1 Samuel 23:1-29
23 Tiempo jipami Davidmanga cashna villarca: “Filisteocunami Queilá llactata atacanajun y trillana pambacunapi granocunatami shuanajun” nircami.
2 Shina villajpimi Davidca, Jehová Diostaca “¿filisteocunahuan macanajungapaj rinachu cani?” nishpa tapurca. Chaimi Jehová Diosca “ari, filisteocunahuan macanajushpa Queilá llactata salvagri” nircami.
3 Pero Davidpa soldadocunaca Davidtaca cashnami nirca: “Judá jatun familiapa alpacunapi cashpallatamari manllanajunchi. Maita filisteo soldadocunahuan macanajungapaj Queilá llactamanga rishunyari” ninajurcami.
4 Chaimi Davidca Jehová Diostaca cutin tapurca. Shina tapujpimi Jehová Diosca cashna nirca: “Filisteocunataca canba maquipimi entregagrini. Shinaca Queilá llactaman urai rilla” nircami.
5 Shina nijpimi Davidca paipa soldadocunahuan Queilá llactaman rishpa, filisteocunahuan macanajurca. Chaipica ashtaca filisteocunata huañuchishpami paicunapa animalcunatapash apashpa rirca. Shinami Davidca Queilá llactapi causanajuj gentecunataca salvarca.
6 Ahimélec runapa churi Abiatar runa Davidhuan tuparingapaj Queilá llactaman escaparishpa rijuj horasca, paica shuj efod* ropatami apashpa rirca.
7 Saulmanga “Davidca Queilá llactapimi can” nishpami villarca. Chaimi Saulca cashna nirca: “Taita Diosmi Davidtaca ñuca maquipi entregahuashca.* Davidllatami shinlli pungucunahuan jarcashca llactaman yaicushca. Cunanga ñana escaparita ushanllu” nircami.
8 Chaimandami Saulca Queilá llactaman urai ringapaj paipa tucuilla soldadocunata tandachirca. Saulca Davidpa y paipa soldadocunapa muyundipi shayaringapami shina rurarca.
9 Saúl imata ruragrijujta yachaj chayashpami Davidca, sacerdote Abiatartaca “efod ropata caiman apamui” nirca.
10 Chai jipami Davidca cashna nirca: “Israel llactapa Jehová Dioslla, ñucapa culpamanda Saúl Queilá llactaman shamushpa cai llactata tucuchingapaj munajtami uyashcani.
11 ¿Queilá llactapa lidercunaca* Saulpa maquipichu entregagrihuan? Israel llactapa Jehová Dioslla ¿ciertopachachu ñuca uyashcashna Saulca urai shamugrin? Por favor ñucaman villahuai” nircami. Chaimi Jehová Diosca “ari urai shamugrinmi” nirca.
12 Shinallata Davidca “¿Queilá llactapa lidercunaca ñucata y ñucapa soldadocunatapash Saulpa maquipi entregagrinllu?” nishpami tapurca. Chaimi Jehová Diosca “ari entregangami” nirca.
13 Shina nijpimi Davidca más o menos 600 soldadocunandi Queilá llactamanda enseguida llujshirca. Paicunaca shuj shuj ladocunapimi purinajurca. Queilá llactamanda David escaparishcata yachaj chayashpaca Saulca ñana Davidtaca catiria rircachu.
14 Davidca desiertopi na chayai ushanalla pushtucunapimi pacajurca. Chaica Zif llactapa desiertopi tiaj urcucunapimi carca. Saúl Davidta mascajujpipash Jehová Diosca Davidtaca Saulpa maquipica na entregarcachu.
15 Zif llactapa desiertopi tiaj Hores pushtupi cashpami Davidca Saúl paita huañuchingapaj mascajushcata yachaj chayarca.*
16 Saulpa churi Jonatanga Davidta ricungapami Hores pushtuman rirca. Chaipimi Jonatanga Jehová Diospi ashtahuan confiachun Davidtaca ayudarca.
17 Jonatanga Davidtaca cashnami nirca: “Ama manllaichu, ñuca taitaca candaca na taringachu. Canmi Israel llactapa rey tucugringui. Cutin ñucaca candami apoyasha.* Chaitaca ñuca taitaca alimi yachan” nircami.
18 Chaita nishca jipaca ishcandimi Jehová Diospa ñaupapi shuj tratota* rurarca. Jipamanga Jonatanga paipa huasimanmi rirca. Cutin Davidca Hores pushtupimi quidarca.
19 Jipamanga Zif llactamanda jaricunaca Saulta ricungapami Guibeá llactaman vichai rirca. Chaipimi Saultaca cashna nirca: “Davidca ñucanchi ladolla Hores pushtupi na chayai ushanalla pushtucunapimi pacajujun. Paica Jesimón pushtupa* sur ladopi* tiashca Hakilá lomapimi pacajujun.
20 Ñucanchi reylla, quiquin ima hora urai shamungapaj munashpaca shamunguilla. Ñucanchica quiquinba maquipimi Davidtaca entregashun” ninajurcami.
21 Shina nijpimi Saulca paicunataca cashna nirca: “Quiquinguna ñucata llaquihuashcamandaca Jehová Dios quiquingunata bendiciapachun.
22 Por favor David maipipacha pacajushcata y pi paita ricushcata averiguangapaj ripaichi. Davidca vivo vivo cashcatami uyashcani.
23 David maijan pushtucunapilla pacajujta ali ali averiguapaichi. Y pai maipipacha pacajushcata tarishpaca ñucapaman tigramunguichi. Chaimi cangunahuan risha. Y llactapi cajpica Judá jatun familiapa cada grupo familiapurapipashmi mascasha” nircami.
24 Chaimi chai jaricunaca Saulta ñaupashpa Zif llactaman rirca. Cutin David y paipa soldadocunaca Maón desiertopimi carca. Chaica Arabá pushtupi, Jesimón pushtupa sur ladopimi carca.
25 Chaimi Saulca paipa soldadocunandi Davidta mascangapaj rirca. David chaita yachaj chayashpaca Maón desiertopi tiaj shuj jacamanmi urai rirca. Saúl chaita yachaj chayashpami Maón desiertopi Davidtaca cati callarirca.
26 David y paipa soldadocuna shuj urcu ladopi cajpimi Saulca chai urcupa chaishuj ladoman chayarca. Chaimi Davidca escaparingapaj apurashpa rijurca. Shinapash Saulca paipa soldadocunandimi paicunataca ñallapacha japigrinajurca.
27 Shinapimi shuj mensajero chayashpa Saultaca cashna nirca: “Llactamanga uchallami tigrana cangui. Porque filisteocunami llactataca atacanajun” nircami.
28 Shina nijpimi Saulca Davidta catiria rinata saquishpa filisteocunahuan macanajungapaj rirca. Chaimandami chai pushtutaca Separarina Jaca nishpa shutichirca.
29 Chai jipami Davidca chaimanda rishpa En-Guedí llactapa na chayai ushanalla pushtucunapi pacajungapaj rirca.
Notacuna
^ Chaitaca sacerdotecunami churajun carca y shuj delantal cuendami carca. Apéndice B5ta ricupangui.
^ Hebreo shimipica “jatushca” nijunmi.
^ O talvez “alpa dueñocunaca”.
^ O talvez “manllajurca”.
^ Hebreo shimipica “ñucaca canba jipa segundomi casha” nijunmi.
^ O “pactota”.
^ O talvez “desiertopa”.
^ Hebreo shimipica “ali ladopi” nijunmi.
