1 Samuel 1:1-28
1 Efraín urcucunapica Ramataim-Zofim* pushtumanda shuj efraimita runami tiarca. Paica Elcaná shutimi carca. Paica Jeroham shuti runapa churimi carca. Jeroham runaca Elihú shuti runapa churimi carca. Elihú runaca Tohu shuti runapa churimi carca. Tohu runaca Zuf shuti runapa churimi carca.
2 Elcaná runaca ishcai huarmicunahuanmi* cazado carca. Shujca Ana shutimi carca y chaishuj huarmica Peniná shutimi carca. Peniná huarmica huahuacunataca charircami. Pero Ana huarmiguca ni shuj huahuata na charircachu.
3 Elcaná runaca cada huatami paipa llactamanda rishpa Siló llactaman Tucuilla Angelcunata Mandaj Jehová Diosta* adorangapaj y paiman ofrendacunata cungapaj rin carca. Siló llactapica Hofní y Finehás runacunami Jehová Diostaca sacerdotecuna shina sirvinajurca. Paicunaca Elí runapa churicunami carca.
4 Shuj punllaca Elcanaca shuj ofrendatami Taita Diosmanga curca. Chai ofrendamanda aichata japishpami paipa huarmi Peninaman y Peninapa tucuilla churicunaman y ushicunamanbash cararca.
5 Cutin Anata ninanda juyaimandami paimanga ashtahuan ali aichata cararca. Shinapash Jehová Diosca Ana huarmigu huahuacunata charichunga na saquishcarcachu.
6 Elcaná runapa chaishuj huarmi Peninaca, Ana huarmiguta nali sintichingapami paimandaca siempre burlarin carca. Jehová Dios Ana huarmigu huahuacunata charichun na saquishcamandami Peninaca shina nali sintichin carca.
7 Peniná huarmica cada huatami Ana huarmigutaca shina tratan carca. Jehová Diospa huasiman cada rishca horasmi Peninaca, Anamandaca ninanda burlarin carca. Chaimandami Ana huarmiguca huacashpa, micuitapash na micun carca.
8 Chaimi paipa cusa Elcanaca paitaca cashna nirca: “Ana ¿imashpata huacajunguiyari? ¿Imashpata na micunguiyari? Ama llaquilla caichu. ¿Nachu ñucaca 10 huahuacunata charinatapash yali mejor cani?” nircami.
9 Siló llactapi cashpami micushca y ufiashca jipa Anaca jatarirca. Chai ratoca sacerdote Elica Jehová Diospa tabernáculo huasi* pungu ladopimi shuj asientopi tiajushcarca.
10 Ana huarmiguca llaquillapacha cashcamandami huacai huacai Jehová Diostaca mañai callarirca.
11 Paica Taita Diostaca cashna nishpami prometirca: “Tucuilla Angelcunata Mandaj Jehová Dioslla.* Ñuca ninanda sufrijujtaca ricupayari. Ñucaca quiquinba sirvijmi capani. Ñucata yarishpa, ñucata na cungashpa shuj jari huahuaguta ñucaman carajpica paitaca canmanmi cupasha. Jehová Dioslla canda tucui vida sirvichunmi cupasha. Y paitaca nunca na ajchataca muchungachu” nishpami prometirca.
12 Chaipica Ana huarmiguca unaitami Jehová Diostaca mañajurca. Cutin Elí runaca Ana huarmigupa shimi imashna cuyurijujtami ricujurca.
13 Ana huarmiguca shungu ucupillami mañajurca. Shimi cuyurijuj ricurishpapash pai parlajujca na uyarircachu. Chaimi Elí runaca Ana huarmigutaca machashca can yashpa pensarca.
14 Elí runaca Anataca cashnami nirca: “¿Ima horacamanda machashcalla paragringui? Vinota ufianata ña saqui” nircami.
15 Chaimi Anaca cashna nishpa tigrachirca: “Ñuca amolla vinotapash, ni shuj tragocunatapash na ufiapashcanichu. Ñucaca ninandami sufrijupani. Chaimandami shungumanda Jehová Diosman tucuita villajupani.
16 Ñuca shuj nali huarmi cajtaca ama pensapaichu. Ñucaca ninandapacha llaquirishca caimanda y ninanda sufrijuimandami cai tucui tiempotaca shina mañajupashcani” nircami.
17 Chaimi Elí runaca “tranquila rilla, israelitacunapa Taita Dios quiquin mañashcata uyachun” nircami.
18 Shina nijpimi Ana huarmiguca “pagui ñucata llaquishcamanda” nirca. Chai jipami Anaca chaimanda rishpaca micurca y ñana llaquilla catircachu.
19 Cayandi punlla madrugadota jatarishpa Jehová Diosta adorashca jipami paicunaca paicunapa huasiman tigrarca. Paicunapa huasica Ramá llactapimi carca. Elcaná runaca paipa huarmi Anahuanmi pacta puñurca.* Shinallata Jehová Diosca Ana huarmigupa oraciondaca contestarcami.
20 Anaca vijsayumi quidarca. Y huata nara pactajpillatami* shuj jari huahuaguta ungurca. Ana huarmiguca “Jehová Diostami mañarcani” nishpami chai huahuagutaca Samuel* shutita churarca.
21 Tiempo jipaca Elcaná runaca paipa tucuilla familiandimi Jehová Diosman cada huata carana ofrendata carangapaj y juramentomanda ofrendata* carangapapashmi vichai rirca.
22 Pero Anaca na rircachu. Porque paipa cusamanga cashnami nirca: “Huahua chuchumanda partirijpimi Jehová Diosman presentangapaj apasha y chai punllamanda vichaica chaipimi quidanga” nircami.
23 Chaimi paipa cusa Elcaná runaca cashna nirca: “Canba ricuipi ima ali cajta rurailla. Huahua chuchumanda partiringacaman caipi quidailla. Can nishcataca Jehová Dios pactachichun” nircami. Shinami Ana huarmiguca huahua chuchumanda partiringacaman huasipi quidarca.
24 Huahua chuchumanda partirijpimi, Ana huarmiguca huahuahuan Siló llactaman vichai rirca. Shinallata quimsa huatata charij shuj torotapash, 24 libra* harinatapash y shuj jatun jarrapi vinotapashmi apashpa rirca. Anaca paipa huahuandimi Siló llactaman Jehová Diospa huasiman chayarca.
25 Chaipimi torotaca huañuchirca. Y huahuataca Elí runagumanmi aparca.
26 Ana huarmiguca cashnami Elí runagutaca nirca: “Ñuca amolla, ñucami quiquinba ladopi Jehová Diosta mañajushca huarmi capani.
27 Jehová Diostami cai huahuata carahuai nishpa mañarcani. Paimi ñuca mañashcata uyahuashca.
28 Y cunanmi Jehová Diosman entregapani.* Cai huahuaguca paipa tucui causaipimi Jehová Diostaca sirvipanga” nircami.
Chaipimi Elcaná runaca Jehová Diosta adorangapaj cungurirca.
Notacuna
^ O “Ramá llactamanda shuj zufita”.
^ Israelitacunapa tiempopica israelitacuna tauca huarmicunahuan cazarachunmi Taita Diosca saquirca. Pero Jesús shamushpaca Jehová Dios callarimanda churashcashnami cristianocunaca shujlla jarihuan y shujlla huarmihuan cazarana cashcata yachachirca (Gé 2:24; Mt 19:4-6ta ricupangui).
^ Hebreo shimipica “Jehová de los Ejércitos” nijunmi.
^ Hebreo shimipica “templo huasi” nijunmi. Glosariopi “tabernáculo huasi” shimita ricupangui.
^ Hebreo shimipica “Jehová de los Ejércitos” nijunmi.
^ O “relaciones sexualesta charirca”.
^ O talvez “tiempo pactajpimi”.
^ Cai shutica “Diospa shuti” nijunmi.
^ O “ofrenda de voto”. Glosariopi “ofrenda de voto” shimita ricupangui.
^ Hebreo shimipica “shuj efá” nijunmi. Apéndice B14ta ricupangui.
^ Hebreo shimipica “mañachipani” nijunmi.
