Shuj religionda charinaca minishtirishcami can. Taita Diosca paita adorangapaca tandanajushca cachunmi munan. Bibliapica ninmi: “Caishujhuan, chaishujhuan ashtahuan juyarishpa, imata cashpapash alita ruranacunata yarichirishunchi. Tandanajunataca, na saquinachu canchi” ninmi (Hebreos 10:24, 25).

 Jesusca paipa catijcunaca shuj ali organizarishca grupo canatami ricuchirca. Chai grupomanda parlashpami Jesusca cashna nirca: “Shina juyarishpa causanajujta ricushpami, ñucapa yachajujcuna cajta tucuicuna rijsinajunga” nircami (Juan 13:35). Juyaita ricuchingapaca Jesusta catij puracunahuanllami tandanajuna carca. Chaipaca congregaciongunapi ali organizarishcami cana carca. Shinallata Diosta adorangapami siempre tandanajuna carca (1 Corintios 16:19). Shinami Jesusta catijcunaca mundo enteropi shuj familiashna tandanajushca cagrijurca (1 Pedro 2:17).

Shuj religionda charishpapash ¿imatata rurana canchi?

 Bibliapica Diosta adorangapaca tandanajuna minishtirishca cashcatami ricuchin. Pero Bibliapica shuj religionda charishcamandalla Taita Dios ñucanchita alicachishpa ricujtaca na yachachinllu. Taita Diospa ñaupapi ali ricuringapaca Bibliapi yachajushcacunatami ñucanchi causaipi pactachina canchi. Bibliapica: “Taita Diospa ñaupapi tucui shunguhuanbacha ima mapapash illaj crij canaca o [ali religionga], cashnami: Taitamama illaj huahuagucuna, sapalla huarmigucuna jatun llaquipi cajpica ricugrinami. Cai pachapi imapash nalihuan mapayanamandaca, cuidarishpami causana” nijunmi (Santiago 1:27).