1 Samuel 18:1-30
18 Jonatanga, Davidta Saulhuan parlajta uyashca jipaca Davidhuanga alipacha amigocunami tucurca.* Jonatanga pai juyarinshnallatami Davidtaca juyai callarirca.
2 Chai punllamandapachami Saulca Davidtaca paihuan quidachirca. Shinallata Davidtaca paipa taitapa huasiman tigrachunga na saquircachu.
3 Jonatanga pai juyarinshnallatami Davidtaca juyarca. Chaimi paica Davidhuanga shuj tratota* rurarca.
4 Jonatanga paipa sin mangas churajuna ropata llujchirishpami Davidmanga curca. Shinallata paipa macanajungapaj ropatapash, paipa espadatapash, paipa arcotapash y paipa cinturaspi huatarinatapashmi Davidmanga curca.
5 Davidca macanajuimanmi llujshi callarirca. David macanajuchun Saúl maiman cachajpipash tucuimi siempre ali llujshin carca.* Chaimandami Saulca soldadocunapa mandaj tucuchun Davidtaca churarca. Chaihuanga Saulpa sirvientecunapash y tucuilla israelitacunapash de acuerdomi carca.
6 Davidpash y soldadocunapash filisteo soldadocunata mishashca jipa tigranajujpica, Israel llactamanda tucuilla ladocunamandami huarmicunaca rey Saulta tuparingapaj llujshin carca. Chai huarmicunaca candashpandi, bailashpandimi cushijushca llujshin carca. Shinallata panderetacunandi y shuj tocana instrumentocunandimi llujshin carca.
7 Huarmicunaca cushijuimandami cashna candanajurca:
“Saulca mil contracunatami huañuchishca.Cutin Davidca 10 mil contracunatami huañuchishca” ninajurcami.
8 Shina candanajujta nimamanda na gushtashpami Saulca ninandapacha culirarca. Saulca cashnami pensarijurca: “Davidca 10 mil contracunatami huañuchishca, cutin ñucaca solo mil contracunatallami huañuchishcani ninajunmi. Solo paicunapa rey cachun churanallami faltan” nishpami pensajurca.
9 Chai punllamandapachami Saulca Davidpica ñana confiarca.
10 Cayandi punllapaca Saultaca paipa nali pensamientocunallata llaquichichunmi Taita Diosca saquirca. Chaimandami Saulca huasipica locoshna portari callarirca.* Shuj viajecunashna David arpata tocajuj horasmi Saulca shina portari callarirca. Chaipimi Saulca maquipi charijuj lanzata
11 Davidmanga shitarca. Saulca “paitaca pircapimi clavashpa saquisha” nishpami pensarirca. Saulca ishcai viajetami shina rurarca. Pero chai ishcai viajecunatami Davidca escaparirca.
12 Saulca Jehová Dios Davidta ayudajujta ricushpami Davidtaca manllai callarirca. Taita Diosca Saulmandaca anchurishcami carca.
13 Chaimandami Saulca Davidtaca mil soldadocunapa mandaj cachun churashpa caruta cacharca. Davidmi macanajuicunapica soldadocunataca dirigin carca.*
14 Jehová Dios Davidta ayudajushcamandami Davidca imata rurashpapash ali yuyashpa ruran carca.
15 David tucuita alipacha rurajta ricushpami Saulca Davidtaca manllai callarirca.
16 Davidca macanajuicunapica alimi ñaupaman pushan carca. Chaimandami tucuilla israelitacuna y Judapa jatun familiamanda gentecunapash Davidtaca juyan carca.
17 Saulca Davidtaca cashnami nirca: “Na manllashpa ñucata sirvishpa catichun y Jehová Diospa macanajuicunapipash macanajushpa catichunmi candaca mañani. Shina rurajpica canhuan cazarachunmi ñucapa mayor ushi Merabta cusha” nircami. Saulca cashnami pensarijurca: “Ñuca propio maquihuanga na huañuchishachu, mejor filisteocunapa maquipi huañuchunmi saquisha” yajurcami.
18 Shinapash Davidca Saultaca cashnami tapurca: “Ñuca reylla, quiquinba masha tucungapaca ñucaca ¿pita caniyari? Ñuca taitapa familiapash Israel llactapica na importantechu can” nircami.
19 Shinapash Saulpa ushi Merabta Davidhuan cazarachina horas chayajpica, Saulca Merabtaca ñami Adriel shuti meholatita runahuan cazarachishcarca.
20 Shinapash Saulpa chaishuj ushi Micalca Davidmanda enamorarishcami carca. Chaita Saulman villajpica Saulca cushillami sintirirca.
21 Chaimi Saulca cashna pensarca: “Cunansi Davidtaca huañuchi ushashami. Filisteocunapa maquipi huañuchunmi Davidtaca ñuca ushihuan cazarachisha” yajurcami. Chaimandami Saulca cutinllata Davidtaca “cunanmi ñuca masha tucugringui” nirca.
22 Shinallata Saulca paipa sirvientecunamanga cashnami mandarca: “Davidtaca pacalla cashna ninguichi: ‘Reyca canhuanga cushillapachami. Paipa sirvientecunapash candaca juyanmi. Reypa masha tucuilla’ ninguichi” nircami.
23 Saulpa sirvientecuna shina nijpimi Davidca cashna nirca: “¿Cangunaca reypa masha tucuna fácil can yanguichichu? Ñucaca pobremari cani. Importantepash na canichu” nircami.
24 David shina nishcatami Saulpa sirvientecunaca Saulman villarca.
25 Shinapash Saulca filisteocunapa maquipi David huañuchun munaimandami paipa sirvientecunataca cashna mandarca: “Davidmanga cashna ninguichi: ‘Reyca paipa ushimanda pagachunga 100 filisteocunata huañuchishcata ricuchij imapash señalta* apamuchunllami mañajun. Shinami paipa contracunamanda vengaringa’ ninguichi” nircami.
26 Saulpa sirvientecuna shina villajpimi Davidca reypa masha tucunata alicachirca. Chaimandami reyman pagana tiempo nara tucurijpillata
27 Davidca paipa soldadocunahuan llujshishpa 200 filisteocunata huañuchirca. Shinami Davidca reypa masha tucui ushangapaj chai filisteocunata huañuchishcata ricuchij señalta reymanga apamurca. Chaimi Saulca paipa ushi Micaltaca Davidpa huarmi tucuchun curca.
28 Saulca Jehová Dios Davidhuan cashcata y paipa ushi Micalpash Davidta juyajtami cuenta japirca.
29 Chaimi Saulca Davidtaca ashtahuan manllai callarirca. Shinallata Saulca toda la vidami Davidtaca contrashpa causarca.
30 Filisteocunata mandajcuna macanajungapaj llujshijpica Davidca siempremi mishan carca. Saulpa soldadocunata yalimi mishashpa saquin carca. Chaimi Davidca ninanda respetai tucurca.
Notacuna
^ O “Jonatanba almaca Davidpa almahuanmi huatarishcashna quidarca”. Glosariopi “alma” shimita ricupangui.
^ O “pactota”.
^ O “ali yuyashpami imatapash ruran carca”.
^ O “profetashna portarirca”.
^ Hebreo shimipica “gentecunapa ñaupamanda llujshin y yaicun carca” nijunmi.
^ Hebreo shimipica “filisteo jaricunapa parte pundamanda aicha carata” nijunmi.
