1 Pedro 5:1-14
5 Shinaca ñucapashmi anciano* capani. Cristo imashina sufrishcataca ricuparcanimi. Ñucapashmi quiquingunahuan igual alipi churai tucusha. Ñucaca quiquingunapurapi ancianocunatami cashna nishpa rogapani,
2 quiquinguna cuidachun churashca Taita Diospa llamagucunataca, aligutami cuidariana capanguichi. Ancianocuna* caimandami congregaciondaca* cuidana capanguichi. Pero na solo obligacionmandallachu cuidana capanguichi. Sino Taita Dios munashcashnami aliguman cuidana capanguichi. Culquita charinamandallapash na cuidanachu capanguichi. Sino tucui shunguhuanmi cuidana capanguichi.
3 Quiquingunaman mingashca Taita Diospa llamagucunapa patrongunaca, na tucunachu capanguichi. Sino, shuj ali ejemplotami llamagucunamanga ricuchina capanguichi.
4 Ashtahuan importante michij runagu ricurijpica na anguyana, alipacha coronatami quiquingunaca chasquinguichi.
5 Shinallata ashtahuan joven jaricunaca, ashtahuan edadta charij jaricunataca cazuna munaihuanmi cazuna capanguichi. Ashtahuanbash, shujcunataca humildadhuanmi tratana capanguichi. Porque Taita Diosca jariyajcunataca na cushijushpa ricunllu. Pero humildecunataca ninanda juyashpami* tratan.
6 Shinaca, ninan poderta charij Taita Diospa ñaupapica humildemi cana capanguichi. Chaimi Taita Diosca pai agllashca tiempopi quiquingunataca alipi churanga.
7 Shinallata ima preocupaciongunata charishpapash paimanmi tucuita saquina capanguichi. Porque paica, quiquingunamandaca ninandami preocuparin.
8 Shinallata aliguta pensarishpami catina capanguichi y rijchariashnami causana capanguichi. Porque quiquingunapa contra Diabloca, pitapash ansia micungapaj munashpa shinllita huacajuj leonshnami quiquingunataca muyuriajun.
9 Pero tucui shunguhuan crishpami, Diablopa contra shinlli shayarina capanguichi. Imashinami yachapanguichi, mundo enteropi huauquipanicunapashmi quiquingunashnallata sufrinajun.
10 Shinapash asha tiempota quiquinguna sufrishca jipami, quiquinguna aliguta sirvi ushachunga Taita Diosllata quiquingunataca ña yachachishpa saquinga. Ninanda juyaj Taita Diosca Cristomandami quiquingunataca para siempre paihuan punchapambapi cachun cayarca. Paimi quiquingunataca shinlli cachun, tucui shunguhuan sirvishpa catichun y shinlli shayarichunbash ayudanga.
11 Paica para siempre poderta charichun. Amén.
12 Quiquingunata animangapaj y Taita Dios quiquingunata ciertopacha ninanda juyashcata seguro cachunmi, shuj uchilla cartaguta escribipashcani. Taita Diosta tucui shunguhuan sirvij Silvano* huauquimi cai cartaguta escribishpa ayudahuarca. Taita Diospa ninan juyaitaca* nimamanda na saquinachu capanguichi.
13 Babilonia llactapi huarmigupashmi* quiquingunamanga saludocunata cachamupan. Paica quiquingunashnallata agllashcami can. Shinallata, ñuca churishna caj Marcospashmi saludocunata cachamupan.
14 Juyashcata ricuchishpami, caishuj chaishuj ñavipi muchashpa saludarina capanguichi.
Quiquingunaca Cristohuan shujllashnami capanguichi. Tucuicunallata tranquilo ali causaiguta charipanguichi.
Notacuna
^ O “superintendentecuna”. Glosariopi “superintendente” shimita ricupangui.
^ Glosariopi “congregación” shimita ricupangui.
^ Glosariopi “bondad inmerecida” shimita ricupangui.
^ O “Silas”.
^ Glosariopi “bondad inmerecida” shimita ricupangui.
^ Caipica “congregacionmandami” parlajun.
