Jesusca paipa causaita cushpami gentecunataca salvarca (Mateo 20:28). Chaimandami Bibliapica Jesustaca ‘cai alpapi causajcunata quishpichi o salvador’ nishpami yachachin (1 Juan 4:14). Shinallata Bibliapica ninmi “pipash na ñucanchitaca salvaita ushanllu porque ñucanchita salvangapaca cai alpapi gentepuracunamandaca nipita na Taita Diosca agllashcachu” (Hechos 4:12).

 Jesusca paipi tucui shunguhuan crijcunamanda o paipi feta charijcunamandami huañurca (Hebreos 2:9; Juan 3:16). Taita Diosca Jesustaca huañushcacunapa chaupimandami causachirca (Hechos 3:15). Chai jipami Jesusca espíritu cuerpohuan jahua cielomanga rirca. Jesusca jahua cielomandapachami “paimandalla Taita Diospajman quimirijcunataca causaita causaicaman quishpichi ushan. Paimi, Diosta paicunamanda mañangapaca causaita causajun” (Hebreos 7:25).

¿Jesús ñucanchimanda Taita Diosta mañachunga imamandata minishtinchi?

 Tucuicunami pecadorcuna canchi (Romanos 3:23). Pecadoca huañuimanmi apan shinallata pecadoca Taita Diospajman ama quimirichunmi shuj pirca cuenta jarcajun (Romanos 6:23). Shinallata Jesusca pai huañushcapi feta charijcunamandami Taita Dioshuan shuj abogado cuentami can (1 Juan 2:1). Jesusca paipa causaita ñucanchiman cushca cashcamandami Taita Dios ñucanchi mañaicunata uyachun, ñucanchi juchacunata perdonachunbashmi Jesusca Taita Diostaca mañaita ushan (Mateo 1:21; Romanos 8:34). Taita Dios munashcashna mañajpimi Jesuspa mañaicunataca Taita Dios uyan. Taita Diosca Jesustaca “cai pachapi causajcunaca, paimandalla quishpirichunmi cachamurca” (Juan 3:17).

¿Jesuspi crishpallachu salvarita ushanchi?

 Na. Na shinachu can. Salvaringapaj Jesuspi crina cashpapash chaillaca na minishtirinllu (Hechos 16:30, 31). Bibliapica ninmi: “Imashinami cuerpoca, alma illajpi ña huañun, chashnallatami crishcapash alita ruranacunata na pactachijpica, huañushcashna yanga tucun” (Santiago 2:26). Salvaringapaca caitami rurana canchi:

•   Jesusmanda, paipa Taita Jehová Diosmandapashmi yachajuna canchi (Juan 17:3).

•   Taita Diospi, Jesuspipashmi crina canchi (Juan 12:44; 14:1).

•   Taita Diospa mandashcacunata cazushpami feta charishcataca ricuchinchi (Lucas 6:46; 1 Juan 2:17). Jesusca nircami na ñucata “Señor” nishpa purijcunaca salvaringachu ashtahuangarin ñuca Taitapa mandashcata pactachicunallami salvaringa nircami (Mateo 7:21).

•   Ima llaquicunata charishpapash Taita Diospi feta charishcatami ricuchina canchi. Shinallata Jesusca nircami: “tucurimuicaman, llaquicunata apajcunallami quishpichi tucunga” (Mateo 24:13).