1 Samuel 17:1-58
17 Filisteocunaca macanajungapami soldadocunataca tandachirca. Paicunaca Judapi tiaj Socó llactapimi tandanajurca. Filisteocunaca paicunapa carpacunataca Efes-Damim shuti pushtupimi shayachirca. Chaica Socó llactapi y Azecá pushtupimi carca.
2 Chaimi Saulpash y israelita soldadocunapash tandanajurca. Paicunaca Elá pambacunapimi* carpacunataca shayachirca. Filisteo soldadocunahuan macanajungapami listo shayarirca.
3 Filisteo soldadocunaca shuj urcupimi carca. Cutin israelita soldadocunaca chaishuj urcupimi carca. Paicunapa chaupipica pambacunami tiarca.
4 Filisteo soldadocuna shayachishca carpacunamandaca alipacha macanajunata yachaj Goliat shuti soldadomi llujshirca. Paica Gat llactamandami carca. Shinallata paica casi 3 metrostami* midin carca.
5 Goliatca bronce cascota y fierro chalecota* churajushcami carca. Chai fierro chalecoca 125 libracunatami* pesan carca.
6 Shinallata bronce canilleratashnami chaquimanda cunguricamanga churajushca carca. Y huashapica broncehuan rurashca lanzatami apajurca.
7 Paipa lanzaca tejedorcuna utilizaj viga caspishnami jatunbacha carca. Chai lanzapa puntaca 15 libracunatami* pesajurca. Goliatpa jatun escudota apaj soldadoca paita ñaupashpami rijurca.
8 Goliatca israelita soldadocunapa ñaupapi shayarishpami cashna caparirca: “¿Ima nishpata cangunaca macanajungapaj listo shayarishcanguichi? Ñucaca filisteocunapa partemanda macanajungapami shamushcani. Cangunaca Saulpa sirvientecunallami canguichi. Cunanga, cangunapuramanda shuj jarita ñucahuan macanajuchun agllaichi.
9 Pai ñucahuan macanajushpa ñucata vincijpica ñucanchicunaca cangunapa sirvientecunami tucushun. Pero si ñuca vincishpa gananica cangunami ñucanchipa sirvientecuna tucunguichi” nishpami caparijurca.
10 Shinallata Goliatca caitapashmi nirca: “Cunanmi israelita soldadocunamanda pi ñucahuan macanajungapaj shamujta ricusha.* Shinaca ñucahuan macanajuchun shuj jarita cachamuichi” nircami.
11 Saulpash y tucuilla israelitacunapash Goliatpa nishcata uyashpaca ninandapachami manllarinajurca.
12 Davidca Judapi tiaj Belén llactamanda Jesé shuti efrateo runapa churimi carca. Jesé runaca 8 churicunatami charirca. Saúl rey cajpica Jesé runaca mayorllami carca.
13 Jesé runapa quimsa mayor churicunaca Saulhuanmi macanajuiman rishcarca. Mayor churica Eliab shutimi carca. Segundo churica Abinadab shuti, cutin tercer churica Samá shutimi carca.
14 Davidca último churimi carca. Quimsandi mayor churicunaca Saulhuanmi rishcarca.
15 Davidca Saulta sirvijushpapash paipa taitapa llamacunata cuidangapami Belén llactamanga ri tigramui purin carca.
16 Goliatca* israelita soldadocunapa ñaupapimi cada tutamanda y cada chishi shayarin carca. Chai filisteoca 40 punllacunatami shina rurajurca.
17 Shuj punllaca Jesé runaca paipa churi Davidtaca cashnami nirca: “Por favor cai camllashca granohuan costalta* y cai 10 tandacunata japi. Chaicunataca soldadocuna carpacunata shayachishca pushtuman uchalla apashpa canba huauquicunaman cungui.
18 Cutin cai 10 quesocunataca* mil soldadocunata mandajman apangui. Canba huauquicunapash imashna cajta averiguangui. Paicuna ali cajta yachangapaj imatapash apamungui” nircami.
19 Davidpa huauquicunaca filisteo soldadocunahuan macanajungapami Elá pambacunapi* Saulhuan y tucuilla israelita soldadocunahuan carca.
20 Chaimi Davidca madrugadota jatarishpa llamacunata cuidachun mingashpa saquirca. Chai jipaca paipa taita Jesé mandashcashnami cosascunata japishpa rirca. Israelita soldadocuna shayachishca carpacunaman David chayajpica, soldadocunaca shinllita caparishpami macanajungapaj listo llujshinajurca.
21 Israelitacunapash y filisteo soldadocunapash macanajungapami frente a frente listo shayarirca.
22 Davidca paipa cosascunataca soldadocunapa cosascunata cuidajuj runahuan saquishpami macanajui pushtuman calpashpa rirca. Chaiman chayashpaca paipa huauquicunataca alillachu canguichi nishpami tapurca.
23 David paipa huauquicunahuan parlajujpimi alipacha macanajunata yachaj Goliat shuti soldado ricurirca. Paica Gat llactamanda filisteomi carca. Paica filisteo soldadocuna macanajungapaj listo shayarishca pushtumanda llujshishpami punda nishca shimicunatallata cutin nirca. Shina nijujtami Davidca uyarca.
24 Tucuilla israelita soldadocunaca Goliatta ricushpaca ninanda manllarishpami pacajungapaj calpanajurca.
25 Israelita soldadocunaca cashnami ninajurca: “Chai runa shamujujta ricuichi. Paica israelitacunamanda burlaringapami shamujun. Chai runata huañuchishpa saquij runamanga reyca ashtaca valishca cosascunata cusha y paipa ushihuanbash cazarachisha nircami. Shinallata reyca chai runapa taitapa familiapash Israel llactapica imapash obligaciongunamanda libremi quidanga nircami” ninajurca.
26 Davidca paipa ladopi cashca soldadocunataca cashnami tapurca: “Israelitacunamanda burlarijuj cai filisteota huañuchishpa saquij runaca ¿imatata japinga? Taita Diosta na sirvij* cai filisteoca causajuj Taita Diospa soldadocunamanda burlaringapaca ¿pita canyari?” nircami.
27 Chai soldadocunaca paicuna ña nishcatallata cutin nishpami caitapash nirca: “Chaicunatami chai filisteota huañuchij runamanga cunga” ninajurcami.
28 Davidpa mayor huauqui Eliabca, David chai soldadocunahuan parlajujta uyashpami culirashpa cashna nirca: “¿Imapata shamushcangui? Chai ashalla llamacunataca ¿pihuanda desiertopica saquircangui? Can jariyashca cashcataca alimi yachani. Canga imapash nali yuyaihuanmi shamushcangui. Macanajuita ricungapallami caimanga urai shamushcangui” nircami.
29 Chaimi Davidca “pero ¿imatata rurashcaniyari? Tapuitallamari tapujuni” nircami.
30 Chai jipaca paipa huauquimanda anchurishpami shujcunatapash chaitallata tapungapaj rirca. Chaimi paicunapash David ña uyashcatallata nirca.
31 Huaquingunaca David imata nijushcata uyashpami Saulman villangapaj rirca. Chaimi Saulca Davidta cayachun cacharca.
32 Davidca Saultaca cashnami nirca: “Chai filisteotaca nipipash na manllanachu can. Ñuca amolla, ñucami paihuan macanajungapaj llujshisha” nircami.
33 Pero Saulca Davidtaca cashnami nirca: “Canga huambrarami cangui. Chai filisteota vincitaca na ushanguichu. Paica jovenmandapachami soldado cashca” nircami.
34 Shina nijpimi Davidca Saultaca cashna nirca: “Ñuca amolla ñucaca ñuca taitapa llamacunatami michini. Shuj viajeca shuj león shamushpa, cutin shuj viajeca shuj oso shamushpami llamacunapuramandaca shuj llamata aparca.
35 Ñucaca paicunata catiria rishpa, atacashpami llamacunataca paicunapa shimimanda salvarcani. Ñucata atacajpica paicunapa quijadamanda* japishpami huañuchircani.
36 Ñuca amolla, ñucaca ñami shuj leonda y shuj osota huañuchishcani. Shinallatami Taita Diosta na sirvij* chai filisteotaca, causajuj Taita Diospa soldadocunamanda burlarishcamanda huañuchishpa saquisha” nircami.
37 Shinallata Davidca caitapashmi nirca: “Jehová Diosmi chai leonmanda y chai osomandaca salvahuarca. Shinallatami chai filisteopa maquimandapash salvahuanga” nircami. Shina nijpimi Saulca Davidtaca “rilla, Jehová Dios canda ayudachun” nirca.
38 Shinami Saulca paipa macanajungapaj ropata Davidmanga churachirca. Davidtaca bronce cascota y fierro chalecotami churachirca.
39 Chai ropata churajushca jipami Davidca espadata huatarishpa puringapaj intentarca. Pero chai tucui cosascunata churajuna costumbreta na charimandami na puri ushajurca. Chaimi Davidca Saultaca cashna nirca: “Cai cosascunata churajuna costumbreta na charimandami na cuyurita ushajuni” nircami. Chaimi Davidca chai cosascunata llujchishpa saquirca.
40 Chai jipami paipa vara caspita japishpa 5 llambu rumicunata huaicumanda* japingapaj rirca. Chai rumicunataca michina bolsopimi churarca. Chai jipami huaracata paipa maquipi chariria Goliatpaman* rirca.
41 Goliatpashmi* Davidpamanga ashtahuan quimiri callarirca. Y Goliatpa escudota apaj runaca paita ñaupashpami rijurca.
42 David juyailla, pucalla ñavi huambragu cajta ricushpami Goliatca paimanda asishpa burlari callarirca.
43 Chai filisteoca Davidtaca “¿shuj caspihuan ñucata atacai shamungapaca alcuchu cashcani?” nircami. Shinallata chai filisteo soldadoca paipa yanga dioscunapa shutipimi Davidtaca maldicirca.
44 Shinallata Davidtaca caitapashmi nirca: “Shamuyari, candaca huañuchishpami canba aichataca angacunaman y sacha animalcunaman cusha” nircami.
45 Chaimi Davidca chai filisteotaca cashna nirca: “Canga ñucahuan macanajungapaca shuj espadahuan y ishcai lanzacunahuanmi shamujungui. Pero ñucaca Tucuilla Angelcunata Mandaj Jehová Diospa* shutipimi canhuan macanajungapaj shamujuni. Canga Taita Diospa israelita soldadocunamandami burlarishcangui.
46 Cunanllatami Jehová Diosca candaca ñuca maquipi entreganga. Candaca huañuchishpami canba umataca cuchushpa saquisha. Cunanllatami filisteo soldadocunapa huañushca cuerpocunataca angacunaman y sacha animalcunaman cushpa saquisha. Shinami cai alpapi tucuilla gentecunaca Israel llactapi shuj Dios tiashcata yachanga.
47 Caipi cashca tucuillacunami* Jehová Dios ñucanchita salvangapaca espadacunatapash, lanzacunatapash na minishtijta yachanga. Cai macanajuica Jehová Diospami can. Paimi tucui cangunataca ñucanchi maquipi entreganga” nircami.
48 Chaimi Goliatca* Davidhuan macanajungapaj ashtahuan quimirirca. Cutin Davidca calpashpami paihuan macanajungapaj listo shayarirca.
49 Davidca paipa bolsomandami shuj rumita llujchirca. Chai rumitaca huaracahuan pigashpami chai filisteopa frentepi chayachirca. Chai rumi filisteopa frentepi clavarishca quidajpimi paica uraisinga urmarca.
50 Shinami Davidca shuj huaracahuan y shuj rumihuan chai filisteotaca vincirca. Davidca espada illa cashpapashmi chai filisteota mishashpa, huañuchishpa saquirca.
51 Davidca calpashpa rishpami chai filisteopa jahuapi shayarirca. Shinallata chai filisteota huañuchishpapacha saquingapaj munashpami chai filisteopa espadata llujchishpa paipa umata cuchushpa saquirca. Filisteo soldadocunaca paicunapa alipacha shinlli soldado huañushcata ricushpaca pacajungapami calpashpa rinajurca.
52 Chaita ricushpami israelita soldadocuna y Judá jatun familiamanda soldadocunaca caparishpa filisteo soldadocunata catiria rirca. Paicunaca filisteo soldadocunataca pambacunamanda Ecrón llacta pungucunacamanmi catiria rirca. Filisteo soldadocunataca Saaraim llactaman rina ñandami huañuchishpa catinajurca. Filisteo soldadocunapa huañushca cuerpocunataca Gat y Ecrón llactacunacamanmi ricui usharijurca.
53 Filisteo soldadocunata ninanda catiria rishca jipaca, tigramushpami israelitacunaca filisteo soldadocuna shayachishca carpacunapi tiashcacunata aparca.
54 Davidca Goliatpa* umataca Jerusalenmanmi apashpa rirca. Pero chai filisteopa espadata y shuj cosascunataca Davidca paipa carpapillatami alichishpa* saquirca.
55 David Goliathuan* macanajungapaj llujshijta ricushpami Saulca soldadocunata mandaj Abnertaca, “Abner ¿chai jovenba taitaca pitayari?” nishpa tapurca. Chaimi Abnerca “ñuca reylla cabalta nishpaca na yachapanichu” nircami.
56 Shina nijpimi rey Saulca Abnertaca cashna nirca: “Chai jovenba taita pi cajta averiguai” nircami.
57 Goliatta* huañuchishpa David tigramushcandimi Abnerca, Davidtaca Saulpa ñaupaman aparca. Davidca Goliatpa umataca maquipimi apajurca.
58 Saulca Davidtaca “canba taitaca ¿pita can?” nishpami tapurca. Chaimi Davidca “ñucaca quiquinda sirvij Jesé shuti betlemita runapa churimi capani” nircami.
Notacuna
^ O “Valle de Elá”.
^ Hebreo shimipica “6 codos y shuj palmo” nijunmi. Apéndice B14ta ricupangui.
^ Fierro chalecoca, cuerohuan o telahuan rurashcami cashcanga. Y pescadopa escamacuna cuendami fierro pedazocunaca chalecopi en fila churashca carca.
^ Hebreo shimipica “5 mil siclos” nijunmi. Apéndice B14ta ricupangui.
^ Hebreo shimipica “600 siclos” nijunmi. Apéndice B14ta ricupangui.
^ O “burlarini”.
^ Hebreo shimipica “chai filisteo” nijunmi.
^ Hebreo shimipica “shuj efá” nijunmi. Apéndice B14ta ricupangui.
^ Hebreo shimipica “cai 10 pedazo de lechetaca” nijunmi.
^ O “Valle de Elá”.
^ Hebreo shimipica “circuncisionda na rurashca” nijunmi. Glosariopi “circuncisión” shimita ricupangui.
^ Hebreo shimipica “barbasmanda” nijunmi.
^ Hebreo shimipica “circuncisionda na rurashca” nijunmi. Glosariopi “circuncisión” shimita ricupangui.
^ Hebreo shimipica “chai filisteopaman” nijunmi.
^ Hebreo shimipica “chai filisteo” nijunmi.
^ Hebreo shimipica “Jehová de los Ejércitos” nijunmi.
^ Hebreo shimipica “Tucui congregacionmi” nijunmi.
^ Hebreo shimipica “chai filisteo” nijunmi.
^ Hebreo shimipica “chai filisteo” nijunmi.
^ O “huacaichishpa”.
^ Hebreo shimipica “chai filisteo” nijunmi.
^ Hebreo shimipica “chai filisteo” nijunmi.