1 Samuel 12:1-25
12 Samuelca tucuilla israelitacunataca cashnami nirca: “Canguna mañashcashna rurashpami* cangunata gobernachunga shuj reyta churarcani.
2 Paimi cangunata gobernagrijuj* rey can. Ñucaca rucu, yura ajchapash jundami cani. Ñucapa churicunapash quiquingunapurapimi can. Ñucaca jovenmandapachami cunangaman cangunataca dirigishpa causajushcani.
3 Ñucaca caipimi cani. ¿Ima horapash shuj torota o shuj burrota pitapash quichushcanichu? ¿Pitapash umachishpa shuashcanichu o maltratashcanichu? ¿Shujcunapa lado tucushpa yangata juzgangapaj imatapash pacalla chasquishcanichu? Shina rurashca cajpica Jehová Diospa ñaupapi y pai agllashca reypa* ñaupapi juchachihuaichilla. Ñucaca pagapashallami” nircami.
4 Shina nijpimi paicunaca cashna nirca: “Quiquinga ñucanchitaca nunca na umachishpa shuashcanguichu, ni maltratapashcanguichu. Y pimandapash nimata na pacalla chasquishcanguichu” ninajurcami.
5 Chaimi Samuelca paicunataca cashna nirca: “Canguna ñucata imamanda juchachinatapash* na charishcataca cunanmi Jehová Diospash y pai agllashca reypash* testigocuna can” nircami. Shina nijpimi paicunaca “ari, paica testigomi can” ninajurca.
6 Chaimi Samuelca israelitacunataca cashna nirca: “Jehová Diosmi testigo can. Paimi Moisesta y Aaronda agllashpa cangunapa punda taitacunata Egiptomanda llujchirca.
7 Cunanga caiman shamuichi, cangunataca Jehová Diospa ñaupapimi juzgagrini. Cangunataca Jehová Dios cangunamanda y cangunapa punda taitacunamanda ima ali cosascunata rurashcata yaipi charishpami juzgagrini.
8 ”Jacobca Egipto llactamanmi chayarca. Pero tiempohuanga cangunapa punda taitacuna sufri callarishpami Jehová Diostaca ayudahuai nishpa rogai callarirca. Chaimi Jehová Diosca paicunata Egipto llactamanda llujchishpa caiman causangapaj apamuchun Moisesta y Aaronda cacharca.
9 Pero cangunapa punda taitacunaca paicunapa Jehová Diostaca cungarcami. Chaimi Taita Diosca paicunataca Hazor llactapa soldadocunata mandaj Sísara shuti runapa maquipi saquirca. Shinallata filisteocunapa maquipi y Moab llactapa reypa maquipipashmi saquirca.* Paicunaca cangunapa punda taitacunahuanmi macanajurca.
10 Chaimi paicunaca Jehová Diostaca ayudahuai nishpa roganajurca. Paicunaca cashnami ninajurca: ‘Jehová Dios, canda saquishpami Baal yanga dioscunata y Astoret shuti yanga dioscunata sirvishpa pecadota rurashcanchi. Pero cunanga canda sirvingapaj ñucanchi contracunapa maquimanda salvahuai’ nishpa roganajurca.
11 Chaimi paicunapa contracunapa maquimanda salvangapaca Jehová Diosca Jerubaal runata, Bedán runata, Jefté runata y ñucata* cacharca. Canguna tranquilo ali causachunmi shina rurarca.
12 Cangunaca ammonita gentecunapa rey Nahás cangunata atacangapaj shamujta ricushpaca cutin cutinmi ‘shuj reytami charingapaj munanchi’ nihuarcanguichi. Jehová Dios cangunapa rey cajpitami shina nihuanajurcanguichi.
13 Cunanga canguna mañanajushca y agllashca reyca caipimi can. Ricuichi Jehová Diosmi cangunata gobernachun shuj reyta nombrashca.
14 Tucui ali llujshichun munashpaca cangunaca Jehová Diostami adorana,* sirvina y paipa nishcacunatapash cazuna canguichi. Shinallata Jehová Diospa mandashcacunapa contrapash na tucunachu canguichi. Cangunapash y cangunata gobernajuj reypashmi cangunapa Jehová Diostaca sirvina canguichi.
15 Pero si Jehová Diospa nishcacunata na cazunguichi y Jehová Diospa mandashcacunapa contra tucunguichica, Jehová Diosca cangunata y cangunapa taitacunatapashmi castiganga.
16 Cunanga caiman shamuichi. Jehová Dios cangunapa ñaupapi imata ruragrijujta ricuichi.
17 ¿Nachu cai tiempoca trigota cosecha tiempo can? Pero Jehová Diostaca jahua cielota culunlla huacachishpa tamiachichunmi mañagrini. Chaita ricushpami cangunaca shuj reyta mañashpa, Jehová Diospa ricuipi nalitapacha rurashcata cuenta japinguichi” Samuelca nircami.
18 Shina nishca jipami Samuelca Jehová Diostaca rogashpa mañarca. Chaimi Jehová Diosca chai punllaca jahua cielota culunlla huacachishpa tamiachirca. Chaita ricushpami gulpi israelitacunaca Jehová Diosta y Samueltapash ninanda manllanajurca.
19 Chaimandami tucuilla israelitacunaca Samueltaca cashna ninajurca: “Pecadocunata rurashca jahuapash ñucanchica shuj reyta mañashpami ashtahuan nalitapacha rurashcanchi. Na huañungapaj munanchichu. Chaimanda quiquinba Jehová Diosta ñucanchi favor mañapai” ninajurcami.
20 Chaimi Samuelca israelitacunataca cashna nirca: “Ama manllaichichu. Ciertomi cangunaca cai tucui nalicunata rurashcanguichi. Pero cunanga Jehová Diosta sirvinataca ama saquichichu. Tucui shunguhuan Jehová Diosta sirvichi.
21 Taita Diosmanda caruyashpa imapapash na sirvij yanga dioscunataca ama mascanguichichu. Chai yanga dioscunaca pitapash salvangapaca podertaca na charinllu.
22 Jehová Diosca paipa sumaj shutimandami cangunataca na saquinga. Jehová Diosca canguna paipa llacta cachunmi agllashca.
23 Cutin ñuca partemandaca cangunamanda mañanataca na saquishachu. Cangunamanda mañanata saquishpaca Jehová Diospa contrami pecadota rurajuiman. Ñucaca cangunataca alita rurashpa causanatami yachachishpa catisha.
24 Pero cangunaca Jehová Diosta adorashpa,* paita na saquishpa* tucui shunguhuan sirvishpa causaichi. Taita Dios cangunamanda alipacha juyailla cosascunata rurashcata yaringuichi.
25 Pero nalitalla rurashpa catijpica canguna y cangunapa reypash tucuchi tucunguichimi” nircami.
Notacuna
^ Hebreo shimipica “canguna nishcata uyarcani” nijunmi.
^ Hebreo shimipica “cangunata ñaupashpa rijuj” nijunmi.
^ Hebreo shimipica “pai agllashcapa” nijunmi.
^ Hebreo shimipica “ñuca maquipica imatapash na tarishcanguichichu” nijunmi.
^ Hebreo shimipica “pai agllashcapash” nijunmi.
^ Hebreo shimipica “jaturca” nijunmi.
^ Hebreo shimipica “Samuelta” nijunmi.
^ Hebreo shimipica “manllana” nijunmi. Glosariopi “Taita Diosta manllana” shimita ricupangui.
^ Hebreo shimipica “manllashpa” nijunmi. Glosariopi “Taita Diosta manllana” shimita ricupangui.
^ O “ciertopacha”.
