1 Corintios 13:1-13
-
Juyaimi ashtahuan importante can (1-13)
13 Gentecunapa y angelcunapa idiomacunata parlashpapash, pero na juyaita charishpaca tsilin nijun campanashna, bulla bulla cimbaloshnami* caiman.
2 Si Taita Diospa villashcacunata intindichina ushaita charishpapash y Taita Dios pacalla charishca tucuilla secretocunata intindishpapash y tucuita yachashpapash, y urcucunata shuj pushtuman cuyuchingapaj shinlli feta charishpapash juyaita na charishpaca, nima na caimanllu.
3 Shujcunaman micunaguta carangapaj tucui ñuca ima charishcaguta carashpapash y jariyashca sintiringapaj ñuca causaita cushpapash, juyaita na charishpaca nimapa na sirvihuanmanllu.
4 Juyaita charijcunaca pacienciata charinmi, shujcunata llaquinmi, pitapash na envidianllu* na paillata alabarijunllu, na jariyanllu.
5 Na pingaipata portarinllu* na paipilla pensarinllu, na ñapash culiranllu, na risintirishcalla causanllu.*
6 Nali ruraicunahuanga na cushijunllu. Sino ali ruraicunahuanmi cushijun.
7 Juyaita charijcunaca tucuipimi pacienciata charin, tucuitami crin, tucuitami shuyan, tucuitami aguantan.
8 Juyaica nunca na tucurinllu. Shinapash Taita Diospa villashcacunata villana ushaita charinapash tucuringami. Shuj shuj idiomacunapi parlana ushaita charinapash tucuringami. Imata yachanapash tucuringami.
9 Porque ñucanchica na tucuita yachanchichu y Taita Diospa villachishcacunataca huaquindallami villanchi.
10 Pero ñucanchicuna tucuita yachajpi y Taita Diospa villashcacunata tucuita villai ushajpica, ashatalla yachanapash y Taita Diospa villashcacunamanda huaquindalla villanapash tucuringami.
11 Huahua cashpaca ñucaca huahuashnami parlan carcani. Huahuashnami pensan carcani y huahuashnami imatapash intindin carcani. Pero cunanga ñami jatun cani. Huahuashna canataca ñami huashaman saquishcani.
12 Cunanga jirru espejopishnami amsa amsata ricunajunchi. Pero jipamanga chimbapura ricujuj cuendami claro clarota ricushun. Cunanbica na tucuita yachapanichu. Pero jipamanga, imashinami Taita Diosca ñucata ali rijsihuan, shinallatami ñucapash tucuita yachapasha.
13 Shinapash feta charina, Taita Dios ayudanata shuyana y juyaita charinaca tiashpa catingami. Pero cai quimsacunamandaca juyaimi ashtahuan importante can.
Notacuna
^ Caica, musicata tocangapaj redondo ishcai platillocunashnami can. Chai ishcandi platillocunata huactajpica, rinrita fastidiarijtami huacan.
^ O “na celoso canllu”.
^ O “na grosero canllu”.
^ O “paita llaquichishcataca na imatapash cuentanshna yaria causanllu”.
