Bibliapica Mushuj Jerusalén shimica ishcai viajetami ricurin. Cai llactaca, Taita Diospa Gobiernopi jahua cielomanda Jesushuan mandangapaj rij discipulocunatami ricuchin (Apocalipsis 3:​12; 21:2). Bibliapica cai discipulocunataca Cristopa novia nishpapashmi rijsin.

1.   Mushuj Jerusalenga jahua cielopimi can. Bibliapica Mushuj Jerusalenmanda parlashpaca, jahua cielomandami urai shamujun ninmi. Chai llactapa pungucunataca angelcunami cuidajun (Apocalipsis 3:​12; 21:​2, 10, 12). Ashtahuanbash cai llactaca jatunbacha caimandami cai Alpapica na caita ushan. Mushuj Jerusalenga cuadradomi can. ‘Tucuillaca más o menos 2 mil 200 kilometrocunatami’ midin (Apocalipsis 21:16). a Ladocunaca más o menos 560 kilometrocuna altomi can.

2.   Mushuj Jerusalenga Jesuspa novia o Jesuspa huaquin agllashca discipulocunami can. Mushuj Jerusalendaca ‘novia, Maltun Llamagupa huarmi’ nishpami rijsin (Apocalipsis 21:9, 10). Cai chimbapuraipica Maltun Llamaguca Jesusmi can (Juan 1:29; Apocalipsis 5:12). ‘Maltun Llamagupa huarmi’ o Jesuspa noviaca, Jesushuan jahua cielopi tandanajuna discipulocunami can. Bibliapica Jesusmanda, agllashca discipulocunamanda parlashpaca shuj cusahuarmihuanmi chimbapuran (2 Corintios 11:2; Efesios 5:23-25). Ashtahuanbash cai llactapa muyundi pircacunapa cimientopa rumicunapica, ‘Maltun Llamagupa 12 apostolcunapa shuticunami escribishca tiajun’ (Apocalipsis 21:14). Caica Mushuj Jerusalén maijan cashcata intindichunmi ayudan. Jahua cieloman ringapaj agllashca discipulocunaca ‘apostolcunapa, profetacunapa cimiento jahuapi huasichishca huasishnami can’ (Efesios 2:20).

3.   Mushuj Jerusalenga shuj gobiernopa partemi can. Jerusalén llactaca Israel llactapa capitalmi carca. Jerusalenbimi rey Davidpash, paipa churi Salomonbash, paipa miraicunapash ‘Mandaj Dios cushca tiarinapi’ tiarishpa mandan carca (1 Crónicas 29:23). Shinaca, ‘Diospajlla Jerusalén’ llactaca Taita Diospa gobiernotami ricuchin carca. Chai llactamandami rey Davidpa miraicuna mandan carca (Nehemías 11:1). Mushuj Jerusalendaca ‘Taita Diospa separashca llacta’ nishpapashmi rijsin. Chaipi cajcunami Jesushuan jahua cielopi tandanajushpa ‘cai alpata mandanga’ (Apocalipsis 5:9, 10; 21:2).

4.   Mushuj Jerusalenga ashtaca bendiciongunatami gentecunaman apamun. Bibliapica Mushuj Jerusalenga “Taita Dios tiajuj jahua cielomandami urai shamurca” ninmi. Shinaca, Taita Diosca cai llactataca cai Alpapi ayudangapapashmi utilizan (Apocalipsis 21:2). Mushuj Jerusalenga Taita Diospa Gobiernohuanmi ricunata charin. Chai Gobiernomi Taita Diospa ‘munai jahua cielopishna cai alpapipash pactaripachun’ ayudanga (Mateo 6:10). Taita Diospa munai pactarijpica gentecunaca cai bendiciongunatami charinga:

   •   Pecadoca tucuringami. ‘Causaita cuj yacuta charij shuj rioca’ Mushuj Jerusalenmanda llujshishpami, ‘causaita cuj yuracunapa’ chaupita yalin. ‘Chai yurapa hojacunaca, gentecunata jambingapami can’ (Apocalipsis 22:1, 2). Gentecunata físicamente, espiritualmente jambijpimi pecadoca tucuringa. Shinami Taita Dios callarimanda munashcashna gentecunaca pecado illaj canga (Romanos 8:21).

   •   Gentecunaca Taita Diospa ñaupapi alimi ricuringa. Pecadoca Taita Diosmandami ñucanchicunataca caruyachishca (Isaías 59:2). Pecado tucuritapacha tucurijpica, cai profeciami pactaringa: “Taita Diospa tabernáculo carpa huasiguca gentecunahuanmi can. Taita Diosca paicunahuanmi causanga y paicunapashmi Taita Diospa llacta canga. Taita Diospachami paicunahuanga canga” (Apocalipsis 21:3).

   •   Llaquicunapash huañuicunapashmi tucuringa. Taita Diospa gobierno mandajpica, ‘gentecunapa ñavimandaca tucuilla viquitami fichachinga. Huañuipash nunca más ñana tiangachu. Ima llaquipash, huacaipash, ima nanaipash nunca más ñana tiangachu” (Apocalipsis 21:4).