1 Samuel 22:1-23
22 Chaimanda rishpami Davidca Adulam llactapi tiaj cuevapi pacajurca. Davidpa huauquicuna y paipa tucuilla familiacunapash David maipi cashcata yachaj chayashpaca Davidpamanmi urai rirca.
2 Problemacunata, dibicunata charijcuna, sufrishpa causajcunapashmi Davidhuanga tandanajurca. Shinami Davidca paicunapa líder tucurca. Paihuanga 400 jaricunami tandanajurca.
3 Chai jipaca Davidca Moab llactapi tiaj Mizpé pushtumanmi rirca. Davidca Moab llactamanda reytaca cashnami nirca: “Taita Dios ñucamanda imata ruragrijujta yachangacaman ñuca taita y ñuca mama quiquingunahuan caipi quidachun saquipai por favor” nircami.
4 Chaimi Davidca paipa taitamamataca Moab llactamanda reyhuan saquirca. David pacajushpa causajushca tucui tiempotami paicunaca chaipi quidarca.
5 Tiempo jipaca Gad shuti profetaca Davidtaca cashnami nirca: “Ama caipi pacajushpa quidaichu. Judá jatun familiapa alpacunaman ri” nircami. Shina nijpimi Davidca pacajushca pushtumanda rishpa Héret shuti bosqueman yaicurca.
6 Saulca Guibeá llactapa lomapi cashpa, shuj tamarisco shuti quiru* ucupi tiajushpami Davidta y Davidhuan tandanajushca jaricunatapash tarishcata yachaj chayarca. Saulca shuj lanzatami chariria tiajurca, shinallata tucui sirvientecunami paipa muyundipi carca.
7 Chaimi Saulca paicunataca cashna nirca: “Benjaminba jatun familiamanda jaricuna uyahuaichi. ¿Cangunaca Jesé runapa churichu alpacunata y uvas pambacunata cangunaman cunga yanguichichu? ¿Paica cangunataca mil soldadocunapa y 100 soldadocunapa mandaj cachun churanga yanguichichu?
8 Tucui cangunami ñucapa contra tucushcanguichi. Jesé runapa churihuan ñuca churi shuj tratota* rurashcataca nipipash na villahuashcanguichichu. Ñucataca nipipash na llaquihuanllu. Ñuca churillata ñucata sirvij Davidta ñucapa contra tucuchun atichishcatapash nipipash na villahuashcachu. Y cunanga Davidca ñucata huañuchingapami munajun” nircami.
9 Chaimi Saulpa sirvientecunata mandaj Doeg shuti edomita runaca cashna nirca: “Ñucaca Jesé runapa churitaca Nob llactaman chayajtami ricurcani. Paica Ahitub runapa churi Ahimélec runata ricungapami chayashcarca.
10 Ahimelecca Davidpa shutipimi Jehová Diostaca tapurca. Shinallata paimanga micunata y Goliat shuti filisteopa espadatapashmi curca” nircami.
11 Shina nijpimi rey Saulca enseguida Ahitub runapa churi Ahimélec sacerdoteta y paipa taitapa familiamanda tucui sacerdotecunata cayachun cacharca. Paicunaca Nob llactapimi carca. Chaimi tucui paicunaca reypaman rirca.
12 Saulca “Ahitub runapa churi, ñucata uyahuai” nircami. Chaimi paica “ñuca amolla caipimi capani” nirca.
13 Shina nijpimi Saulca cashna nirca: “¿Imashpata canbash y Jesé runapa churipash ñucapa contra tucushcanguichi? ¿Imashpata tandatapash y shuj espadatapash paimanga curcangui y paipa shutipipash Taita Diosta tapurcangui? Davidca ñuca enemigomi can. Paica ñucapa contra tucushpami cunanga ñucata huañuchingapaj munajun” nircami.
14 Shina nijta uyashpami Ahimelecca rey Saultaca cashna nirca: “Quiquinda sirvij David runaguca confiable runagumi can. Paishnaca pipash na tianllu. Ñuca reylla paica quiquinba mashami can. Quiquinba soldadocunata mandaj y quiquinba huasipipash respetashca runagumi can.
15 Paipa shutipica Taita Diostaca tauca viajecunatami tapushcani. Ñucaca quiquinba contra tucunataca pensaitallapash na pensapashcanichu. Ñuca amolla, ñuca taitapa familiatapash y ñucatapash ama culpahuaichu. Chashna pasajushcataca yachaitapash na yachashcanichu” nircami.
16 Shinapash rey Saulca Ahimelectaca, “canbash y canba taitapa tucuilla familiapashmi huañugringuichi” nircami.
17 Chai jipami rey Saulca paipa muyundipi cashca soldadocunataca* cashna nirca: “Jehová Diospa sacerdotecunata huañuchigrichi. Paicunaca Davidpa partemi tucushca. David pacajushpa rijujtaca paicunaca alimi yacharca. Shinapash paita ricushcataca na villahuashcachu” nircami. Pero reypa soldadocunaca Jehová Diospa sacerdotecunata huañuchingapaca na munarcachu.
18 Chaimi rey Saulca Doeg shuti edomita runataca “can huañuchingapaj ri” nishpa mandarca. Shina nijhuanmi Doeg runaca sacerdotecunata huañuchirca. Chai punllaca 85 sacerdotecunatami* huañuchirca.
19 Shinallata Nob llactapi causajuj gentecunatapashmi atacarca. Chai llactaca sacerdotecuna causaj llactami carca. Doeg runaca jaricunata, huarmicunata, huahuacunata, llullu huahuacunata, shinallata torocunata, burrocunata y llamacunatapashmi espadahuan huañuchirca.
20 Pero Abiatar runaca escaparita ushashpami Davidpaman rirca. Abiatar runaca Ahimelecpa churi y Ahitub runapa nietomi carca.
21 Abiatar runaca Davidtaca cashnami nirca: “Saulca Jehová Diospa sacerdotecunatami huañuchirca” nircami.
22 Shina nijta uyashpami Davidca Abiatar runataca cashna nirca: “Nob llactapi Doeg shuti edomita runata ricushca punllaca Saulman villangallata yarcanimi. Canba taitapa tucuilla familia* huañuchi tucushcamandaca ñucami culpata charini.
23 Ama manllaichu, ñucahuan quidai. Pipash canda huañuchingapaj munajpica ñucata huañuchingapaj munajuj cuendami canga. Chaimandami candaca cuidashpa charisha” nircami.
Notacuna
^ O “yura”.
^ O “pactota”.
^ Hebreo shimipica “calpajcunataca” nijunmi.
^ Hebreo shimipica “linohuan rurashca efod ropata churajushca jaricunatami” nijunmi. Chaitaca sacerdotecunami churajun carca y shuj delantal cuendami carca. Apéndice B5ta ricupangui.
