Taita Diosca ñucanchi mañashcacunataca uyanmi. Bibliapa textocunata ricushpa shinallata gentecuna Taita Diosta mañajpi imashina Taita Dios contestashcata yachajchayashpami, Taita Dios mañaicunata contestan cashcataca yachapanchi. Taita Dios mañaicunata uyan cashcamandaca Bibliapica cashnami nin: “Paita manllajcuna, imata munashcataca pactachingami. Shinallata paicuna caparishpa mañashcatapash, uyashpa quishpichingami” (Salmo 145:19). Shinapash Taita Dios mañashcacunata contestachunga ¿imata rurana capanchi?

Taita Diosca cashna rurachunmi munan

•   Mañajushpaca Jesusta, Mariata, santocunata, yanga dioscunataca na mañanachu capangui. Taita Diostami mañana capangui. Bibliapica Jehová Diostaca mañaicunata ‘uyajmi can’ nin (Salmo 65:2).

•   Taita Dios munashcashna mañajpimi Taita Diosca mañaicunataca uyan (1 Juan 5:14).

•   Mañajushpaca Jesuspa shutipi mañana capangui. Chaimi pai autoridadta charishcata respetapangui. Jesusca nircami: “Ñuca Taitapajman ñuca na pushajpica, pipash na paillata chayaita ushanllu” (Juan 14:6).

•   Taita Diospi tucui shunguhuan crina capangui. Taita Diospi tucui shunguhuan cringapaca Taita Diostami mañana capangui (Mateo 21:22; Lucas 17:5).

•   Imatapash na llullashpa parlaj, humildemi cana capangui. Bibliapica ninmi: “Mandaj Diosca, tucuita yali jatunyachi tucushca cashpapash, na jariyashpa mañajujtami uyan” (Salmo 138:6).

•   Taita Diosta mañanataca na shaijunachu capangui. Jesusca nircami: “Diosta mañaichi, paica carangallami” (Lucas 11:9).

Gentecuna mañajpica ¿imatata Taita Diosca na ricun?

•   Shuj shuj llactacunamanda cajtapash na ricunllu. “Taita Diosca, na pitapash ñavita ricushpalla chasquinllu. Chaitaca, cunanga alipachami yachani. Maijan llactapi cashpapash, paita manllashpa, imatapash cashcatapacha rurajtami, Diosca alicachin” (Hechos 10:34, 35.)

•   Imashina mañajta. Tiarishpa, cungurishpa, cumurishpa, shayarishpapash mañaita ushanchillami (1 Crónicas 17:16; Nehemías 8:6; Daniel 6:10; Marcos 11:25).

•   Taita Diosca upallaguta mañajpipash uyanllami. Shinallata shungu ucupilla mañajpipash Taita Diosca uyanllami (Nehemías 2:1-6).

•   Taita Diosca jatun llaquicunata charijpi, ashalla llaquicunata charijpipash uyanllami.  Bibliapica nijunmi: “Diosmi cangunataca cuidajun. Shina cajpimi ima llaqui japijpipash, paiman mingashpa saquina canguichi” (1 Pedro 5:7).