Padrenuestro oraciondaca paipa discipulocuna mañajpimi Jesusca yachachirca. Paicunaca Jesustaca cashnami nirca: “Señor Jesús, mañanata yachachihuai” (Lucas 11:1). Padrenuestro oracionga imacunamanda mañanata, imashina mañanata yachachunmi ayudan. Taita Diosca padrenuestro oraciondallaca na uyanllu. a Ashtahuangarin padrenuestro oracionmi Taita Dios imashina mañachun munashcata yachachun ayudan.

Cai temapica caitami yachajupashun:

•  Padrenuestro oracionga ¿maijanda can?

•  Padrenuestro oracionga ¿imatata ningapaj munan?

•  ¿Taita Diosta mañashpaca padrenuestro oracionda cada rato repitinachu minishtirin?

•  ¿Imashinata mañana cani?

•  Bibliapica shuj shuj mañaicunata rurashcami tian

 Mateo 6:9​manda 13​pimi padrenuestro oracionga tiajun. Padrenuestro oraciondaca shuj Bibliacunapa traducciongunapica diferentetami traducishca. Por ejemplo, ishcai ejemplocunata ricupashunchi:

 Traducción del Nuevo Mundo Bibliapica cashnami nin: “Jahua cielopi tiajuj ñucanchi Taitalla, quiquinba shutiguca santificado cachun. Quiquinba Gobiernopash shamuchun. Quiquinba munaica jahua cielopishna cai alpapipash pactaripachun. Cai punllagupash ñucanchiman micunaguta carahuai. Imashinami ñucanchita ima nalita rurashcacunata perdonashcanchi, shinallata ñucanchi pecadocunatapash perdonahuangui. Ñucanchicuna ima tentacionbi urmachunbash ama saquihuanguichu. Ashtahuangarin, Diablomandaca cuidahuangui”.

 La Sagrada Biblia de América nishca Bibliapica cashnami nin: “Padre nuestro que estás en el cielo, santificado sea tu nombre, venga a nosotros tu Reino, hágase tu voluntad en la tierra como en el cielo. Danos hoy nuestro pan de cada día, perdona nuestras ofensas como también nosotros perdonamos a los que nos ofenden, no nos dejes caer en la tentación y líbranos del mal”. b

 Jesuspa yachachishcacunaca Bibliapa yachachishcacunahuanga siempremi igual can. Chaimi padrenuestro oración imata ningapaj munashcata intindichunga Biblia ayudaita ushanga.

“Jahua cielopi tiajuj ñucanchi Taitalla”

 Taita Dios ñucanchita rurashcamanda, causaita cushcamandami paitaca ñucanchi Taita cangui nita ushapanchi (Isaías 64:8).

“Quiquinba shutiguca santificado cachun”

 Diospa shutica Jehovami can. Paipa shutica santomi can, chaimandami chai shutitaca respetana, santificana capanchi. Taita Dios imashina cashcata, jipa punllacunapi imata ruranata shujcunaman parlashpami Taita Diospa shutita respetashcata, santificashcataca ricuchipanchi (Salmo 83:18; Isaías 6:3).

“Quiquinba Gobiernopash shamuchun”

 Taita Diospa gobiernoca jahua cielopimi can y chai gobiernopica Jesusmi mandanga. Taita Diospa gobierno cai alpapi mandachun nishpa mañachunmi Jesusca yachachirca (Daniel 2:44; Apocalipsis 11:15).

“Quiquinba munaica jahua cielopishna cai alpapipash pactaripachun”

 Jahua cielopica nalita rurana, huañuipash na tianllu. Taita Diosca cai alpapipash gentegucuna para siempre tranquilo ali causaiguta charichunmi munan (Salmo 37:11, 29).

“Cai punllagupash ñucanchiman micunaguta carahuai”

 Jesuspa tiempopica tandatami ashtahuan micun carca. Cai shimicunaca ñucanchi minishtirishca cosascunata Taita Dios caranatami yachachin (Hechos 17:24, 25).

“Imashinami ñucanchita ima nalita rurashcacunata o dibijcunata perdonashcanchi, shinallata ñucanchi pecadocunatapash perdonahuangui”

 Cai contextopica dibijcunata nishpaca pecadomandallatami ningapaj munan (Lucas 11:4). Tucui gentecunallatami pecadocunata ruranchi y chai pecadocunata perdonachun minishtinchi. Pero Taita Dios ñucanchita perdonachun munashpaca ñucanchicunapashmi shujcunata perdonanata yachajuna capanchi (Mateo 6:14, 15).

“Ñucanchicuna ima tentacionbi urmachunbash ama saquihuanguichu. Ashtahuangarin, Diablomandaca cuidahuangui”

 Jehová Diosca ñucanchicuna nali ruraicunata rurachunga nunca na tentanllu (Santiago 1:13). Jesús nishcashna mañashpaca tentaciongunapi ama urmangapaj Jehová Diosta ayudahuai nishpami mañanajunchi (1 Juan 5:19; Mateo 4:1-4).

 Jesús padrenuestro oracionda yachachishpaca na palabra por palabra repitichun yachachircachu. Jesusca padrenuestro oracionda nara yachachishpallatami cashna advirtirca. Mañajushpaca Taita Diosta na rijsi gentecunashna chaitallata chaitallata nishpaca na cutin cutin mañajunachu cangui nishpami yachachirca (Mateo 6:7). Ashtahuangarin shujta viajecuna mañanata yachachijushpaca shuj shuj shimicunata nishpami yachachirca (Lucas 11:2-4).

 Taita Diosmanga ñucanchi shungu ucumanda imata pensajushcata imata sintijushcatami parlaita ushanchi (Salmo 62:8).

 Padrenuestro oracionda ricushpami Taita Dios ima laya oraciongunata uyajta ricupanchi. Imamanda shina nishcata intindingapaca shuj textocunata ricupashun.

•   Taita Diostallami mañana capanchi

   Filipenses 4:6: “Tucuipimi Taita Diosta mañashpa, rogashpa, pagui nishpa quiquingunapa preocupaciongunataca Taita Diosman villana capanguichi”.

   Imatata ningapaj munan: Ñucanchi Taitalla nishpa mañai callarishpaca Jehová Diostalla mañana cashcatami yachajupanchi. Jesusta, Mariata, Santocunapash na mañana capanchichu.

•   Taita Dios munashcashnami imagutapash mañana capanchi

   1 Juan 5:14: “Ñucanchi mañashcacuna Taita Diospa voluntadhuan de acuerdo cajpica, imaguta mañajpipash paica uyanmi”.

   Imatata ningapaj munan: Jesús “quiquinba munai pactarichun” nishpaca, ñucanchi causaipi Taita Diospa voluntadta rurana importante cashcatami yachachingapaj munarca. Chaimi Taita Diosta mañachun nishpaca paipa voluntadhuan de acuerdo cashca cosascunamanda mañana capanchi. Cai alpahuan gentecunahuanbash Taita Dios imata rurangapaj munashcata ashtahuan yachangapaj munashpaca Bibliatami estudiana capanchi.

•   Imashina sintirijushcata, imata minishtijushcatapashmi Taita Diosmanga tucuita villaita ushapanchi

   Salmo 55:22: “Llasha quipishna cambaj llaquitaca, Mandaj Diosman saquilla. Paica ayudangallami”.

   Imatata ningapaj munan: Taita Diosca ñucanchicunamandaca ninandami preocuparin. Chaimi Jesusca padrenuestro oracionbica imacunatalla minishtijushcata mañarca. Ñucanchicunapash Taita Diosta mañashpaca minishtirishca cosascunamanda, ali decisiongunata japingapaj ayudahuai nishpami mañaita ushapanchi. Shinallata llaqui tiempocunapi ayudachun nishpa, ñucanchi pecadocunamanda perdonahuai nishpapashmi mañaita ushapanchi. c