1 Samuel 13:1-23
13 Saulca [?]* huatacunata charishpami rey tucurca. Paica ishcai huatacunatami Israel llactataca mandarca.
2 Saulca 3 mil israelita soldadocunatami agllarca. Paicunamandaca 2 mil soldadocunami Saulhuan Micmash shuti pushtupi y Betel urcucunapi carca. Cutin mil soldadocunaca Jonatán runahuanmi Benjaminbi tiaj Guibeá llactapi carca. Pero resto israelita soldadocunataca huasiman* tigrachunmi cacharca.
3 Chai jipaca Jonatanga Gueba shuti llactapi cashca filisteo soldadocunatami misharca. Y chaitami filisteo gentecunaca yachaj chayarca. Shinallata Saulca llacta enteropi cachocunata huacachishpa, “hebreocuna* caita uyaichi” nichunmi mandarca.
4 Tucuilla israelitacunami cai nishcata uyarca: “Saulca filisteo soldadocunatami mishashca. Chaimandami cunanga filisteocunaca israelitacunataca nimamanda na ricunayachin”* nishcata uyarca. Chaimi Guilgal llactapi Saulhuan tandanajuchun israelita jaricunataca cayarca.
5 Filisteo soldadocunapashmi israelitacunata atacangapaj tandanajurca. Paicunaca 30 mil guerrapa carretacunata y caballocunapi tiarishca 6 mil soldadocunatami charirca. Shinallata paicunaca ashtaca ashtaca soldadocunatapashmi charirca. Paicunaca mar manñapi arena cuenda ashtaca ashtacacunami carca. Paicunaca indi llujshimuj Bet-Aven shuti llacta ladopi, Micmash pushtuman vichai rishpami carpacunataca chaipi shayachirca.
6 Filisteo soldadocuna shina atacangapaj shamunajujta manllashpami israelitacunaca cuevacunapi, utujucunapi, jacacunapi y pozocunapi pacajunajurca.
7 Huaquin hebreocunaca Río Jordanda cruzashpami Gad y Galaad alpacunaman chayarca. Pero Saulca Guilgal llactapirami carca. Y paihuan quidashca soldadocunaca manllaimandami chujchunajurca.
8 Samuel chayasha nishca punlla pactaringacamanmi Saulca 7 punllacunata shuyajurca. Shinapash Samuel Guilgal llactaman na chayajpimi Saulpa soldadocunaca rinajurca.
9 Chaimi Saulca cashna nirca: “Rupachina ofrendata* y Taita Dioshuan amigo cashpa catingapaj ofrendacunata* cungapaj animalcunata apamuichi” nirca. Shinami Saulca rupachina ofrendata cui callarirca.
10 Shinapash rupachina ofrendata Saúl cushca jipallami Samuelca chayamurca. Chaimi Saulca Samuelta tuparishpa saludangapaj* llujshirca.
11 Chaimi Samuelca “¿imatata rurashcanguiyari?” nishpa Saultaca tapurca. Shina tapujpimi Saulca cashna nishpa tigrachirca: “Quiquin shamusha nishca punllapi na shamujpimi soldadocunapash ñucata saquishpa rinajurca. Shinallata filisteo soldadocunapash Micmash pushtupimi tandanajunajurca.
12 Chaimi ñucaca ‘filisteo soldadocunaca ñucata atacangapami Guilgal llactaman urai shamunga. Y Jehová Diospa ayudatapash na mañashcanichu’ nishpa pensarircani. Chaimandami rupachina ofrendataca maimandami cuna cani yashpa rurarcani” Saulca nircami.
13 Chaimi Samuelca Saultaca cashna nirca: “Canga nalitapachami rurashcangui. Canba Jehová Dios mandashcataca na cazushcanguichu. Can cazushca cajpica Jehová Diosca canbash y canba cati huahuacunapash* Israel llactata para siempre gobernachunmi saquinman carca.
14 Shinapash cunanga ñana ashtaca tiempota gobernashpa catigringuichu. Jehová Diosca paipa munaita ruraj personatami agllanga. Jehová Dios canman mandashcata can na rurashcamandami Jehová Diosca chai runata paipa llactata gobernachun churanga” nircami.
15 Chai jipami Samuelca Guilgal llactamanda llujshishpa Benjaminbi tiaj Guibeá llactaman vichai rirca. Cutin Saulca paihuan quidashca soldadocunatami contarca. Paihuanga más o menos 600 soldadocunami quidashcarca.
16 Saulpash, paipa churi Jonatanbash y paicunahuan quidashca soldadocunapash Benjaminbi tiaj Gueba llactapimi quidarca. Cutin filisteo soldadocunaca Micmash pushtupimi paicunapa carpacunataca shayachishcarca.
17 Filisteo soldadocuna shayachishca carpacunamandaca quimsa grupo soldadocunami llujshirca. Shuj grupoca Sual shuti alpacunamanmi Ofrá ñanda rinajurca.
18 Cutin shuj grupoca Bet-Horón llactapa ñandami rinajurca. Y chaishuj grupoca Zeboím pambacuna* ricurij fronteratami desiertoman rinajurca.
19 Filisteocunaca “hebreocuna espadacunata, lanzacunata rurachunga ama saquishunchichu” nishcarcami. Chaimandami tucuilla Israel llactapica fierrohuan trabajajcunaca na tiarcachu.
20 Chaimandami israelitacunaca paicunapa arado rejacunata, picocunata, hachacunata y hocescunata afilachunga filisteocunapaman urai rin carca.
21 Israelitacunaca arado rejacunata, picocunata, quimsa puntacunahuan rastrillocunata, hachacunata afilachun y tujsingapaj varacunata* arreglachunmi más o menos 8 gramosta pesaj platata* cun carca.
22 Macanajuna horasca Saulhuan y Jonatanhuan cashca soldadocunaca nipipash espadacunata y lanzacunataca na charircachu. Solo Saúl y Jonatanllami chaicunataca charin carca.
23 Shuj grupo filisteo soldadocunaca Micmash pushtupi tiaj huaicumanmi rishcarca.
Notacuna
^ Texto hebreopica Saulpa edadtaca na nijunllu.
^ Hebreo shimipica “paicunapa carpacunaman” nijunmi.
^ Israelitacunatami hebreocuna o hebreacuna nishpa rijsin carca. Glosariopi “hebreo” shimita ricupangui.
^ O “israelitacunaca millanaita ashnajuj cuenda tucushca”.
^ O “ofrenda quemada”. Glosariopi “ofrenda quemada” shimita ricupangui.
^ O “ofrenda de paz”. Glosariopi “ofrenda de paz” shimita ricupangui.
^ Hebreo shimipica “bendiciangapaj” nijunmi.
^ O “descendencia”.
^ O “Valle de Zeboím”.
^ Chai vara puntapica shuj fierro puntatami charin carca. Chaitaca huagracunata tujsingapami utilizan carca.
^ Hebreo shimipica “shuj pim” nijunmi. Cai medidataca punda tiempopimi utilizan carca. Apéndice B14ta ricupangui.
