Éxodo 7:1-25
7 Chaimi Jehová Diosca Moisestaca nirca: “Ñucapa randi faraonhuan parlagrichunmi ñucaca canman autoridadta cushcani.* Canba propio huauqui Aaronmi canba shutipi villanga.*
2 Tucui ñuca imata mandashcatami Aaronmanga villana cangui. Chaimi paica faraonhuanga parlanga. Ultimopica israelitacuna chai llactamanda richunmi faraonga saquinga.
3 Cutin ñuca partemandaca faraonba shungu terco tucuchunmi saquisha. Ashtaca milagrocunatami Egipto llactapica rurasha.
4 Pero faraonga cangunata uyangapaca na munangachu. Shinapash ñucaca poderta charishcatami Egipto llactapica ricuchisha. Shinami na cuentai ushanalla, ñuca llacta israelitacunataca chaimanda llujchisha. Egipciocunata ninanda llaquichishpami paicunataca llujchisha.
5 Ñucaca egipciocunata castigashpami israelitacunataca paicunapa chaupimanda llujchigrini. Chaimi egipciocunaca Jehová pipacha cashcata yachanga” nirca.
6 Chaimi Moisés y Aaronga Jehová Dios imata mandashcata rurarca. Paicunaca Taita Dios nishcashnami rurarca.
7 Faraonhuan parlashca punllacunapica Moisesca 80 huatacunatami charirca. Cutin Aaronga 83 huatacunatami charirca.
8 Jehová Diosca Moisesta y Aarondaca nircami:
9 “Si cangunata faraón ‘shuj milagrota rurai’ nijpica, Aarondaca ninami cangui ‘canba vara caspita japishpa faraonba ñaupapi shitai’. Chaimi vara caspica shuj jatun culebraman tigranga” nirca.
10 Shina nijpimi Moisés y Aaronga faraonba ñaupaman rishpa, Jehová Dios tucui imata mandashcata rurarca. Chai jipami Aaronga, faraonba y paipa sirvientecunapa ñaupapi paipa vara caspita shitarca. Chai vara caspica shuj jatun culebramanmi tigrarca.
11 Chaimi faraonga consejerocunata, brujocunata y Egipto llactapi magiata ruraj sacerdotecunata cayachun cacharca. Paicunaca paicunapa magiahuanga lo mismotallatami ruranajurca.
12 Paicunaca cada unomi paicunapa vara caspita alpaman shitarca. Tucuilla caspicunami jatun culebracunaman tigrarca. Pero Aaronba culebrami* chaishujcunapa culebracunataca langarca.
13 Chaita ricushpapashmi faraonba shunguca terco cashpa catirca. Jehová Dios nishcashnami faraonga ni Moisestapash ni Aarondapash na cazurca.
14 Chaimi Jehová Diosca Moisestaca nirca: “Faraonga israelitacuna richunga na saquingapaj munajunllu. Paipa shunguca rumishna shinlli shinllimi can.
15 Cayapaca tutamandatami faraonda ricungapaj rina cangui. Paica Río Nilomanmi rigrijun. Paitaca Río Nilo manñapi shuyangui. Shinallata culebraman tigrashca caspitapash maquipi apashpa ringui.
16 Faraondaca ninami cangui: ‘Hebreocunapa Taita Dios Jehovami canmanga cashna nichun cachamuhuarca: “Ñuca llactataca desiertopi ñucata adorangapaj* richunmi saquina cangui”. Shina nijpipash ni cunangamanbash na cazushcanguichu.
17 Shinallata Jehová Diosca cashnami nin nipangui: “Ñuca imata ruragrijushcata ricushpami, ñucaca Jehová cashcata yachangui. Ñucaca* vara caspita utilizashpami Río Nilopi yacucunata huactagrini. Chaimi yacucunaca yahuarman tigranga.
18 Río Nilopi pescadocunaca huañungami. Yacupash ashna ashnami tucunga. Egipciocunaca Río Nilomanda yacuta ufiaitapash ñana ushangachu” ningui’” nircami.
19 Chai jipami Jehová Diosca Moisestaca nirca: “Aarondaca ningui: ‘Egiptopi tiashca yacucunaman, riocunaman, larcacunaman,* pantanocunaman y yacu tiashca tucui pushtucunaman señalashpa canba vara caspita japishpa maquita chutai. Shina rurajpimi tucuilla yacucuna yahuarman tigranga’. Egipto llacta enteropimi yahuar tianga. Hasta caspi tazongunapi y rumi mangacunapipashmi yahuarca tianga” nircami.
20 Chai ratomi Moisés y Aaronbash Jehová Dios tucui imata mandashcata rurarca. Aaronga, faraonba y faraonba sirvientecunapa ñaupapi vara caspita alzashpami Río Nilo yacucunataca huactarca. Chaimi Río Nilopa yacucunaca yahuarman tigrarca.
21 Pescadocunaca huañurcami. Río yacupashmi ashnai callarirca. Chaimi egipciocunaca Río Nilomanda yacutaca ñana ufiai usharca. Egipto llacta enteropimi yacucunaca yahuarman tigrarca.
22 Egiptopi magiata ruraj sacerdotecunapash magiahuanmi lo mismotallata rurarca. Chaimi faraonba shunguca terco tucurca. Jehová Dios nishcashnami faraonga Moisés y Aarón imata nishcataca na cazurca.
23 Chai jipami faraonga paipa huasiman tigrarca. Pai ricushca cosascunaca paitaca nimapi na afectarcachu.
24 Egipciocunaca Río Nilomanda yacutaca ñana ufiai usharcachu. Chaimi yacuta ufiangapaca Río Nilo muyundita allashpa yacuta llujchingapaj munanajurca.
25 Shinapash Jehová Diosca Río Nilopi yacucunataca yahuarmanmi tigrachishcarca. 7 punllacunacamanmi chai yacucunaca yahuarlla carca.
Notacuna
^ Hebreo shimipica “faraonbaca Dios shina cachunmi candaca churashcani” nijunmi.
^ Hebreo shimipica “canba profeta canga” nijunmi.
^ Hebreo shimipica “varami” nijunmi.
^ Hebreo shimipica “sirvingapaj” nijunmi.
^ Caipica Moisés y Aaronmi ñucapa randi parlajun nishpami shina nijun.
^ Caipica Río Nilopa larcacunamandami parlajun.
