin utujuta ricushpaca Jesusta apashca cashcataca nimamanda na crita usharca. Shina ricujujpimi yurata churajushca ishcai angelcuna tiajujta ricurca, chaimi chai angelcunaca “¿Imamandata huacajungui?” nishpa tapurca. Chashna tapujujpimi apostolcunaman imashna villashcashnallata “Ñucata Mandaj Jesusta apashcamandami huacajuni. Paitaca, maipi churashcatapash na yachapanichu” nishpami villajurca (Juan 20:11-13).

 Chashna nishca jipallami tigrarishpa ricujpica shuj jari paipa huashapi shayajujta ricurca. Mariaca Jesús cashcata na rijsimandami, huertata cuidaj runagumi can yarca. Jesusca chashna nishpami juyaihuan tapurca: ¿Imashpata huacajungui? ¿Pitata mascajungui? nishpa. Shina tapujpimi Mariaca cashna nirca: “Ñucata Mandajlla, Jesús huañushcata maipi churangapaj apashca cashpaca villahuailla, ñuca apamugripashallami” nijurcami (Juan 20:14, 15). Pero caipi pensaripashunchi: ¿Ciertopachachu Mariaca Jesuspa cuerpotaca aparijta ushanman carca? Mariaca tucui usharishcagupi ayudangapaj munashpami Jesuspa cuerpota aparisha rina cashcata na yuyashcanga.

 Llaquilla sintirijushpa o problemacunata aguantana cashpaca, Mariapa ejemplomi ayudaita ushan. Imatapash na rurai ushanapilla pensarijushpaca manllaimandami imatapash na rurai ushashun. Pero ñucanchi tucui usharishcaguta rurashpa, Jehová Dios ayudanapi confiashpaca ñucanchi nunca na yuyashca cosascunatami rurapashun (2 Corintios 12:10; Filipenses 4:13). Shina rurashpaca Jehová Diostami cushichishun. María huarmigu shina rurajpimi Jehová Diosca ninanda bendiciarca.

 María ricushca jariguca huertata cuidajca na carcachu. Paica pundapica carpintero, jipaca yachachijmi carca. Shinaca María ricushca jariguca Jesusmi carca. Mariaca Jesús causarishcataca na yacharcachu. Chaimandami Jesustaca na rijsishpalla rirca. Jesusca ushaita charij espíritu cuerpohuanmi causarirca. Chaimi María cuenta japichunga aichayu, tulluyu cuerpohuan ricurirca. Jesús causarishca punllacunapica paita rijsishcacunapash na rijsircachu (Lucas 24:13-16; Juan 21:4).

 Jesusca María paita rijsichunga Mariapa shutitami nirca. Chaimi Mariaca jaicata tigrarishpa “¡Rabbóni!” nishpa caparirca. Mariaca siempremi juyaihuan cai shimitaca nin cashcanga. Paipa juyashca yachachij causarishcata yachashpaca, Mariaca cushilla sintirimandami Jesuspi charirishpa nimamanda na cacharingapaj munashcanga (Juan 20:16).

 María imata pensajushcata yachaimandami Jesusca “Ama ñucapi huarcurihuaichu” nirca. María paita cacharichunmi Jesusca juyaihuan “Ñuca Taitapajmanga nara vichai rinichu” nishcanga. Jesús jahua cieloman tigrana horasca nara chayarcachu, todavía cai alpapi shuj cosascunata rurana tiarcarami. Chaimi María ayudachun minishtirca. Chaimi Mariaca Jesús tucui ima nishcata ali ali uyajurca. Jesusca Mariataca cashnami nirca: “Ñuca huauquicunapajman rishpa, cashna villagripai: ‘Ñuca Taitaca, cangunapajpash Taitami. Ñuca Taita Diosca, cangunapajpash Taita Diosmi. Paipajmanmi vichai rina cani’ nigripai” nircami (Juan 20:17).

 Jesús causarishcata pundapi ricunaca Mariapaca shuj jatun bendicionmi carca. Shinallata Jesús causarishcata paipa catijcunaman villagrinaca Mariapaca shuj jatun privilegiomi cashcanga. Mariaca cushijushpami Jesusta catijcunata tuparishpaca “Jesustaca ricurcanimi” nishcanga. Jesuspa catijcunaca María, Jesús causarishcata, paiman imatalla nishcata paicunaman villajushcataca nunca na cungashcangachu (Juan 20:18). María Jesuspa catijcunaman villashcahuanga Jesuspa pambashca utujuman rishca huarmigucuna villashcahuanbash igualmi carca (Lucas 24:1-3, 10).

 Jesús causarishcata villajpica Jesuspa catijcunaca ¿imashinata chasquirca? Bibliapica ninmi: “Cai huarmicuna villajpica, juizu illanshnallami ninajun yashpami, paicunaca na crirca” (Lucas 24:11). Chai tiempocunapica huarmigucuna imata nishcataca na crinllu carca, chaimi Jesuspa catijcunapash chashnallata yuyashcanga. Ñaupaman pushajcunapa costumbrecunapi nishcashnaca juiciocunapica huarmicuna nimatapash na nita ushanllu carca. Shinapash Jehovapash, Jesuspash chai gentecuna cuendaca na yuyanllu. Chaimandami Mariataca Jesús causarishcata Jesuspa catijcunaman villachun utilizarca.

 Mariaca Jesuspa catijcuna paita na crijpipash Jesús paipi confiajta yachashpaca cushillami sintirirca. Jesusca tucui paipa catijcunamanga Diospa Reinomanda villachichunmi mingarca (Lucas 8:1). Jesusca paipa catijcunamanga Diospa Reinomanda villachijpica ‘na tucuicuna uyangapaj munangachu’ nircami (Juan 15:20, 21). María Magdalenapa ejemplotami catingapaj munapanchi. Jesuspa catijcunallata na crijpipash, paica Jesús causarishcataca villachishpami catirca.

 Chai jipallami, Jesusca paipa apostolcunaman, shinallata paipa catijcunamanbash ricurirca. Shinallata 500 yali tandanajushca crijcunamanbashmi ricurirca (1 Corintios 15:3-8). Jesús causarishcata uyashpa, ricushpami Mariapa feca ashtahuan shinlli tucushcanga. Jerusalén llactapa Pentecostés fiestapi tandanajushca tucui huauquipanicunahuanmi Mariapash cashcanga. Chai punllapimi Jesuspa catijcunaca Jehová Diospa espíritu santota chasquirca (Hechos 1:14, 15; 2:1-4).

 Caipi yachajushca shinaca María Magdalena shinlli feta charishcatami yachajupanchi. Mariapa ejemplota catingapaj esforzaripashunchi. María cuenda shinlli feta charingapaca Jesusta agradicingapami tucui usharishcaguta rurangapaj esforzarinami capanchi. Shinallata Jehová Dios ayudanapi confiashpami shujcunamanda imagutapash rurangapaj esforzarishun.