1 Samuel 15:1-35
15 Samuelca Saultaca cashnami nirca: “Jehová Diosca Israel llactapa rey tucuchun canda agllachunmi cachamuhuashca. Cunanga Jehová Dios canman imata nigrijujta uyai.
2 Tucuilla Angelcunata Mandaj Jehová Diosca* cashnami nin: ‘Amalequita gentecunataca israelitacunata imata rurashcamandami llaquichigrini. Paicunaca israelitacuna Egipto llactamanda llujshinajujpimi israelitacunataca atacarca.
3 Chaimanda amalequita gentecunahuan macanajungapaj ri. Paicunataca paicuna charishca tucuilla cosascunandi tucuchishpa saquingui. Pitapash causataca ama saquinguichu.* Jaricunata, huarmicunata, huahuacunata, llullu huahuacunata, torocunata, llamacunata, camellocunata, burrocunatapash huañuchishpa saquingui’ ninmi” nircami.
4 Shina nijpimi Saulca soldadocunata tandachishpa Telaim pushtupi paicunataca contarca. Chaipica 200 mil soldadocuna y Judá jatun familiamandaca 10 mil soldadocunami carca.
5 Saulca Amalec llactacaman chayashpami amalequita gentecunata atacangapaj, paipa soldadocunataca pamba laderacuna* ladopi pacajuchun mandarca.
6 Pero Saulca quenita gentecunataca cashnami nirca: “Cangunaca tucuilla israelitacuna Egipto llactamanda llujshinajujpica juyaihuanmi* tratarcanguichi. Chaimanda cangunatapash amalequita gentecunandi ama tucuchishpa saquingapaj paicunamanda caruyashpa richi” nircami. Shina nijpimi quenita gentecunaca amalequita gentecunamandaca anchurirca.
7 Chai jipami Saulca amalequita gentecunataca Havilá pushtumanda, Egipto ladopi tiaj Sur shuti pushtucaman huañuchishpa catijurca.
8 Tucuilla gentecunata espadahuan huañuchishpapash* Amalec llactamanda Agag shuti reytaca causatami japirca.
9 Saúl y paipa soldadocunaca Agag shuti reyta, ashtahuan ali jari y huarmi llamacunata, vacacunata y ashtahuan racu animalcunatapash na huañuchircachu. Shinallata tucui valishca cosascunahuanbashmi quidarca. Chaicunataca na tucuchishpa saquingapaj munarcachu. Pero na gushtashca y na sirvij tucuilla cosascunataca tucuchishpami saquirca.
10 Chaimi Jehová Diosca Samueltaca cashna nirca:
11 “Saulta rey cachun churashcamandaca llaquirinimi. Paica ñucata saquishpami ñuca mandashcacunatapash na cazushca” nircami. Chaimi Samuelca ninanda llaquirishpa tuta entero Jehová Diostaca ninanda mañajurca.
12 Cayandi punllaca Samuelca Saulhuan tuparingapami madrugarca. Shinapash Samueltaca cashnami ninajurca: “Saulca Carmelo llactamanmi rirca. Chaipimi paita yarichun shuj columnata shayachirca. Chai jipaca Guilgal llactamanmi urai rirca” ninajurcami.
13 Samuel Saulhuan ña tuparijpica Saulca cashnami nirca: “Jehová Dios quiquinda bendiciapachun. Ñucaca Jehová Diospa nishcataca cazushcanimi” nircami.
14 Pero Samuelca “shina cashpaca ¿imashpata llamacuna, vacacuna huacanajujta uyaniyari?” nishpami tapurca.
15 Chaimi Saulca cashna nirca: “Amalequita gentecunapami carca. Soldadocunami ashtahuan ali llamacunata, vacacunata quiquinba Jehová Diosman rupachishpa cungapaj causata saquirca. Pero chaimandaca tucuillatami tucuchishpa saquircanchi” nircami.
16 Shina nijpimi Samuelca Saultaca cashna nirca: “Upallai, Jehová Dios tuta imata nihuashcatami canmanga nigrini” nircami. Chaimi Saulca “nihuailla” nirca.
17 Samuelca cashnami nirca: “Israel llactapa jatun familiacunapa rey cachun Jehová Dios canda agllajpi, can na importante cani nishpa pensarishcataca ¿nachu yaringui?
18 Shinallata Jehová Diosca candaca cashna mandashpami cacharca: ‘Pecadota ruraj amalequita gentecunataca tucuchishpami saquina cangui. Paicunata tucuchitapacha tucuchishpa saquingacaman paicunahuan macanajuna cangui’ nircami.
19 Shinaca ¿imashpata Jehová Diospa nishcataca na cazurcangui? Chaipa randica musparishpami macanajuipi japishca cosascunahuan quidashpa canga Jehová Diospa ricuipica nalita rurashcangui” nircami.
20 Shinapash Saulca Samueltaca cashnami nirca: “Ñucaca Jehová Dios nishcataca cazurcanimi. Jehová Dios mandashcata pactachingapaj rishpami amalequita gentecunataca tucuchishpa saquircani. Amalec llactamanda Agag shuti reytapashmi apamurcani.
21 Soldadocunapash tucuchi tucuna cosascunamandaca ashtahuan ali llamacunata y vacacunatami quiquinba Jehová Diosman Guilgal llactapi rupachishpa cungapaj japirca” nircami.
22 Chaimi Samuelca cashna nirca: “Jehová Diosca ¿imata rurachunda gushtan? ¿Rupachina ofrendacunata* y shuj ofrendacunata cuchun o Jehová Diospa nishcata cazuchun? Cazunami shuj ofrendata cunatapash yali ashtahuan ali can. Shinallata cazunami llamacunapa virata cunatapash yali ashtahuan ali can.
23 Taita Diosta na cazunaca jipa punllacunapi ima pasanata adivinana pecadohuan igualllatami nalipacha can. Shinallata ñucanchi munashcata ruranaca magiata ruranahuan y terafim* santocunata adoranahuanbash igualllatami can. Canga Jehová Diospa nishcacunatami na cazurcangui. Chaimandami paica can rey cashpa catichunga ñana munan” nircami.
24 Chaimi Saulca Samueltaca cashna nirca: “Jehová Dios mandashcata y quiquin nishcata na cazushpami pecadota rurashcani. Gentecunata manllaimandami paicunapa nishcata rurarcani.
25 Por favor ñuca pecadomanda perdonahuai. Shinallata Jehová Diosta adorangapaj ñucahuan tigrapai” nircami.
26 Pero Samuelca Saultaca cashnami nirca: “Jehová Diospa nishcacunata na cazushcamandami canhuanga na tigrashachu. Cunanga Jehová Diosca can israelitacunapa rey cashpa catichunga ñana munanllu” nircami.
27 Samuel ña ringapaj tigrarijpimi Saulca Samuelpa sin mangas churajuna ropa puntapi huarcurirca. Shina huarcurijpimi chai sin mangas churajuna ropaca liquirirca.
28 Chaimi Samuelca cashna nirca: “Cai ropahuan pasashcashnallatami Jehová Diosca can Israel llactata gobernanataca quichushca. Y gobernachunga canda yali mejor personatami churanga.
29 Israel llactapa Jatun Taita Diosca pai rurasha nishcataca na cambiashpami* pactachinga. Porque Taita Diosca gentecunashnaca na cambianllu” nircami.
30 Shina nijpimi Saulca cashna nirca: “Ciertomi pecadota rurashcani. Pero por favor tucuilla israelitacunapa ñaupapi y ñaupaman pushaj jaricunapa* ñaupapi alipi quidangapaj alicachihuai. Jehová Diosta adorangapaj ñucahuan tigrapai” nircami.
31 Chaimi Samuelca Saulta catishpa tigrarca. Shinami Saulca Jehová Diosta adorarca.
32 Samuelca “Amalec llactapa Agag shuti reyta apamuichi” nircami. Chaimi Agag reyca de mala gana* Samuelpaman quimirirca. Porque Agag reyca “huañunamandaca ña quishpirircanimi” nishpami pensashcarca.
33 Shinapash Samuelca cashnami nirca: “Imashinami canba espadaca ashtaca huarmicunata huahuacuna illa saquirca, shinallatami canba mamaca huahuacuna illa quidanga” nircami. Shina nishca jipaca Samuelca Guilgal llactapi, Jehová Diospa ñaupapimi Agag reytaca cutin cutin espadahuan tujsishpa huañuchirca.
34 Chai jipami Samuelca Ramá shuti llactaman rirca. Cutin Saulca Guibeá llactaman paipa huasimanmi vichai rirca.
35 Samuelca pai huañuna punllacamanmi Saultaca cutinga ñana ricurcachu. Pero paica Saulmandaca llaquillapachami carca. Cutin Jehová Diosca Saulta Israel llactapa rey cachun churashcamandaca llaquirircami.
Notacuna
^ Hebreo shimipica “Jehová de los Ejércitos” nijunmi.
^ O “Pitapash ama llaquinguichu”.
^ O “amor leal”.
^ O “tucuchitapacha tucuchishpapash”.
^ O “ofrenda quemada”. Glosariopi “ofrenda quemada” shimita ricupangui.
^ O “na llaquishpami”.
^ O talvez “tranquilo”.
