Israelitacunapa tiempopica, Taita Diosca ñucata adorangapami diezmota a o huatapi tucui charishcacunamanda 10 por cientota ñucaman cuna canguichi nishpa mandarca. Paicunataca cangunapa ‘pambapi huatan huatan fucushca tucui granocunamandami, chungamanda shujguta na cungashpa cuna canguichi’ nircami (Deuteronomio 14:22).

 Moisesman Cushca Leypica diezmota cunami can nishpami mandajun. Chai Leytaca Taita Diosmi israelitacunaman curca. Pero cristianocunaca Moisesman Cushca Leyta catishpaca ñana causanajunchichu. Chaimi diezmota cunaca ñana minishtirishca can (Colosenses 2:13, 14). Pero cada cristianomi “shungu ucupi imata carangapaj munashcata carana can. Y de malagana y a la fuerzaca na caranachu can. Porque Taita Diosca cushijushpa carajtami juyan” (2 Corintios 9:7).

•  Bibliapa Antiguo Testamentopica ¿imatata diezmomandaca nin?

•  Bibliapa Nuevo Testamentopica ¿imatata diezmomandaca nin?

 Antiguo Testamentopica cutin cutin diezmomandaca parlajun. Tauca viajetaca israelitacunaman cushca Leypimi diezmomandaca parlajun. Pero israelitacunaman Leyta nara cujpillatami Bibliapica, ishcai personacuna diezmota cushcata parlajun.

Moisesman Cushca Ley nara tiajpillatami diezmomandaca parlarca

 Bibliapi nishcashnaca, Abrán (Abrahán) runagumi primeroca diezmotaca curca (Génesis 14:18-20; Hebreos 7:4). Abranga Salem llactamanda sacerdote reymanmi shuj diezmota curca. Chai diezmoca shuj caranagumi carca. Bibliapica, Abrahán o paipa churicuna cutin shuj diezmota cushcataca na imatapash ninllu.

 Jipamanga Abrahanba nieto Jacobmi diezmota curca. Paica Taita Diostaca, ñucata bendiciajpica ‘tucuilla carashcacunamanda 10 por cientotami quiquinmanga cupasha’ nircami (Génesis 28:20-22). Huaquin estudiashcacunaca, sacrificiocunata rurana animalcunatami Jacobca diezmo nishpa cushcanga ninmi. Jacobca diezmota cushami nishca cashpapash, paipa huahuacunataca diezmota cunami canguichi nishpaca na obligarcachu.

Moisesman Cushca Ley tiashca tiempopi

 Israelitacunaca diezmota cuimandami, Taita Diosta ali adorangapaca imagutapash charin carca.

•   Israelitacuna cushca diezmoca, cada punlla Taita Diosta sirvinajun y alpacunatapash na charij levitacunata y sacerdote levitacunata mantiningapami sirvin carca (Números 18:20, 21). Israelitacunaca na sacerdotecuna caj levitacunamanmi diezmotaca cun carca. Cutin chai levitacunaca paicunaman cushca diezmomanda 10 por cientotami sacerdote levitacunamanga cun carca (Números 18:26-29).

•   Israelitacunaca shuj diezmotapashmi cada huata cun cashca yarin. Chai diezmomandaca levitacunapash y na levitacunapashmi beneficiarin carca (Deuteronomio 14:22, 23). Israelitacunaca chai ofrendacunataca paicunapa especial fiestacunapimi ocupan carca. Huaquin huatacunapicarin, chai ofrendacunahuanmi pobre gentegucunataca ayudan carca (Deuteronomio 14:28, 29; 26:12).

 Diezmota cungapaca ¿imashinata separan carca? Cada huatacunami israelitacunaca, paicunapa alpacunapi fucushcacunamandaca shuj 10 por cientota separan carca (Levítico 27:30). Chai fucushcacunapa randica culquita cungapaj munashpaca, ñana 10 por cientotaca cunachu can, sino 12 por cientotami cuna can (Levítico 27:31). Shinallata ‘huagracunamanda, llamacunamandaca, chungamanda shugutami’ cuna carca (Levítico 27:32).

 Diezmota animalpi cungapaca, corralmanda llujshinajuj animalcunamandami maijan 10​pi urmajta agllan carca. Leypi nishcashnaca, chai animal ali o nali cajtaca na ricujunachu carca, ni shuj animalhuanbash na cambiajunachu carca, ni culquipipash na paganachu carca (Levítico 27:32, 33). Pero cada huata fiestacunapi ocupangapaj cushca diezmotaca culquipi paganallami carca. Chaimi, fiestacunaman carumanda shamunajuj israelitacunapa diezmota culquipi paganaca alipacha carca (Deuteronomio 14:25, 26).

 Israelitacunaca ¿ima horata diezmotaca cun carca? Israelitacunaca cada huatami diezmotaca cuna carca (Deuteronomio 14:22). Pero cada 7 huatacunaca na diezmota cunllu carca. Chai huataca samana huatami carca. Chai huataca ni shuj israelita na paicunapa alpacunataca trabajanllu carca (Levítico 25:4, 5). Chaimandami cozecha temporadapica, diezmotaca na japin carca. Ashtahuanbash israelitacuna cushca shuj diezmotaca cada quimsa huata y cada 6 huatami pobrecunaman y levitacunaman compartin carca (Deuteronomio 14:28, 29).

 Diezmota na cujcunapaca ¿ima castigota tian carca? Moisesman Cushca Leypica diezmota na cujcunapaca, nima castigo na tiarcachu. Diezmota cunataca paicunallatami cada uno yaipi charina carca. Taita Dios ricujujta yaipi charishpami israelitacunaca diezmota cushpa, Taita Diostaca bendiciahuai nishpa tranquilo mañaita ushan carca (Deuteronomio 26:12-15). Taita Diosca diezmota na cujcunataca paita shuanajujtashnami ricun carca (Malaquías 3:8, 9).

 ¿Diezmota cunaca dificilchu carca? Na, na difícil carcachu. Taita Diosca diezmota cujpica, cangunataca na imapash faltangachu nishpami israelitacunamanga prometirca (Malaquías 3:10). Diezmota na cushpaca, paicunataca malmi rin carca. Jehová Diosca na paicunataca bendicianllu carca. Levitacunata y sacerdotecunata descuidashcamandacarin paicunapa trabajomandaca na beneficiarinllu carca (Nehemías 13:10; Malaquías 3:7).

 Jesuspa punllacunapica diezmotaca todaviami paganajunra carca. Pero Jesús huañujpica diezmota pagana obligacionga ñana tiarcachu.

Jesuspa punllacunapi

 Bibliapa Nuevo Testamento partepi nishcashnaca, Jesús cai alpapi cashca tiempopica israelitacunaca diezmota paganajunmi carca. Jesusca diezmota pagana cashcataca alimi yacharca. Shinapash chai punllacunapi ñaupaman pushajcunaca diezmota pagaimandami Moisesman Cushca Leypi minishtirishca mandamientocunataca ladoman saquishpa, ‘alita ruranata, shujcunata llaquinata, Taita Diospi confianatapash ladoman saquinajurca’. Chaita ricushpami Jesusca paicunataca nalicachishpa rimarca (Mateo 23:2).

Jesús huañushca jipa

 Jesús paipa causaita cushpa huañushcamandami, diezmota cuna obligacionga ñana tiarca. Jesusca paipa causaita cushpami Moisesman Cushca Leytaca anularca. Chai Leyta anulajpica, ‘llacta cushca diezmotaca chasquina’ leypashmi anularirca (Hebreos 7:5, 18; Efesios 2:13-15; Colosenses 2:13, 14).