Taita Diosmi primer jarita y primer huarmita rurarca. Y paimi paicunataca cazarachirca. Taita Diosmi shuj jarita y shuj huarmitaca ishcandicuna cushilla, ali causachun cusahuarmi causaitaca callarichirca. Shinami shuj familia tiai callari ushana carca (Génesis 1:27, 28; 2:18).

 Taita Diosca tucui cazarashcacuna cushilla causachunmi munan (Proverbios 5:18). Cushilla causachun munaimandami cusahuarmicunamanga Bibliapica mandamientocunata, consejocunatapash escribichishca.

Cai temapica cai yuyaicunamandami yachajugripanchi:

•  Cusahuarmicunamanga ¿imatata Taita Diosca mandashca?

•  Taita Diosca separarinamanda y divorciarinamandapash ¿imatata yuyan?

•  ¿Taita Diospa ñaupapi ali ricuringapaca legalmente cazaranachu can?

•  Bibliapica cusacunata y huarmicunatapash ¿imata rurachunda mandan?

•  Taita Diosca ¿cazarashcacuna huahuacunata charichunllu mandan?

•  ¿Quiquinba matrimoniopi Bibliapa consejocuna ayudaita ushapanllu?

•  Cusahuarmicunata ayudangapaj Bibliapa textocuna

 Taita Diosca callarimandapachami, shuj jarica shujlla huarmihuan cazarachun munashca (Génesis 2:24). Taita Diosca shuj jari tauca huarmicunata charichunga nimamanda na munanllu. Shinallata jaripura o huarmipura cusahuarmicunashna causachunbash na munanllu. Taita Diosca shuj jari shuj huarmihuan nara cazarashpallata pacta causachunbash nimamanda na munanllu (1 Corintios 6:9; 1 Tesalonicenses 4:3). Jesusca paipa catijcunataca cusahuarmicunaman Taita Dios imata mandashcata cazuchunmi mandarca (Marcos 10:6-8).

 Taita Diosca cusahuarmicuna para siempre pacta cachunmi munan. Cazaranajushpaca tanto cusapash tanto huarmigupash randimanda juyarishpa, fiel cashpa causanata, y huañungacaman pacta canatami prometin. Y Taita Diosca ishcandicuna chai promesata cumplichunmi munan (Marcos 10:9).

 Cusahuarmicunaca huaquinbica imapash minishtirishcapacha cajpimi, shuj tiempogutaca separarina tucunga. Por ejemplo, cusapa o huarmigupa familiapi imapash pasajpi. Pero Bibliapica cusahuarmi causaipi imapash problemacuna ricurijpi separarina cashcataca na nijunllu. Ashtahuangarin imapash problemacunata charishpaca ishcandillata parlarishpa ali tucuchunmi munan (1 Corintios 7:10).

 Bibliapi nishcashnaca, cusahuarmicunaca maijanbash huainayana juchapi urmashca cajpillami divorciaritaca ushan ninmi (Mateo 19:9). Shinaca shuj razongunamandara separarishpa o divorciarishpaca, tanto cusapash tanto huarmipash na shujcunataca parlachijunachu can. Ni cutinbash na shujhuanga cazaranachu can (Mateo 5:32; 1 Corintios 7:11).

 Taita Diosca tucui cristianocuna cazaranamanda leycunata respetachunmi munan (Tito 3:1). Usharishcacamanga cusahuarmicunaca registro civilpimi cazarashpa registrarina can. Shinami autoridadcunata respetashcata ricuchinga y Taita Dioshnallata matrimoniota sagrado cashcata ricushcatapash ricuchinga. a

•   ¿Imatata ishcandicuna rurana can? Tanto cusapash tanto huarmigupash randimandami juyaihuan, respetohuan tratarina can (Efesios 5:33). Tanto cusapash y huarmipashmi ishcandicuna pacta puñunajushpa imata cuna cashcataca juyaihuan cuna can. Shinallata randimandami na traicionarina can (1 Corintios 7:3; Hebreos 13:4). Huahuacunata charishpaca ishcandillatami huahuacunataca cuidana y yachachina can (Proverbios 6:20).

   Bibliapica ishcandicuna trabajanamanda o huasipi ruranacunamandaca ¿imatata nin? Bibliapica cusahuarmicunaca imatapash cashna o chashnami rurana canguichi nishpaca na mandajunllu. Cada matrimoniomi ima ashtahuan mejor cashcaguta ricushpa decidina can.

•   ¿Imatata cusacunaca rurana can? Bibliapica ‘cusaca huarmipa umashnami can’ nijunmi (Efesios 5:23). Shinaca cusami familia ucupica paipa huarmigupa, huahuacunapapash ima ali cashcata ricushpa decidina can y familiata ñaupaman pushana can.

   Cusami familiataca fisicamente, emocionalmente y espiritualmentepash cuidana, mantinina can (1 Timoteo 5:8). Paipa huarmiguhuan parlarishpa, huarmigu imata nishcata uyashpa, pai imashina sintirinatapash yaipi charishpaca, cusacunaca huarmiguta ciertopacha valichishcata, alicachishcatapashmi ricuchin (Proverbios 31:11, 28). Bibliapica cusaca juyaihuanmi huarmigutaca tratana can nijunmi (Colosenses 3:19).

•   ¿Imatata huarmigucunaca rurana can? Bibliapica “huarmicunapash, quiquingunapa cusataca tucui shunguhuanmi respetana capanguichi” ninmi (Efesios 5:33). Taita Diosca, huarmigucuna paicunapa cusaguta tucui shunguhuan respetajta ricushpaca ninandami cushijun.

   Huarmigucunaca paicunapa cusagu ali decisiongunata japichunmi ayudanalla can. Shinallata cusacuna umashna mandajujtapash apoyanami can (Génesis 2:18). Bibliapica ali huarmigucunamandaca juyailla, ali shimicunatami nin (Proverbios 31:10).

 Na, huahuacunata charichunga na mandajunllu. Ciertomi can, punda tiempocunapica huaquin gentecunataca huahuacunata charichunmi mandarca. Pero cai tiempopi cristianocunaca chai mandashcata cazuna obligaciondaca ñana charipanchichu (Génesis 1:28; 9:1). Jesús cai alpapi cashpaca paipa catijcunataca nunca na nircachu, huahuacunata charinami canguichi nishpa. Y Jesuspa catijcunapash chai tiempopi cusahuarmicunataca huahuacunata charinami canguichi nishpaca nunca na nircachu. Huahuacunata charinata o na charinataca cada cusahuarmimi ricuna can.

 Ari, Bibliapa consejocunaca ayudaita ushapanmi. Porque Bibliapi tiashca consejocunami quiquinba matrimoniopi ali causai callarichun, problemacunata charishpapash imata ruranata yachachun ayudanga.

 Bibliaca cusahuarmicunataca cai cosascunapimi ayudanga:

•   Ciertopacha juyashcata ricuchirichunmi ayudan (1 Corintios 13:4-7; Colosenses 3:14).

•   Ishcandicunallata intindirishpa, ishcandipa beneficiota mascashpa causachunmi ayudan (1 Corintios 10:24).

•   Randimanda uyanata yachajuchunmi ayudan (Santiago 1:19).

•   Respetarinata yachajuchunmi ayudan (Romanos 12:10).

•   Perdonarinata yachajuchunmi ayudan (1 Pedro 4:8).

•   Cusatalla o huarmitalla juyanata yachajuchunmi ayudan (Marcos 10:9).

•   Pacienciata charichunmi ayudan (Efesios 4:2, 3).

•   Ishcandipura maquipurarishpa, ayudarishpa causachunmi ayudan (Eclesiastés 4:9).

•   Ashtahuan juyarishpa causachunmi ayudan (El Cantar de los Cantares 8:7).