Juan Bautistaca Taita Diospa profetami carca (Lucas 1:76). Paica año 2 antes de la era comunbimi nacirirca. Cutin huañuitaca, año 32​pimi huañurca. Taita Diosmi Juanmanga, canmi Mesías o Cristo chayamuchunga ñanda listo saquina cangui nishpa mingarca. Chaimi Juanga, judiocuna cutin Taita Diospaman quimirichunga, Taita Dios imata nishcata paicunamanga villarca (Marcos 1:1-4; Lucas 1:13, 16, 17).

 Juan villachijpimi ali shunguta charij gentecunaca, Jesusca shamuna nishca Mesías cashcata cuenta japirca (Mateo 11:10). Chai gentecunataca, cangunapa pecadocunamandaca arripintirinami canguichi, bautizarishpami arripintirishcataca ricuchina canguichi nishpami Juanga nirca (Lucas 3:3-6). Juandaca ashtaca gentecunata bautizashcamandami, Juan Bautista nin carca. Juan Bautistami Jesustaca bautizarca (Marcos 1:9). a

Cai temapica cai tapuicunatami yachajushun:

•  ¿Imamandata Juan Bautistaca especial carca?

•  ¿Picunata Juan Bautistapa taitamama carca?

•  ¿Pipa culpamandata Juan Bautistaca huañurca?

•  ¿Juan y Jesusca envidiarinllu carca?

•  Bibliapica ¿mashna jaricunata Juan shutita charishca nin?

 Juan Bautistaca Bibliapi profeciata pactachimandami especial carca: Bibliapica Jehová Diosca shuj villaj o shuj mensajerotami cachamunga nishpami villajurca. Juanga predicashpami chai mensajero cashcata ricuchirca (Malaquías 3:1; Mateo 3:1-3). Juanmi “Jehová Diosta sirvingapaj listo cachun israelitacunataca” ayudarca. Juan predicajpimi chai tiempopi gentecunaca, Jehová Diospa principal representante Jesuspa mensajeta chasquingapaj listo carca (Lucas 1:17).

 Shuj shuj cosascunata ruraimandami especial carca: Jesusca nircami: “Gentecunapuramandaca Juan Bautistata yalica nipipash na tiashcachu. Shinapash jahua cielopi Taita Diospa Gobiernopica na yapa importante cajpashmi, Juandaca yali ashtahuan importante can” nircami (Mateo 11:11). Mateo 11:11​pi nishcashnaca, Juan Bautistapa punda nacirishca gentecunaca, nipi na Juan Bautistamanda yali ashtahuan importanteca tiarcachu. Juanga profeta cashpapash, shamuna nishca mensajeromi carca. Shinallata, Mateo 11:11​pi Jesús nishcashnaca Juanga na jahua cielopi Taita Diospa Gobiernopi mandagrinachu carca. b ¿Imamandata shina nipanchi? Cristo Jesusmi jahuan cieloman rina ñandaca pascashpa saquirca. Pero Juanga, Cristo Jesús nara ñanda pascashpa saquijpillatami huañurca (Hebreos 10:19, 20). Shinapash, Taita Diosta ali sirvij profeta Juan Bautistaca, Taita Diospa Gobierno mandajuj punllacunapimi causaringa. Shina causarishpami, paraíso alpagupi para siempre causana oportunidadta paica charinga (Salmo 37:29; Lucas 23:43).

 Juanba taitaca Zacarías shutimi carca. Cutin Juanba mamaca Elisabet shutimi carca. Zacariasca sacerdote judiomi carca. Taita Dios shuj milagrota rurajpimi Juanga nacirirca. ¿Imamandata shina nipanchi? Elisabetca huahuacunata charitaca na ushanllu carca. Ashtahuangarin Elisabet y Zacariaspash “ishcandimi ña mayorllagucuna carca” (Lucas 1:5-7, 13).

 Rey Herodes Antipasmi Juandaca cungata fitishpa huañuchichun mandarca. Pero ¿imamandata shina huañuchichun mandarca? Rey Herodesca judiomi cani ninmi carca. Juanga rey Herodesmanga nishcarcami: “Leypi nishcashnaca, canba huauquipa huarmihuanllata cazarashpaca, jatun nalitami rurajungui” nishpa. Shina nishcamandami rey Herodespa huarmi Herodiasca Juandaca odiaita odian carca. Chaimi paipa ushitaca, rey Herodestaca Juanba umata fitishpa cuhuai ni nishpa yachachirca. Chaimi Herodesca Juanba umata fitichun mandarca (Mateo 14:1-12; Marcos 6:16-19).

 Bibliapica Juan y Jesús envidiarinajushcataca na nijunllu (Juan 3:25-30). Juanga gentecuna uyajtami nirca, ñucaca Mesiaspami ñanda pascashpa saquina cani nishpa. Ashtahuangarin Juanga nircami: ‘Israel llactamanda gentecuna pai pi cashcata yachachunmi, gentecunataca yacupi bautizajushcani, paica Taita Diospa Churimi can’ nircami (Juan 1:26-34). Imashinami ricupanchi, gentecuna Jesusta ali uyanajujta yachashpaca Juanga ninandami cushijurca, na envidiajurcachu.