Jesusca gentecuna paicunapa juchacunamanda perdonda charichun, para siempre causaita ushachunbashmi huañurca (Romanos 6:23; Efesios 1:7). Ashtahuanbash Jesusca huañungacamanmi tucuipi Taita Diosta cazurca. Shinami jatun llaquicuna ricurijpipash Taita Diosta tucui causaipi sirvi ushashcata ricuchirca (Hebreos 4:15).

 ¿Imashinata Jesuspa huañuica tucui caicunata rurarca? Ricupashun.

1.   Jesús huañushcamandami ‘ñucanchi pecadocunamanda perdonai tucurcanchi’ (Colosenses 1:14).

    Taita Diosca punda jari Adanda rurashpaca, perfecto, juchapash illajtami rurarca. Shinapash Adanga Taita Diosta cazunapa randica juchatami rurarca. Chaimandami paipa huahuacunaca jatun llaquicunata charirca. Bibliapica shujlla runa na cazushcamanda, tucui gentecuna pecadorcuna tucushcatami intindichin (Romanos 5:19).

    Jesuspash jucha illaj o perfecto cashpapash juchataca na rurarcachu. Chaimandami Jesusca ‘ñucanchi pecadocunamanda huañui’ usharca (1 Juan 2:2). Adán Taita Diosta na cazushpaca tucui gentecunamanmi pecadota yalichirca. Shinapash, Jesús huañushcapi feta charishcata ricuchijcunaca pecadomanda libre quidaita ushanmi.

    Imashinami ricunchi, Adanga ñucanchicunataca juchamanmi jaturca. Shinapash Jesusca ñucanchicunamanda huañushpami juchamanda randinshna ñucanchicunataca salvarca. Shinapash, ñucanchicuna “pecadota rurashpaca, shuj ayudadortami charipanchi. Chai ayudadorca Taita Diospa ladopimi can. Chai ayudadorca Jesucristomi can. Paica alita rurajmi can” (1 Juan 2:1).

2.   Jesusca paipi ‘crishcata ricuchijcuna ama shujllapash tucuchi tucuchun, sino para siempre causachunmi’ huañurca (Juan 3:16).

    Taita Diosca Adandaca para siempre causachunmi rurarca. Shinapash, pecadota ruraimandaca Adanga huañunami tucurca. Adanba culpamanda “pecadoca cai mundopi tiai callarirca. Pecado tiashcamandami, huañuipash tiai callarirca. Shinami huañuica, tucui gentecunaman yalirca. Porque tucui gentecunami pecadota rurashcarca” (Romanos 5:12).

    Shinapash Jesús huañushcamandami paipi crishcata ricuchijcunaca pecadomanda, huañuimandapash salvari ushan. Bibliapica ninmi: “Imashinami pecadopa culpamanda gentecunaca huañunajun shinallatami Taita Dios ninanda juyashcamandaca sin culpa justocuna paipa ñaupapi ricurinajun. Chaimi gentecunaca, Señor Jesucristomanda para siempre causanata chasqui ushanga” nishpa (Romanos 5:21).

    Cunan punllacunapica pipash para siempreca na causanllu. Shinapash Taita Diosca ali gentecunamanga para siempre causaitami cusha nishca. Ashtahuanbash, Jesús huañushcamanda bendiciongunata chasquichunmi Taita Diosca huañushcacunatapash causachinga (Salmo 37:29; 1 Corintios 15:22).

3.   Jesusca ‘huañungacaman Taita Diosta tucuipi cazushpami’, maijan personapash ima jatun llaqui o problema ricurijpipash, huañungacaman Taita Diosta sirvi ushashcata ricuchirca (Filipenses 2:8).

    Adanba cuerpopash, yuyaipash pecado illaj perfectomi carca. Shinapash Adanga jariyashpami Taita Diosta na cazurca (Génesis 2:16, 17; 3:6). Jipamanga Taita Diospa contra Satanás Diabloca, imatapash cujpillami gentecunaca Taita Diosta sirvin, paicunapa causai peligropi cajpica Taita Diosta sirvinata saquingami nircami (Job 2:4). Jesusca pecado illaj cashpapash, llaquinaita sufrishpa huañuna cashpapash tucuipimi Taita Diostaca cazurca (Hebreos 7:26). Shinami, ima llaqui o problema ricurijpipash shuj persona tucuipi Taita Diosta cazui ushashcata ricuchirca.

Jesuspa huañuimanda tapuicuna

•   ¿Imamandata Jesusca gentecunata salvangapaca sufrina huañunapash carca? ¿Imashpata Taita Diosca Jesús huañuchun saquirca?

   Taita Diospa leypi nishcashnaca, “pecadomandami imatapash pagajpishna huañuita chasquinchi” (Romanos 6:23). Taita Diosca cai leytaca Adanman pacanapa randica, chai ley pactarina cashcatami intindichirca (Génesis 3:3). “Taita Diosca na llullanllu” (Tito 1:2). Chaimandami Adán pecadota rurajpica Taita Diosca paipa nishcata pactachirca. Adanga paipa huahuacunamanga na pecadotallachu yalichirca. Pecadomanda huañuitapashmi yalichirca.

   Pecadota rurashcamanda gentecuna huañuna cajpipash, Taita Diosca gentecunata ninanda juyaimandami salvarca (Efesios 1:7). Taita Diosca paipa Churigu cai Alpaman shamushca ñucanchimanda huañuchun cachamushpaca ñucanchita ninanda juyashcata, llaquishcatapashmi ricuchirca.

•   Jesusca ¿ima horata huañurca?

   Bibliapica Jesusca judiocuna Pascuata rurashca punllami ‘cazi las 3 de la tardeta’ huañurca nin (Marcos 15:33-37). Cunan punllacunapi utilizashca calendariopi ricujpica, 1 de abril del año 33​mi carca.

•   Jesusca ¿maipita huañurca?

   Jesustaca ‘Calavera shuti pushtupimi huañuchirca. Chai pushtutami hebreo shimipica Gólgota’ nin (Juan 19:17, 18). Jesuspa tiempopica cai pushtuca Jerusalén llactapa pircacuna canllamanmi carca (Hebreos 13:12). Talvez cai pushtuca shuj lomapimi cashcanga. Bibliapica Jesusta huañuchijushcataca carumanda ricui ushanallami carca ninmi (Marcos 15:40). Shinapash, cunanbica cai pushtu maipipacha cashcataca pipash na yachai ushanllu.

•   Jesusca ¿imashinata huañurca?

   Ashtaca gentecunaca Jesusca cruzpimi huañurca ninmi. Shinapash Bibliapica Jesusca “jatun racu caspipi clavai tucushpami ñucanchi pecadocunataca aparca” ninmi (1 Pedro 2:24). Bibliata escribijcunaca Jesusta imapi huañuchishcata parlangapaca griegopi staurós y xýlon shimicunatami utilizarca. Ashtaca estudiajcunaca, cai shimicunaca shuj poste o shuj jatun racu caspimi can ninmi. Ishcai caspihuan shuj cruzta rurashcataca na ninllu.

•   Jesús huañushcataca ¿imashinata yarina canchi?

   Jesusca Pascua tutatami paipa discipulocunahuan tandanajushpa shuj tandanajuita rurarca. Pascuataca judiocunaca cada huatami ruran carca. Chai tandanajuipica Jesusca paipa discipulocunataca: “Ñucata yarijushcata ricuchingapami cashna rurashpa catina capanguichi” nishpami mandarca (1 Corintios 11:24). Huaquin horascuna jipallami Jesustaca huañuchirca.

   Bibliata escribijcunaca Jesustaca ‘Pascua Fiestapi huañuchi tucuna maltun llamaguhuanmi’ chimbapurarca (1 Corintios 5:7). Pascua fiestapica esclavoshna causashcamanda Taita Dios salvashcatami israelitacunaca yarin carca. Cutin cunan tiempopica Jesuspa huañushcata yarinaca, Jesusta catijcunataca pecadomanda, huañuimanda salvarishcatami yarichin. Judiocunaca Pascuata huatapi shuj viajetallami 14 de nisán punllapi ruran carca (cai quillaca calendario lunar nishcapimi can). Jesusta punda catijcunapash Jesús huañushcataca huatapi shuj viajellami yarin carca.

   Cunan punllacunapipash mundo enteromanda ashtaca gentecunapash 14 de nisán punllatami Jesús huañushcata yarin.