Bibliapica santocunata rezanami canguichi nishpaimanga na yachachinllu. Jesuspa shutipimi Taita Diostalla mañana capanchi. Jesusca cashna nishpa mañana canguichi nircami: “Jahua pachapi tiajuj ñucanchi Taitalla, cambaj jucha illaj shutiguca, alicachi tucushca cachun” (Mateo 6:9). Jesusca shuj santota, shuj angelta o imatapash mañanami canguichi nishpaimanga na mandarcachu. Taita Diostallami mañana canguichi nishpami mandarca.

 Jesucristoca: “Ñucallami ñan cani. Na llullashpa villajmi cani. Causaita causagrinata carajpashmi cani. Ñuca Taitapajman ñuca na pushajpica, pipash na paillata chayai ushanllu” nircami (Juan 14:6). Jesús paipa causaita cushcamandami ñucanchicunaca Taita Diosta mañaita ushapanchi (Hebreos 7:25).

¿Taita Diostapash, santocunatapash mañanallachu canchi?

 Diez Mandamientocunapica Taita Diosca nircami: ‘Ñucami, canda Mandaj Taita Dios cani. Ñucapajlla cachun munaj Diosmi cani’ (Éxodo 20:5). ¿Imamandata ‘ñucapajlla cachun munaj Diosmi cani’ nin? Biblia de América nishca Bibliapa shuj notapica cai textotaca cashnami intindichin: “Taita Diosllami shujlla Taita Dios canga. Pai imasha cajtaca ima santopash na igualaita ushangachu” nijunmi. Taita Diosca paitalla mañachunmi munan. Shinami paitaca ali adorajushcataca ricuchi ushapanchi (Isaías 48:11).

 Shuj angelta o shuj santota orajushpaca Taita Diostami llaquichinajunchiman. Apocalipsis libropica apóstol Juan shuj angelta ricushpaca adorangapaj urai cumurishcatami nijun. Chaimi chai angelca cashna nishpa rimarca: “Ricui, na chashna ruranachu cangui. Ñucapash canshnallata, cambaj huauquicunashnallata, Diosta servijmi cani. Paicunaca, Jesús villajushca shimicunata aliguta catijcunami. Taita Diostallami ninanda alicachina cangui” nircami (Apocalipsis 19:10).