1 Samuel 19:1-24
19 Tiempohuanga Saulca paipa churi Jonatanman y paipa tucuilla sirvientecunamanmi Davidta huañuchingapaj munajushcata villarca.
2 Shinapash Jonatanga Davidta ninanda juyaimandami paimanga tucuita villarca. Davidmanga cashnami nirca: “Ñuca taitaca candaca huañuchingapami munan. Por favor, caya tutamandaca cuidadotami charina cangui. Maipi pacajunata mascashpapash chaipimi quidana cangui.
3 Ñucaca, ñuca taitahuanmi pambaman llujshigrinchi. Y can pacajushca ladollami cagrinchi. Paimanga canmandami parlasha. Imatapash yachaj chayashpaca sin faltami canmanga villasha” nircami.
4 Jonatanga paipa taita Saulmanga Davidmandaca alicunatami parlarca. Saulmanga cashnami nirca: “Ñuca reylla, quiquinda sirvij Davidtaca ima nalitapash* na ruranachu capangui. Davidca quiquindaca ima nalitapash na rurashcachu. Paica imata rurashpapash quiquinba alipallatami rurashca.
5 Davidca paipa causaitapash* peligropi churashpami chai filisteotaca huañuchirca. Shina rurashcamandami Jehová Diosca tucuilla israelitacunataca salvarca. Quiquinllatami chaita ricushpaca ninanda cushijurcangui. Shinaca ¿imashpata Davidta huañuchishpa pecadota ruragringui? Paica ima nalitapash na rurashcachu. Paita huañuchishpaca sin culpa runapa yahuartami jichajunguiman” nircami.
6 Jonatanba nishcata cazushpami Saulca cashna nishpa jurarca: “Davidtaca na huañuchishachu. Causajuj Jehová Diospa shutipimi jurani” nircami.
7 Chai jipami Jonatanga Davidta cayashpa paimanga tucuita villarca. Chaimi Davidtaca Saulpaman aparca. Y Davidca cutinmi Saultaca pundashnallata sirvijurca.
8 Tiempohuanga cutinmi guerra tiai callarirca. Chaimi Davidca filisteocunahuan macanajungapaj llujshishpa ashtaca ashtaca filisteocunata huañuchirca. Filisteocunaca Davidmanda pacajushpami calpanajurca.
9 Shuj punllaca Saulca paipa huasipimi lanzata chariria tiajurca. Cutin Davidca arpatami tocajurca. Shinapimi Jehová Diosca Saultaca paipa nali pensamientocunallata llaquichichun saquirca.
10 Chaimi Saulca Davidtaca lanzahuan pircapi clavangapaj munashpa lanzata shitarca. Shinapash Davidca jaicata ladoyajpimi lanzaca pircapi clavarishca quidarca. Davidca chai tutallatami pacajungapaj calpashpa llujshirca.
11 Chai tutallatami Saulca huaquin jaricunataca Davidpa huasita vigilashpa, cayandi punllapa Davidta huañuchichun cacharca. Shinapash Davidpa huarmi Micalca, Davidtaca cashna nishpami advirtirca: “Cunan tutallata na pacajungapaj rishpaca,* cayapaca huañuchi tucunguimi” nircami.
12 Chai ratomi Micalca David ventanata uriajushpa escaparita ushachun ayudarca.
13 Chai jipaca Micalca shuj terafim* santota japishpami camapi churarca. Shinallata chivo milmahuan rurashca telataca uma siririj ladopi churashpami shuj fachahuan taparca.
14 Davidta japingapaj Saúl cachashca jaricuna chayajpica, Micalca “paica huañujupanmi” nircami.
15 Chaimi Saulca chai jaricunataca Davidta ricuchun cutin cacharca. Paicunataca “Davidtaca camandi apamuna cajpipash huañuchingapaj apamuichilla” nircami.
16 Chai jaricuna yaicushpaca camapica shuj terafim santotami tarirca. Y Davidpa uma siririna ladopica chivo milmahuan rurashca telatami tarirca.
17 Saulca Micaltaca cashna nishpami tapurca: “¿Imashpata llullahuashcangui? ¿Imashpata ñucapa contrataca escaparichun saquircangui?” nircami. Chaimi Micalca, “Davidca ‘na richun saquijpica candaca huañuchishami’ nihuarcami” nirca.
18 Davidca escaparishpaca Ramá llactapi Samuelta ricungapami rirca. Chaipimi Saúl paita imatalla rurashcata tucuita Samuelmanga villarca. Chai jipaca ishcandimi Nayot pushtuman rishpa chaipi quidarca.
19 Tiempohuanga “Davidca Ramá llactapi tiashca Nayot pushtupimi can” nishpami Saulmanga villarca.
20 Chaita yachashcandimi Saulca Davidta japichun huaquin jaricunata cacharca. Chai jaricuna chaiman chayashpaca mayorlla profetacuna Taita Dios villashca shimicunata villanajujtami ricurca. Shinallata Samuel chai profetacunata dirigishpa shayajujtami ricurca. Shinapimi Taita Dios paipa espíritu santota* chai jaricunaman cujpi paicunapash profetacunashna portari callarirca.
21 Chaita yachaj chayashpaca Saulca cutinmi shuj jaricunata cacharca. Pero paicunapashmi profetacunashna portari callarirca. Chaimi Saulca shuj tercer grupo jaricunata cacharca. Y paicunapashmi profetacunashna portari callarirca.
22 Chaimandami Saulca paipacha Ramá llactaman rirca. Paica Secú pushtupi tiashca jatun pozomanmi chayarca. Chaipimi Saulca, “Samuel y Davidca ¿maipita can?” nishpa tapurca. Shina tapujpimi “Ramá llactapi tiashca Nayot pushtupimi can” ninajurca.
23 Ramá llactapi tiashca Nayot pushtuman Saúl rijujpimi Taita Diosca paimanbash paipa espíritu santota curca. Chaimandami Saulca Ramá llactapi tiashca Nayot pushtuman chayangacaman shuj profetashna portarirca.
24 Saulca ropatapash llujchirishpami Samuelpa ñaupapica shuj profetashna portarirca. Paica punlla entero y tuta enteromi ashalla ropahuan alpapi sirijurca. Chaimandami gentecunaca “¿Saulpashchu profeta can?” nishpa ninajurca.
