1 Samuel 26:1-25
26 Huaquin tiempocuna jipaca Zif llactamanda jaricunaca Guibeá llactaman rishpami Saultaca cashna nirca: “Davidca Jesimón pushtu* frente ladopi, Hakilá lomapimi pacajuriajun” nircami.
2 Chaimi Saulca Zif llactapi desiertoman Davidta mascangapaj urai rirca. Chaimanga Israel llactapa 3 mil alipacha soldadocunahuanmi rirca.
3 Saulca Hakilá loma ñan ladopimi paipa carpacunataca shayachirca. Chaica Jesimón pushtupa frente ladopimi carca. Davidca desiertopimi causajushcarca. Chaipimi Saúl paita mascangapaj shamushcata uyarca.
4 Chaimi Davidca ciertopacha Saúl chaiman shamushcata yachangapaj huaquin jaricunata pacalla chapachun cacharca.
5 Chai jipami Davidca Saúl carpacunata shayachishca pushtuman rirca. Chaipica Saulpash y paipa soldadocunata mandaj Abner runapash maipi puñunajujtami Davidca ricurca. Abnerca Ner shuti runapa churimi carca. Saulca shayachishca carpapimi puñujurca. Paipa soldadocunapash paipa muyundipimi carpacunata shayachishcarca.
6 Chaimi Davidca, Ahimélec shuti hitita runata y Abisaitaca cashna nishpa tapurca: “¿Pita Saúl carpacunata shayachishca pushtuman ñucata cumbashpa urai rigrin?” nircami. Shina tapujpimi Abisaica “ñucami canhuan risha” nirca. Abisaica Zeruyá huarmipa churi y Joab runapa huauquimi carca.
7 Yana yana tutapimi David y Abisaica, Saúl shayachishca carpacunaman yaicui usharca. Paicunaca Saúl puñujujta y paipa uma ladopi paipa lanzapash alpapi clavashca shayachishca tiajujtami ricurca. Abnerpash y paipa soldadocunapash Saulpa muyundipimi puñunajurca.
8 Chaimi Abisaica Davidtaca cashna nirca: “Cunanmi Taita Diosca canba contrataca canba maquipi entregajun. Paitaca shuj viajetalla una sola lanzahuan alpaman yalijta clavachun saquihuai” nircami.
9 Shina nijpimi Davidca Abisaitaca cashna nirca: “Saultaca ama imatapash ruraichu. ¿Pita Jehová Dios agllashca personata llaquichishpaca sin culpa quidaita ushangayari?” nircami.
10 Shinallata Davidca cashnami nirca: “Causajuj Jehová Diospa shutipimi jurani, Jehová Diosllatami paitaca huañuchinga. Na cashpaca tucui gentecuna huañunshnallatami ima horapash huañunga. O na cashpaca guerraman rishpami huañunga.
11 Jehová Diosta respetaimandami Jehová Dios agllashca personataca ñucaca nimamanda na llaquichishachu. Paipa uma ladopi shayajuj lanzata y yacuta japingapaj jarratapash japishpa jaculla” nircami.
12 Davidca Saulpa uma ladopi shayajuj lanzata y yacuta japingapaj jarrata japishpami Abisaihuanga chaimanda rirca. Paicunataca nipipash na ricurcachu y ima pasashcatapash nipi na cuenta japircachu. Porque tucuicunami huañushcashna puñunajurca. Jehová Diosmi paicunataca shina puñuchirca.
13 Chai jipami Davidca pambacunata yalishpa paicunamanda chimba lado urcu jahuapi shayarirca.
14 Chaimi Davidca Saulpa soldadocunatapash y Ner runapa churi Abnertapash “Abner ¿nachu uyahuangui?” nishpa caparirca. Chaimi Abnerca Davidtaca “caparishpa reyta rijchachingapaca ¿pita canguiyari?” nirca.
15 Chaimi Davidca Abnertaca cashna nirca: “¿Nachu canga na manllaj persona cangui? Israel llactapica canshnaca nipipash na tianllu. Shinaca ¿imashpata canba reytaca na ali cuidajurcangui? Reyta huañuchingapami shuj soldadoca canguna shayachishca carpacunaman yaicurca.
16 Cangunaca reytaca na ali cuidanajushcanguichichu. Causajuj Jehová Diospa shutipimi jurani, cangunaca Jehová Dios agllashca reyta na cuidashcamandami huañuna canguichi. Ricui reypa uma ladopi cashca lanzapash y yacuta japingapaj jarrapash ¿maipitayari?” nircami.
17 Saulca David parlajujta cuenta japishpami cashna nirca: “David, ñuca huahualla ¿canllu cangui?” nishpami tapurca. Shina nijpimi Davidca “ari ñuca reylla, ñuca amolla ñucami capani” nirca.
18 Shinallata Davidca caitapashmi nirca: “Ñuca amolla, ñucaca quiquinba sirvijmi capani ¿imashpata ñucataca catiriahuajungui? Ñucaca ¿imatata rurashcaniyari? ¿Ima nalitata rurashcaniyari?
19 Ñuca reylla, ñuca amolla por favor uyahuai. Si Jehová Diosllata quiquinda ñucapa contra churashca cajpica grano ofrendatami* paimanga cusha. Y chai ofrendata Taita Dios chasquipachun.* Shinapash si gentecuna quiquinda ñucapa contra churashca cajpica Jehová Diospa ñaupapi paicuna maldiciai tucushca cachun. Paicunaca Jehová Diospa llactamanda* caruyachihuashcamandami shina maldici tucunga. Paicunaca ‘yanga dioscunata adorangapaj ri’ nijuj cuendami ñucataca caruyachihuashca.
20 Cunanga Jehová Diosta adorana pushtumanda carupi huañuchun ama saquihuanguichu nishpami quiquindaca rogapani. Israel llactapa reylla, ñucaca yanga piquishnamari cani. Quiquinga urcupi perdiz shuti pajarota huañuchingapaj mascajunshnami ñucataca mascahuajungui” nircami.
21 Saulca Davidtaca cashnami nirca: “David ñuca huahualla, ñucaca pecadotamari rurashcani. Tigramuilla candaca ñana llaquichishachu. Ñuca causai canba valishca cashcamandami cunanga na huañuchihuashcangui. Ñucaca tontoshnami portarishcani. Nalitapachami rurajushcani” nircami.
22 Chaimi Davidca cashna nirca: “Ñuca reylla quiquinba lanzaca caipimi. Quiquinba soldadocunamandaca pipash apaj shamuchunlla.
23 Cunanmi Jehová Diosca quiquindaca ñuca maquipi churarca. Shinapashmi ñucaca Jehová Dios agllashca reytaca na llaquichingapaj munarcani. Jehová Diosllatami alita rurajcunata y paita cazujcunatapash bendicianga.
24 Imashinami cunan quiquinda na huañuchircani, shinallata Jehová Diospash ñucata cuidahuachun. Y tucuilla llaquicunamandapash salvahuachun” nircami.
25 Chaimi Saulca Davidtaca cashna nirca: “David ñuca churilla Taita Dios candaca bendiciachun. Canga ashtaca ali cosascunatami ruragringui y tucuimi ali llujshinga” nircami. Chai jipaca Davidca ñanda japishpa rircallami. Cutin Saulca paipa huasimanmi tigrarca.
Notacuna
^ O talvez “desierto”.
^ O “ofrenda de grano”. Cai ofrendacunaca harina fina, camllashca cebada o trigo, redondo tortacuna y galletacunapashmi caita usharca.
^ Hebreo shimipica “ashnapachun” nijunmi.
^ Hebreo shimipica “herenciamanda” nijunmi. Herencia nishpaca gentecunamanda y como herencia chasquishca alpacunamandami parlajun.
