1 Samuel 14:1-52
-
Jonatanga Micmash pushtupimi filisteocunata huañuchin (1-14)
-
Taita Diosca israelitacunapa contracunatami huañuchin (15-23)
-
Saulca na ali pensarishpallatami shuj juramentota rurachin (24-46)
-
Israelita soldadocunaca yahuarhuan aichatami micun (32-34)
-
-
Saúl macanajushca guerracuna. Saulpa familia (47-52)
14 Shuj punllaca Saulpa churi Jonatanga paipa espadata y lanzata apashpa purij ayudantetaca cashnami nirca: “Jacu, filisteo soldadocuna shayachishca carpacunaman chimbashunchi” nircami. Pero chaitaca paipa taitamanga na villarcachu.
2 Saulca Guibeá llacta canllapi, granadas jatun quiru* ucupimi quidajurca. Chaica Migrón shuti pushtupimi carca. Paihuanga 600 soldadocunami carca.
3 (Chai tiempopica Ahíya shuti sacerdotemi efod* nishca ropataca churajushca carca. Paica Ahitub shuti runapa churimi carca. Ahitub runaca Icabod shuti runapa huauquimi carca. Ahíya runaca Finehás runapa nietomi carca. Y Elí runapa bisnietomi carca. Elí runaca Siló llactapi Jehová Diospa sacerdotemi carca). Soldadocunaca Jonatán rishcataca na yacharcachu.
4 Filisteo soldadocuna shayachishca carpacunaman yalingapaca Jonatanga ishcai jatun jacacunatami yaligrijurca. Shuj jacaca Bozez shutimi carca, cutin chaishuj jacaca Sené shutimi carca.
5 Shuj jatun jacaca shuj columnashnami carca. Chaica norte ladoman Micmash shuti pushtu chimba ladopimi carca. Cutin chaishuj jatun jacaca sur ladoman Gueba shuti llacta chimba ladopimi carca.
6 Jonatanga paipa ayudantetaca cashnami nirca: “Jacu, Taita Diosta na sirvij* filisteo soldadocuna shayachishca carpacunaman yalishun. Ashtacacunahuan o ashallacunahuanlla salvachunga Jehová Diostaca imapash na jarcaita ushanllu. Chaimi Jehová Diosca talvez ñucanchitapash ayudanga” nircami.
7 Chaimi paipa ayudanteca cashna nirca: “Canba shungupi imata yuyashcata rurailla. Can maiman ringapaj munashpapash rilla. Can maiman rijpipash ñucaca canhuanmi risha” nircami.
8 Chaimi Jonatanga cashna nirca: “Jacu chai filisteocuna cashca pushtuman yalishun. Y paicuna ñucanchita ricuchunmi saquishun.
9 Ñucanchita ricushpa filisteocuna ‘ñucanchicuna cangunapaman chayangacaman chaipi quidaichi’ nijpica, chaipi quidashpami paicunapamanga na vichai rishun.
10 Pero paicuna ‘ñucanchihuan macanajungapaj vichai shamuichi’ nijpica vichai rishunllami. Porque chaica Jehová Dios paicunata ñucanchi maquipi entreganata ricuchij shuj señalmi canga” nircami.
11 Shinami Jonatán y paipa ayudantepash filisteo soldadocuna paicunata ricuchun saquirca. Chaimi filisteo soldadocunaca “ricuichi, hebreocunaca* paicuna pacajushca utujucunamandami llujshinajun” ninajurcami.
12 Shinallata carpacunamandaca filisteo soldadocunaca Jonatanda y paipa ayudantetaca cashnami ninajurca: “A ver ushashpaca ñucanchihuan macanajungapaj shamuichiyari” ninajurcami. Chaimi Jonatanga paipa ayudantetaca “jacu, Jehová Diosca paicunataca Israel llactapa maquipimi entregashca” nircami.
13 Chaimi Jonatanga paipa maquihuan, chaquihuan jacata vitsashpa rijurca. Y paipa ayudantepash catiriami vitsajurca. Jonatanga filisteo soldadocunataca atacashpami rijurca. Cutin Jonatán na huañuchishca filisteo soldadocunataca paipa ayudanteca huañuchishpami huashata catijurca.
14 Shina atacai callarishpaca ashata rijushpallatami* Jonatanbash y paipa ayudantepash 20 filisteo soldadocunata huañuchirca.
15 Chaimi shayachishca carpacunamanda filisteo soldadocunapash y jacapi cashca soldadocunapash ninanda manllarinajurca. Shinallata israelitacunata atacangapaj cachashca soldadocunapashmi ninanda manllarinajurca. Taita Diosmi alpata chujchuchirca y filisteo soldadocunatapash ninanda manllachirca.
16 Saulpa guardia soldadocunaca Benjaminbi tiaj Guibeá llactapimi carca. Paicunaca chai pushtumandami filisteo soldadocuna manllaimanda paicunapa carpacunapi alboroto caiman chaiman calpanajujta ricurca.
17 Saulca paihuan cashca soldadocunataca “picunalla rishcata yachangapaj listata japichi” nishpami mandarca. Listata japishca jipaca Jonatanbash y paipa ayudantepash illashcatami ricurca.
18 Chaimi Saulca Ahíya shuti sacerdotetaca “Taita Diospa* Arcata apamui” nishpa mandarca. (Chai tiempopica* Taita Diospa* Arcataca israelitacunami charinajurca).
19 Saúl runa Ahíya shuti sacerdotehuan parlajujpica filisteo soldadocunapa carpacunapica manllaimandami ashtahuan bullayai callarinajurca. Chaimi Saulca sacerdotetaca “saquilla, ña ama imatapash ruraichu”* nirca.
20 Chai jipami Saulpash paipa soldadocunapash tandanajushpa macanajuiman rirca. Chaiman chayashpaca filisteo soldadocuna paicunapurallata caita chaita espadahuan huañuchirinajujtami ricurca.
21 Huaquin hebreocunaca filisteo soldadocunapa parte tucushpami filisteocuna shayachishca carpacunaman vichai rishcarca. Chai hebreocunaca Saulhuan y Jonatanhuan cashca israelitacunahuanmi tandanajurca.
22 Shinallata Efraín urcucunapi pacajushca israelitacunapashmi filisteo soldadocuna pacajungapaj calpashpa rinajujta uyarca. Chaimi paicunapash macanajungapaj tandanajushpa filisteo soldadocunata catiria rirca.
23 Chai punllami Jehová Diosca israelitacunataca salvarca. Chai macanajuica Bet-Aven shuti llactacamanmi carca.
24 Shinapash chai punllaca israelita soldadocunaca imagutapash na micushcamandami shaijushcapacha carca. Porque Saulca cashna nishpami paicunataca juramentuchishcarca: “Nara chishayajpillata, ñucapa contracunamanda nara vengarijpillata pipash imatapash* micujpica chai persona maldici tucushca cachun” nishcarcami.
25 Chai jipaca israelita soldadocunaca bosquemanmi chayarca. Chaipica ashtaca mielmi tiarca.
26 Bosqueman yaicushpaca miel shutujujtami paicunaca ricurca. Pero Saúl rurashca juramentota manllaimandami nipipash mielta malingapaca na munarca.
27 Shinapash Jonatanga paipa taita imata soldadocunata juramentuchishcataca na uyashcarcachu. Chaimandami Jonatanga pai charijushca varata chutashpa vara puntataca miel tiajushca panalpi satirca. Jonatanga mielta malishpaca cutinmi fuerzata japirca.*
28 Chaimi shuj soldadoca Jonatandaca cashna nirca: “Quiquinba taitami ñucanchitaca ‘pipash cunan punlla micushpaca maldici tucushca cachun’ nishpa juramentuchirca. Chaimandami tucuicuna ninanda shaijushca can” nircami.
29 Chaimi Jonatanga cashna nirca: “Ñuca taitaca cai llactataca ninandami llaquichishca. Ricuichi ñucaca ashalla mielta malishpallatami cutin fuerzata japishcani.*
30 Cunan punlla israelita soldadocuna contracunata quichushca cosascunamanda libremente micushca cashpacarin ashtahuan filisteocunatami huañuchinman carca” nircami.
31 Chai punllaca israelita soldadocunaca filisteo soldadocunataca Micmash pushtumanda Ayalón llactacamanmi huañuchishpa rinajurca. Chaimi israelita soldadocunaca shaijushcacunapacha carca.
32 Chaimandami paicunaca macanajuipi quichushca llamacunata, vacacunata y shicucunata musparishpa apanajurca. Chaicunataca alpapi huañuchishpami yahuarhuan aichataca micunajurca.
33 Chaimi Saulmanga cashna nishpa villanajurca: “Ricui israelita soldadocunaca Jehová Diospa contrami pecadota ruranajun. Paicunaca yahuarhuan aichatami micunajun” ninajurcami. Chaimi Saulca cashna nirca: “Cangunaca jatun pecadotami rurashcanguichi. Uchaichi caiman shuj jatun rumita apamuichi” nircami.
34 Shinallata Saulca caitapashmi nirca: “Tucuilla soldadocunapaman rishpa cashna nichi: ‘Yahuarhuan aichata micushpa Jehová Diospa contraca ama pecadota ruraichichu. Cada uno paipa torota, paipa llamata apamushpa cai rumi jahuapi huañuchishca jipa micuchun’ ninguichi” nircami. Shina nijpimi chai tutaca cada uno paipa torota apashpa chaipi huañuchirca.
35 Y Saulca shuj altartami Jehová Diosmanga shayachirca. Chai altartami Saulca por primera vez Jehová Diosmanga shayachirca.
36 Chai jipaca Saulca cashnami nirca: “Filisteocunataca tuta catiria rishunchi. Paicunataca punllayagacaman gulpita huañuchishpa saquishunchi y paicuna charishca cosascunatapash quichushpa saquishunchi” Saulca nircami. Chaimi soldadocunaca “quiquinba ima ali cajta rurapailla” ninajurca. Chaimi sacerdoteca “cai asuntomandaca caipillata Taita Diostaca* tapushunchi” nirca.
37 Chaimi Saulca Taita Diostaca cashna tapurca: “¿Filisteocunata catiria urai rinachu cani? ¿Filisteocunataca israelitacunapa maquipichu churagringui?” nishpami tapurca. Shinapash chai punllaca Taita Diosca Saultaca na contestarcachu.
38 Chaimandami Saulca cashna nirca: “Soldadocunata mandajcuna shamuichi, cunan punlla pi pecadota rurashcata averiguaichi.
39 Israelitacunata salvashca causajuj Jehová Diospa shutipimi jurani, culpata charij personaca ñucapa churi Jonatán cajpipash huañunami can” nircami. Pero nipipash na imatapash nircachu.
40 Chai jipami Saulca tucuilla israelita soldadocunataca cashna nirca: “Cangunaca caishuj ladoman shayarichi. Cutin ñuca churi Jonatanbash y ñucapash chaishuj ladomanmi shayarishun” nircami. Shina nijpimi paicunaca “quiquinba ima ali cajta rurapailla” ninajurca.
41 Saulca Jehová Diostaca cashnami nirca: “Israelitacunapa Taita Dioslla Tumim* nishcahuan pi culpata charishcata ricuchipai” nircami. Shina nijpimi Jonatanbash y Saulpash agllai tucurca. Cutin chaishujcunaca libremi quidarca.
42 Chaimi Saulca “ñuca o ñuca churi Jonatán culpata charishcata yachangapaj sorteota ruraichi” nirca. Shina rurajpimi Jonatán agllai tucurca.
43 Chaimi Saulca Jonatandaca “¿imatata rurashcanguiyari? villahuai” nircami. Chaimi Jonatanga cashna nirca: “Ñuca maquipi charijuj vara puntahuanllami asha mielta malircani. Ñucata huañuchina cajpica huañushallami. Ñucaca caipimi cani” nircami.
44 Shina nijpimi Saulca cashna nirca: “Jonatán, can na huañuchi tucujpica Taita Diosllata ñucata llaquinaita castigahuachun” nircami.
45 Shina nijpimi soldadocunaca Saultaca cashna nirca: “¿Israel llactata salvashca cashpapashchu Jonatanga huañuna can? Chaica nimamanda na pasanachu can. Causajuj Jehová Diospa shutipimi juranchi, paica na huañuchi tucungachu.* Porque paica cunan punllaca tucuitami Taita Diospa ayudahuan rurarca” ninajurcami. Shinami soldadocunaca Jonatandaca huañuchi tucunamandaca salvarca.
46 Chaimi Saulca filisteo soldadocunata catiria rinata saquirca. Y filisteo soldadocunaca paicunapa alpacunamanmi tigrarca.
47 Rey Saulca tucuilla Israel llactatami gobernai callarirca. Paica paipa muyundipi tiashca tucuilla contracunahuanmi macanajurca. Paica moabita gentecunahuan, ammonita gentecunahuan, edomita gentecunahuan, Zobá pushtumanda reycunahuan y filisteocunahuanmi macanajurca. Saulca picunahuan macanajushpapash mishashpami saquin carca.
48 Saulca na manllashpa macanajushpami amalequita gentecunata misharca. Shinami israelitacunataca paicunapa contracunamanda salvarca.
49 Saulca Jonatán, Isví, Malki-Súa shuti churicunatami charirca. Shinallata ishcai ushicunatapashmi charirca. Mayor ushica Merab shutimi carca. Cutin menor ushica Mical shutimi carca.
50 Saulpa huarmica Ahinoam shutimi carca. Ahinoam huarmica Ahimáaz shuti runapa ushimi carca. Cutin Saulpa soldadocunata mandajca Abner shuti runami carca. Abner runaca Ner shuti runapa churimi carca. Abner runaca Saulpa tiomi carca.
51 Saulpa taitaca Quis shuti runami carca. Ner runaca Abner runapa taitami carca. Y Ner runaca Abiel shuti runapa churimi carca.
52 Saúl gobernajuj tiempopica filisteocunahuanga shinlli macanajuicunami tiarca. Chaimandami Saulca shinlli, na manllaj jarita ricushpaca paipa soldadocunapurapi cachun apan carca.
Notacuna
^ O “jatun yura”.
^ Chaitaca sacerdotecunami churajun carca y shuj delantal cuendami carca. Apéndice B5ta ricupangui.
^ Hebreo shimipica “circuncisionda na rurashca” nijunmi. Glosariopi “circuncisión” shimita ricupangui.
^ Israelitacunatami hebreocuna o hebreacuna nishpa rijsin carca. Glosariopi “hebreo” shimita ricupangui.
^ Más o menos shuj chaupi hectárea.
^ O “Dios verdadero”. Glosariopi “Dios verdadero” shimita ricupangui.
^ Hebreo shimipica “punllapica” nijunmi.
^ O “Dios verdadero”. Glosariopi “Dios verdadero” shimita ricupangui.
^ Hebreo shimipica “canba maquita anchuchi” nijunmi.
^ Hebreo shimipica “tandata” nijunmi.
^ Hebreo shimipica “ñavica punchayarca” nijunmi.
^ Hebreo shimipica “ñuca ñavica punchayarca” nijunmi.
^ O “Dios verdadero”. Glosariopi “Dios verdadero” shimita ricupangui.
^ Glosariopi “Urim y Tumim” shimicunata ricupangui.
^ Hebreo shimipica “paipa umamandaca ni shuj ajchallapash alpamanga na urmangachu” nijunmi.
