1 Samuel 11:1-15
11 Nahás shuti ammonita runaca paipa soldadocunandi Galaadpi tiaj Jabés llactahuan macanajungapaj vichai rishpami carpacunata shayachirca. Chaimi Jabés llactamanda jaricunaca Nahás runataca cashna nirca: “Ñucanchihuan shuj tratota* rurajpica ñucanchica candaca sirvishunmi” nircami.
2 Chaimi Nahás shuti ammonita runaca paicunataca cashna nishpa tigrachirca: “Tucuicunallata cangunapa ali lado ñavi lulunda llujchichun saquijpica cangunahuanga shuj tratota rurashallami. Shinami tucuilla israelitacunataca pingaipi saquisha” nircami.
3 Shina nijpimi Jabés llactata ñaupaman pushaj jaricunaca* cashna nirca: “Tucuilla Israel llactaman mensajerocunata cachangapaj 7 punllacunata shuyapai. Pero pipash ñucanchita salvangapaj na shamujpica ñucanchica canba sirvientecunami tucushun” nircami.
4 Saúl causajuj Guibeá* llactaman mensajerocuna chayashpaca tucui gentecunamanmi ima pasajushcata villarca. Chaimi tucuilla gentecuna ninanda huacai callarirca.
5 Saulca pambamandami huagracunahuan shamujurca. Saulca gentecunataca “¿imata pasashcayari? ¿Imashpata tucuicuna huacanajunyari?” nishpami tapurca. Shina tapujpimi Jabés llactamanda mensajerocuna ima nishcata villarca.
6 Chaita uyashca jipaca Taita Diospa espíritu santo* poderta cujpimi Saulca ninanda culirarca.
7 Chaimi ishcai torocunata huañuchishpa pedaziarca. Y chai pedazocunataca mensajerocunahuanmi tucui Israel llactaman cacharca. Mensajerocunaca “macanajuiman Saulta y Samuelta na catijpica cangunapa huagracunahuanbash chashnallatami pasanga” nishpami rinajurca. Chaita uyashpami israelitacunaca Jehová Diosta manllashpa,* shujllashna tucushpa* macanajungapaj llujshirca.
8 Saúl paicunata Bézec shuti pushtupi cuentajpica 300 mil israelita soldadocuna y Judá jatun familiamanda 30 mil soldadocunami tiarca.
9 Paicunaca shamushca mensajerocunataca cashnami nirca: “Galaadpi tiaj Jabés llactamanda jaricunamanga cashna ninguichi: ‘Caya ña chaupi punlla tucujujpimi* cangunataca salvashun’ ninguichi” nircami. Chaita uyashpami mensajerocunaca Jabés llactamanda jaricunaman villangapaj rirca. Chaita uyashpami paicunaca ninanda cushijunajurca.
10 Chaimi Jabés llactamanda jaricunaca ammonita gentecunataca cashna nirca: “Cayamandaca cangunapaj sirvientecunami tucushun. Ñucanchihuanga canguna munashcatami ruraita ushanguichi” nircami.
11 Cayandi punllami Saulca paipa soldadocunataca quimsa grupopi partirca. Ña punllayajujpimi* paicunaca ammonita gentecunapa shayachishca carpacunaman yaicushpa casi chaupi punllacaman ammonita gentecunata huañuchinajurca. Na huañushca ammonita gentecunaca cada unomi caiman chaiman pacajungapaj calpanajurca.
12 Gentecunaca Samueltaca cashnami ninajurca: “¿Picunata Saúl rey tucuchunga na munanajurca? Paicunata huañuchingapaj cunan rato entregaichi” ninajurcami.
13 Pero Saulca cashnami nirca: “Cunan punllaca pitapash na huañuchishunllu. Porque cunan punllaca Jehová Diosmi Israel llactataca salvashca” nircami.
14 Chai jipaca Samuelca israelitacunataca cashnami nirca: “Saúl reypacha cashcata cutinllata villangapaj Guilgal llactaman jacuchi” nircami.
15 Shina nijpimi tucuilla israelitacunaca Guilgal llactaman rishpa Jehová Diospa ñaupapi Saultaca rey cachun nombrarca. Chai jipami Jehová Diosmanga paihuan amigo cashpa catingapaj ofrendacunata* caranajurca. Shinallata Saulpash y tucuilla israelitacunapash ninanda cushijushpami celebranajurca.
Notacuna
^ O “pactota”.
^ Hebreo shimipica “Saulpa Guibeá” nijunmi.
^ Glosariopi “espíritu santo” shimita ricupangui.
^ Glosariopi “Taita Diosta manllana” shimita ricupangui.
^ O “tucuicuna shujlla yuyaita japishpa”.
^ Hebreo shimipica “indi ña cunuyachijujpimi” nijunmi.
^ Ña punllayajujpimi nishpaca casi 2 de la mañanamanda casi 6 de la mañanacaman horastami shina nijun.
^ O “ofrenda de paz”. Glosariopi “ofrenda de paz” shimita ricupangui.
