1 Samuel 16:1-23
16 Tiempo jipaca Jehová Diosca Samueltaca cashnami nirca: “¿Ima horacamanda Saulmandaca llaquilla cagringui? Ñucallatami Israel llactapa rey cashpa catichunga ñana munarcani. Cachopi aceiteta jundachi. Chai jipaca Jesé shuti betlemita runata ricungapaj richunmi munani. Ñucaca paipa churicunamandaca shujtami rey cachun agllashcani” nircami.
2 Shinapash Samuelca cashnami nirca: “¿Imashinata rishayari? Rishcata yachaj chayashpaca Saulca huañuchihuangamari” nircami. Chaimi Jehová Diosca cashna nirca: “Shuj vaquillata apashpa rishpa ‘Jehová Diosman shuj ofrendata cungapami shamujuni’ ningui.
3 Ofrendata cungapaca Jesé runata invitangui. Chaipimi imata ruranataca villasha. Ñuca ricuchishca personatami ñucapa agllana cangui” nircami.
4 Samuelca Jehová Dios mandashcatami rurarca. Samuel Belén llactaman chayajta ricushpami chai llactata ñaupaman pushaj jaricunaca* manllaimanda ninanda chujchui callarirca. Chaimi paicunaca Samueltaca “¿imata pasajun?” nishpa tapurca.
5 Shina tapujpimi Samuelca cashna nirca: “Na imapash pasanllu. Jehová Diosman shuj ofrendata cungapami shamujupani. Shinaca ñucahuan ofrendata cugringapaj prepararichi” nircami. Jesé runa y paipa churicuna prepararishca jipami ofrendata cungapaj paicunataca tandachirca.
6 Paicuna chayajpica Samuelca Eliab runatami ricurca. Chaimi Samuelca “Jehová Diosca paitapachami agllashcanga”* nishpa pensarirca.
7 Pero Jehová Diosca Samueltaca cashnami nirca: “Pai juyailla y alto cajtallaca na ricunachu cangui. Paitaca na agllashcanichu. Ñucaca gentecunashnaca na ricunichu. Gentecunaca ñavi ricushcatallami ricun. Pero ñucaca gentecunapa shungutami ricuni. Ñucami Jehová Dios cani” nircami.
8 Jipaca Jesé runaca Abinadabta Samuel ricuchunmi cayarca. Shinapash Samuelca “Jehová Diosca paitapash na agllashcachu” nircami.
9 Chai jipaca Jesé runaca Samá shuti churitami Samuelpaman apamurca. Pero Samuelca “Jehová Diosca paitapash na agllashcachu” nircami.
10 Chaimandaca Jesé runaca paipa churicunamandaca 7 churicunatami Samuelpa ñaupaman apamurca. Shinapash Samuelca Jesetaca cashnami nirca: “Jehová Diosca paicunamandaca ni maijandapash na agllashcachu” nircami.
11 Chai jipami Samuelca Jesetaca “¿caicunallachu quiquinba churicuna capan?” nishpa tapurca. Chaimi Jeseca “uchilla huambragu faltapanrami. Paica llamacunatami michijupan” nircami. Chaimi Samuelca cashna nirca: “Chai huambraguta cayachun cachapai. Pai shamungacamanga na micungapaj tiarishunllu” nircami.
12 Shina nijpimi Jesé runaca paita mascachun cachajpi paitaca apamurca. Chai joven huambraguca ali ñavi, juyaillagumi carca. Jehová Diosca Samueltaca “jatari, paimi can. Paitami rey cachun agllashcani” nircami.
13 Chaimi Samuelca cachota japishpa Davidtaca paipa uma jahuapi paipa huauquicuna ricujta aceitetaca talirca.* Chai punllamandapachami Davidca Jehová Diospa espíritu santotaca* chasquirca. Chai jipaca Samuelca Ramá llactamanmi rirca.
14 Jehová Diospa espíritu santoca Saulmandaca anchurishcami carca. Ashtahuanbash Saúl nali pensamientocunahuan llaquichi tucuchunmi Jehová Diosca saquirca.
15 Saultaca paipa sirvientecunaca cashnami ninajurca: “Nali pensamientocunahuan quiquin llaquichi tucuchunmi Taita Diosca saquishca. Chaica ricunallami.
16 Ñucanchi amolla, por favor caipi cashca quiquinba sirvientecunataca arpata alipacha tocanata yachaj personata mascachun cachapai. Quiquinba nali pensamientocuna quiquinda llaquichijpica paimi arpata tocanga. Shinami quiquinga tranquilo sintiripangui” ninajurcami.
17 Chaimi Saulca paipa sirvientecunataca cashna nirca: “Shinaca arpata ali tocanata yachaj personata mascashpa apamuichi” nircami.
18 Saulpa shuj ayudanteca cashnami nirca: “Jesé shuti betlemita runapa churimi arpataca ali tocanata yachan. Paica alipacha macanajunata yachaj, na manllaj, ali parlanata yachaj y juyailla huambragumi can. Y Jehová Diosmi paihuan can” nircami.
19 Chaimi Saulca Jesé runamanga “llamacunata michij canba churi Davidta cachamupai” nichun mensajerocunata cacharca.
20 Shina nijpimi Jesé runaca tandaguta, vinohuan cara bolsata y shuj maltun chivoguta shuj burropi apachirca. Chaicunataca paipa churi Davidhuanmi Saulman cacharca.
21 Shinami Davidca Saulpaman rishpa paita sirvi callarirca. Saulca Davidtaca ninandami juyai callarirca. Davidca Saulpa ayudantemi* tucurca.
22 Chai jipaca Saulca Jeseman cashna nichunmi cacharca: “Por favor Davidtaca ñucapa trabajashpa catichun saquipai. Paihuanga cushijushcami cani” nircami.
23 Saulta paipa nali pensamientocunallata llaquichijujpica Davidca arpata japishpami tocan carca. Chaimi Saulca tranquilo, ali sintirin carca. Y paipa pensamientocunapash ñana llaquichishpa catinllu carca.
Notacuna
^ Hebreo shimipica “pai agllashcaca Jehová Diospa ñaupapimi can” nijunmi.
^ O “regarca”.
^ Glosariopi “espíritu santo” shimita ricupangui.
^ Caipi ayudante nishpaca soldadocunata mandajpa espadata, lanzata, escudota y shuj cosascunata apashpa ayudaj runamandami parlajun. Chai ayudantepashmi soldadocunata mandajhuan igual macanajun carca.
