1 Samuel 2:1-36
2 Ana huarmiguca cai oraciondami rurarca:
“Ñuca shunguca Jehová Diosmandami cushijushca can;Jehová Diosmi fuerzata cuhuan.*
Taita Dios canba ruraicunahuan salvahuashcamandami cushijupani.Chaimi ñuca contracunataca na manllashpa contestani.
2 Jehová Dioslla canshna santopacha santoca nipipash na tianllu.Canshnaca nipipash na tianllu.Ñucanchi Taita Dios, canga shuj rumishna shinllipachami capangui.
3 Jehová Diosca tucuita yachaj Taita Diosmi can.Paica gentecunapa ruraicuna ali o nali cajtaca alimi yachan.Chaimandami jariyashpa parlanataca saquina canguichi.Cangunapa shimihuan imapash jariyashcata rimanatapash saquinami canguichi.
4 Paimi alipacha macanajunata yachajcunapa flecha arcocunataca faquishpa tucuchin.Pero na shinllicunamanga* fuerzatami caran.
5 Micunata yapalla charij gentecunacamicunata charingapami trabajana can.
Pero yarjachijcunaca ñana yarjai pasanllu.Huahuacunata na charij ushaj huarmica, 7 huahuacunatami charishca. Pero ashtaca huahuacunata charij huarmica solallami quidashca.*
6 Jehová Diosmi causaitaca caraita* y quichuita ushan.Paimi pitapash Huañushcacunata Pambana Pushtuman* cachaita ushan y paillatami causachitapash ushan.
7 Jehová Diosmi pobreyachita y chariyachitapash ushan.Paimi nalipi churaita y jatunbi churaitapash ushan.
8 Importante gentecunahuan tiarichingapajy respetashca pushtupi churangapamihumilde runagutaca alpamanda* jatarichin.Shinallata pobre runagutapash uchufa mundunmandami jatarichin.*
Cai alpapa pilarcunataca Jehová Diosmi churashca.Y cai alpapimi fucuchij alpacunataca churashca.
9 Pipash paipa propio fuerzahuanga na mishai ushanllu.Chaimi Taita Diosca paita cazujcunataca protegin.Pero nalicunaca huañushpami upallayachi tucunga.
10 Jehová Diosmi paipa contra macanajujcunataca tucuchishpa saquinga.*Taita Dios paipa contracunahuan culirashcata ricuchijpica jahua cielomandami culun nij uyaringa.
Jehová Diosmi tucui cai alpata juzganga.Paimi pai agllashca reymanga poderta cunga.Paimi paipa agllashcamanga fuerzata cunga”* nircami.
11 Elcaná runaca paipa huasimanmi tigrarca. Paipa huasica Ramá llactapimi carca. Shinapash Samuelca sacerdote Elihuan quidashpami Jehová Diostaca sirvi callarirca.
12 Elí runapa churicunaca Jehová Diosta na respetaj, nalipacha jaricunami carca.
13 Paicunaca sacerdotecuna caimandami israelitacuna Taita Diosman carashca ofrendamanda shuj parteta japina carca. Shinapash chaipa randica shuj jari shuj ofrendata cujpica sacerdotepa ayudanteca shuj jatun tenedorhuanmi aichahuan timbujuj mangacunaman chayan carca.
14 Y chai mangacunapi jatun tenedorta satishpami sacerdoteca tenedor llujchishca tucuilla aichahuan quidan carca. Elipa churicuna y paicunapa ayudantecunaca Siló llactaman rishca tucuilla israelitacunapa ofrendacunatami shina ruran carca.
15 Shinallata virata nara cushnichijpillatami sacerdotepa ayudanteca ofrendata apamuj jarimanga cashna nin carca: “Aichata cusangapaj sacerdoteman cui. Paica timbushca aichataca na munanllu, chahua aichatallami munachin” ninmi carca.
16 Pero ofrendata apamuj jarica cashnami nin carca: “Primeroca viratarami cushnichina can. Chai jipami quiquin munashcata japi ushapanguilla” nin carca. Shina nijpipashmi sacerdotepa ayudanteca “na, cai rato aichata cuhuai. Sinoca a la fuerzami quichusha” nin carca.
17 Jehová Diosman cushca ofrendata na respetashcamandami sacerdotepa ayudantecunaca Jehová Diospa ñaupapica jatun pecadota ruranajurca.
18 Samuelca huahuara cashpallatami Jehová Diospa carpa huasipi* sirvijurca. Paica linohuan rurashca shuj efod* ropagutami churajun* carca.
19 Shinallata cada huatami paipa mamaca Samuelmanga sin mangas churajuna ropata ruran carca. Shinallata Taita Diosman cada huata ofrendata cungapaj paipa cusahuan vichai rishpami chai ropagutaca apashpa rin carca.
20 Elí runaca Elcaná runata y paipa huarmi Anataca bendiciashpami cashna nirca: “Quiquinba huarmi Jehová Diosman cai huahuaguta cushcamandaca, Jehová Dios shuj huahuaguta quiquingunaman carapachun” nircami. Chai jipami paicunaca paicunapa huasiman tigrarca.
21 Jehová Dios, Ana huarmiguta llaquishcamandami Ana huarmiguca cutin vijsayu quidai usharca. Paica quimsa churicunata, ishcai ushicunatami charirca. Cutin Samuelca Jehová Diosta sirvishpami viñajurca.
22 Elí runaca ña mayorgupachami carca. Shinapash paipa churicuna gulpi israelitacunata imashina tratanajushcataca alimi yacharca. Shinallata paicuna tabernáculo huasi* entradapi sirvij huarmicunahuan puñun cashcatapashmi ali yachan carca.
23 Elí runaca paipa churicunataca cashnami nin carca: “¿Imashpata chaicunataca ruranajunguichi? Tucui israelitacunami cangunamandaca nali cosascunata parlahuan.
24 Ñuca huahuacunalla chaicunataca ama ruranajuichichu. Jehová Diospa llactaca cangunamandaca nalicunatallami parlanajun.
25 Pipash shuj runapa contra pecadota rurajpica talvez pipash paipa favormi Jehová Diostaca mañanga. Pero pipash Jehová Diospa contra pecadota rurajpica ¿pita paimandaca mañangayari?” nircami. Shinapash paicunaca paicunapa taitataca na cazurcachu. Y Jehová Diosca paicunata huañuchinataca ñami decidishcarca.
26 Cutin Samuelca viñashpami catijurca. Paitaca Jehová Diospash, gentecunapashmi ashtahuan juyashpa catinajurca.
27 Taita Dios cachashca shuj profetaca Elí runataca cashnami nirca: “Jehová Diosca cashnami nin: ‘Canba punda taitapa familiacuna Egiptopi cajpi, paicuna faraonba* esclavocuna cajpica ¿nachu ñuca pi cashcataca paicunaman rijsichircani?
28 Israel llactamanda tucui jatun familiacunapuramandaca canba punda taitatami ñucata sacerdote shina sirvichun agllarcani. Paitami ñuca altar jahuapi animalcunata rupachishpa cuchun, inciensota rupachichun* y ñuca ñaupapi efod ropata churajushca cachun agllarcani. Shinallata canba punda taitapa familiamanbash israelitacuna* cushca rupachina ofrendacunatami curcani.
29 Ñuca huasipica ofrendacunata y regalocunata ñucaman cuchunmi mandarcani. Shinaca ¿imashpata chaicunataca na respetajunguichiyari?* ¿Imashpata ñucata yali canba churicunatara respetanguiyari? ¿Imashpata israelitacuna cushca ofrendacunamandaca ashtahuan ali partecunatalla japishpa micunajunguichiyari?
30 ”’Chaimandami Israel llactapa Jehová Diosca cashna nin: “Canba familia y canba punda taitapa familiapash ñucataca siempremi sirvinga* nircanimi”. Pero cunanga Jehová Diosca cashnami nin: “Chaica ñana shina cangachu. Ñucaca ñucata respetajcunatallami respetasha. Pero ñucata na ricunayachijcunaca shinallatami tratai tucunga”.
31 Shinaca canba autoridadta y canba taitapa familiapa autoridadtami quichusha. Canba familiapuramandaca pipash mayoriangacamanga na causangachu.
32 Israelitacuna bendiciai tucujujpica canga ñuca huasipica shuj contratami charigringui. Canba familiapica pipash mayoriangacamanga na causangachu.
33 Canba familiamandaca shuj jaritami* ñuca altarpi sirvichun saquisha. Paimi ninanda llaquichishpa* canba ñavitapash ciegoyachinga. Shinapash canba familiamandaca mayoriami espadahuan huañuchi tucunga.
34 Ñuca nishca ciertopacha cashcata ricuchunmi cai señalta ricuchisha. Canba ishcandi churicuna Hofní y Finehasca shuj punllapillatami huañunga.
35 Chai jipaca ñucata cazuj sacerdotetami ñucapaca agllasha. Paimi ñuca shungu munashcata ruranga. Paipa familiatami ashtaca tiempota sacerdotecuna shina sirvichun saquisha. Paimi ñuca agllashca runata sirvishpa causanga.*
36 Canba familiamanda causaj quidashcacunaca, ñuca sacerdotepaman shamushpami asha culquiguta y micunaguta charingapaj cungurishpa trabajota mañanga. Paicunaca cashnami ninajunga: “Masqui imagutallapash micui ushangapaca sacerdotecuna ruraj imapash trabajoguta cuhuai por favor” ninajungami’ ninmi Taita Diosca”.
Notacuna
^ Hebreo shimipica “ñucapa cachoca Jehová Diospimi alzarin” nijunmi.
^ O “nitijajcunamanga”.
^ Hebreo shimipica “chaquirishcami” nijunmi.
^ O “huacaichin”.
^ Hebreo shimipica “polvomanda” nijunmi.
^ O talvez “basuramandami jatarichin”.
^ O talvez “Jehová Diospa contra macanajujcunaca manllarishcapachami quidanga”.
^ Hebreo shimipica “cachota alzanga” nijunmi.
^ Chaitaca sacerdotecunami churajun carca y shuj delantal cuendami carca. Apéndice B5ta ricupangui.
^ Hebreo shimipica “huatarishca” nijunmi.
^ O “ñaupapi”.
^ Hebreo shimipica “tandanajuna carpa” nijunmi.
^ O talvez “ofrendacunapa cushnita jahuaman cachachun”.
^ Hebreo shimipica “Israelpa churicuna” nijunmi.
^ Hebreo shimipica “jaitanguichi” nijunmi.
^ Hebreo shimipica “ñuca ñaupapi puringa” nijunmi.
^ Caipica talvez ashtahuan jaricunamandapashmi parlajun yarin.
^ Hebreo shimipica “ñaupata puringa” nijunmi.
