1 Samuel 25:1-44
-
Samuelca huañunmi (1)
-
David cachashca sirvientecunataca Nabalca tacurishpami saquin (2-13)
-
Abigailca imata ruranataca ali alimi pensarin (14-35)
-
“Jehová Diosllatami quiquinba causaitaca cuidanga” (29)
-
-
Jehová Diosca millai millai, nalita ruraj Nabal runatami huañuchin (36-38)
-
Davidca Abigailhuanmi cazaran (39-44)
25 Tiempo jipaca Samuelca huañurcami. Chaimi pai huañushcamandaca tucuilla israelitacuna tandanajushpa huacanajurca. Samuelpa huasica Ramá llactapimi carca. Chai llactapillatami paitaca pambarca. Pero Davidca Parán desiertomanmi urai rirca.
2 Maón llactapica shuj charij charij runami tiarca. Paica Carmelo* llactapimi trabajan carca. Paica 3 mil llamacunata y mil chivocunatami charirca. Paica Carmelo llactapimi llamacunapa milmataca rutujurca.
3 Chai runaca Nabal shuti calebita runami carca. Paipa huarmica Abigaíl shutimi carca. Paica aliguta pensarishpa imagutapash ruraj, juyailla huarmigumi carca. Pero paipa cusaca millai millai, nalita ruraj ruranami carca.
4 Desiertopi cashpami Davidca, Nabal runa llamacunapa milmata rutujujta yachaj chayarca.
5 Chaimi Davidca paipa 10 sirvientecunataca cashna nirca: “Carmelo llactaman rishpa Nabal runataca, alillachu capangui nishpa tapupanguichi.
6 Paitaca cashna nipanguichi: ‘Ashtaca huatacunata causashpa catipangui. Quiquinda, quiquinba familiata y quiquin tucui imatalla charishcacunatapash ali ripachun.
7 Quiquin cunan horas llamacunapa milmata rutujujtami uyashcani. Quiquinba michijcuna ñucanchihuan Carmelo llactapi cashca tiempopica paicunataca na llaquichircanchichu. Y pipash paicunataca nimatapash na quichurcachu.
8 Quiquinba sirvientecunata tapupanguilla, paicunaca villangallami. Chaimandami ñucapa sirvientecunataca ali chasquipangui nishpa rogapani. Ñucanchica ninanda cushijuna tiempopimi* chayamupashcanchi. Ñucanchicunaman y quiquinda sirvij Davidman* imagutapash por favor carahuai’ ninguichi” nircami.
9 Chaimi Davidpa sirvientecunaca, Nabal runapaman rishpa David imata nishcata nirca. David nishcata nishca jipami
10 Nabal runaca, Davidpa sirvientecunataca cashna nirca: “Davidca ¿pitayari? Jesé runapa churica ¿pitayari? Paica yanga sirvientellamari, paica paipa amomanda escaparishpami purijun.
11 Ñuca yacuta, ñuca tandata y preparashca aichataca ¿ima nishpata na rijsishca gentecunamanra cushayari? Chaicunaca llamacunapa milmata rutunajuj runacunapami can” nircami.
12 Davidpa sirvientecuna tigrashpaca, Nabal runa tucui ima nishcatami Davidmanga villarca.
13 Shina villajhuanmi Davidca paipa soldadocunataca, “cada uno cangunapa espadata japichi” nirca. Chaimi tucuicuna paicunapa espadata huatarirca. Davidpashmi shinallata rurarca. Davidhuanga 400 soldadocunami rirca. Cutin 200 soldadocunaca paicunapa cosascunatami cuidashpa quidarca.
14 Shinapimi shuj sirvienteca ima pasajushcata Nabalpa huarmi Abigailman villarca. Paimanga cashnami nirca: “Ricui Davidca ñucanchi amota saludashpa y imashna cajta yachangapami desiertomanda huaquin sirvientecunata cachamurca. Pero ñucanchi amoca paicunataca nali shimicunata nishpami tacurishpa saquirca.
15 Davidpa soldadocunaca ñucanchicunahuanga ali alicunami carca. Paicunaca ñucanchitaca nunca na llaquichircachu. Paicunahuan pambapi cashca tiempopica ñucanchitaca nipipash na imatapash quichurcachu.
16 Paicunaca ñucanchicuna michinajuj tucui tiempopica tuta y punllami ñucanchitaca protegirca.
17 Cunanga quiquin imata ruranata decidipai. Sinoca ñucanchi amopa y tucui ñucanchicunapami llaqui canga. Nabalca millanai* runamari, paihuanga parlaitallapash na parlai usharinllu” nircami.
18 Shina nijhuanmi Abigailca 200 tandacunata, ishcai jatun jarra vinota, yanungapaj sazonashca 5 llamacunata, camllashca granocunahuan 5 costalta,* chaquishca uvashuan rurashca 100 tortacunata, shinallata higoshuan rurashca 200 tortacunata japishpami burrocunapa jahuapi apachirca.
19 Chai jipami Abigailca paipa sirvientecunataca “ñaupaichilla, ñucaca cangunataca catishpami risha” nirca. Pero paipa cusa Nabalmanga nimata na villarcachu.
20 Abigailca urcutami pacalla burropi urai rijurca. Cutin Davidca paipa soldadocunandi shamunajushpami Abigailhuanga tuparirca.
21 Davidca cashnami nijushcarca: “Desiertopi chai runa charishca tucui cosascunataca ñucaca yangallatami cuidashcani. Pipash paitaca imatapash na quichurcachu. Ñuca paita alita rurajpitami paica nalita tigrachihuajun.
22 Nara pacarijpillata Nabalta y paipa huasimanda tucui jaricunata* na huañuchinica, Taita Diosllata ñucapa enemigocunata* llaquinaita castigachun” nijurcami.
23 Abigailca Davidta ricushpami ñapash burromanda uriajushpa Davidpa ñaupapi cungurishpa alpacaman cumurirca.
24 Abigailca Davidpa ñaupapi cungurishpami cashna nirca: “Ñuca amolla ñucata culpahuai. Ñucaca quiquinba sirvijmi capani. Ama shinagu cashpa ñuca imata nigrijushcata uyachunmi rogapani.
25 Ñuca amolla, por favor Nabaltaca ama cazupaichu. Paica millanai juizu illa runamari can. Chaimandami Nabal* shutita charin. Ñuca amolla, quiquin cachamushca sirvientecunataca na ricuparcanichu.
26 Ñuca amolla, Jehová Diosmi quiquinba maquihuanllata ama vengarichun* y yahuarta jichashcamanda ama culpable tucuchun jarcajun. Chaitaca causajuj Jehová Diospa shutipi y quiquinba ñaupapimi jurapani. Quiquinba contracunapash y quiquinda llaquichingapaj munajcunapash Nabal runashna tucuchun.
27 Ñuca amolla, quiquinman ñuca apamushca micunaguta* quiquinda cumbanajuj soldadocuna chasquichun saquipai.
28 Ñuca amolla, si ñuca imapash nalita nishcajpica perdonahuangui por favor. Ñuca amolla Jehová Dios quiquinba huahuacuna* reycuna shina unaita gobernachun saquinataca alimi yachapani. Quiquinga Jehová Diospa macanajuicunatami macanajujupashcangui. Y quiquinba tucui causaipipash ima nalitaca na rurapashcanguichu.
29 Ñuca amolla quiquinda pipash huañuchingapaj catiriajpica quiquinba Jehová Diosllatami quiquinba causaitaca cuidanga.* Pero quiquinba enemigocunapa causaitaca huaracahuan rumita shitanshnami caruta shitanga.
30 Jehová Dios quiquinman tucui ali cosascunata cusha nishpa prometishcata pactachijpi y Israel llactata gobernachun quiquinda churajpica,
31 quiquin vengarishcamanda* y yahuarta jichashcamandapash shungupica llaquirita y arripintiritapash na arripintirijunachu* capangui. Ñuca amolla, ñucaca quiquinba sirvijmi capani. Jehová Dios quiquinda bendiciajpica ñucataca ama cungahuanguichu” nircami.
32 Shina nijpimi Davidca Abigailtaca cashna nirca: “Israel llactapa Jehová Dios alabai tucushca cachun. Porque paimi cai punllaca ñucahuan tuparichun candaca cachamushca.
33 Alita rurashcamanda Taita Dios canda bendiciapachun. Ñucapa maquihuanllata ama vengarichun* y yahuarta jichashcamanda ama culpable tucuchun librahuashcamandaca Taita Dios canda bendiciapachun.
34 Quiquinda ama llaquichichunga Taita Diosmi jarcahuashca. Israel llactapa causajuj Jehová Diospa shutipimi jurani, can ñucahuan parlangapaj na uchalla shamushca cajpica Nabalpa huasimanda jaricunaca* ni shuj na causaca pacarinmanllu carca” nircami.
35 Chaita nishca jipami Davidca, Abigaíl apamushcata chasquishpa cashna nirca: “Ama preocuparishpa canba huasiman tigrailla. Can nishcataca uyashcanimi. Can imata mañashcataca rurashallami” nircami.
36 Chai jipami Abigailca huasiman tigrarca. Chaipica Nabalca shuj reyshnami shuj jatun fiestata rurashca carca. Nabalca* machashcapacha caimandami cushijushcapacha carca. Chaimandami Abigailca pacaringacaman paimanga nimata na villarcachu.
37 Pacari punllapaca Nabal ña juizupi cajpimi Abigailca paimanga tucuita villarca. Chaita uyashcandimi Nabalca huañushcashna quidarca.* Paipa cuerpopash shuj rumishnami ñana cuyurirca.
38 Jehová Diosca 10 punllacuna jipami Nabaltaca huañuchirca.
39 Nabal huañushcata yachaj chayashpaca Davidca cashnami nirca: “Jehová Diosca alabai tucushca cachun. Nabalca ñucataca humillaitami humillahuarca. Shinapash Jehová Diosmi ñucataca difindihuarca. Paica nalita ruranamandami jarcahuarca. Y Nabaltaca nalita rurashcamandami Taita Diosca castigarca”* nircami. Chai jipami Davidca Abigailtaca ñucahuan cazarai nichun paipa sirvientecunataca cacharca.
40 Davidpa sirvientecunaca Carmelo llactaman chayashpami Abigailtaca cashna nirca: “Davidca quiquinhuan cazarangapaj munaimandami quiquinda mascachun ñucanchitaca cachamurca” ninajurcami.
41 Shina nijpimi Abigailca ñapash cungurishpa alpacaman cumurirca. Paicunataca cashnami nirca: “Ñucaca Davidpa esclava y paipa sirvienta cangapaca dispuestami capani. Ñuca amopa sirvientecunapa chaquicunata maillachingapapashmi dispuesta capani” nircami.
42 Abigailca enseguida jatarishpa, paipa burropi tiarishpami David cachamushca mensajerocunataca cumbashpa rirca. Paitaca 5 sirvientacunami chaquilla catiria rinajurca. Shinami Abigailca Davidhuan cazararca.
43 Davidca Ahinoam shuti huarmihuanbashmi cazarashca carca. Ahinoam huarmica Jezreel llactamandami carca. Ahinoambash y Abigailpashmi Davidpa huarmicuna* carca.
44 Saulca paipa ushi Micaltaca Davidpa huarmi cajpipashmi Paltí shuti runahuan cazarachishcarca. Paltí runaca Lais shuti runapa churimi carca. Paica Galim pushtumandami carca.
Notacuna
^ Judapi tiaj shuj llactami can. Cai llactaca Carmelo urcuca na canllu.
^ Hebreo shimipica “shuj ali punllapimi” nijunmi.
^ Hebreo shimipica “quiquinba churiman” nijunmi.
^ O “na sirvij”.
^ Hebreo shimipica “5 seas” nijunmi. Apéndice B14ta ricupangui.
^ Hebreo shimipica “pircapi ishpajcunata” nijunmi. Hebreo idiomapica jaricunamanda nalicachishpa parlangapami chai shimicunata utilizan carca.
^ O talvez “Davidta”.
^ Cai shutica “na pensaj” o “upa” nijunmi.
^ O “ama salvarichun”.
^ Hebreo shimipica “cai bendicionguta” nijunmi.
^ O “descendencia”.
^ O “quiquinba causaitaca causaipa bolsapimi a salvo charinga”.
^ O “salvarishcamanda”.
^ Hebreo shimipica “cuanraita, nitijaitapash na” nijunmi.
^ O “salvarichun”.
^ Hebreo shimipica “pircapi ishpajcunamandaca” nijunmi. Hebreo idiomapica jaricunamanda nalicachishpa parlangapami chai shimicunata utilizan carca.
^ Hebreo shimipica “Nabalpa shunguca” nijunmi.
^ Hebreo shimipica “paipa ucupica shunguca huañurca” nijunmi.
^ Hebreo shimipica “Nabal nalita rurashcashnallatami Taita Diosca paipa uma jahuapi tigrachirca” nijunmi.
