1 Samuel 27:1-12
-
Filisteocunaca Ziclag llactatami Davidmanga cun (1-12)
27 Davidca cashnami pensarijurca: “Ima horapash Saulca huañuchihuangallatami. Tucuilla Israel llactapi Saúl ama mascahuajuchunmi mejor filisteocunapa alpacunaman risha. Shinami Saulpa maquimandaca salvarisha” nishpami pensarijurca.
2 Chai jipami Davidca paihuan rinajuj 600 soldadocunandi Akís shuti runapaman rirca. Akisca Gat llactapa reymi carca. Paica Maoc runapa churimi carca.
3 Davidca paipa soldadocunandimi Gat llactapi Akís runahuan quidarca. Cada unomi paicunapa familiacunandi carca. Davidtaca paipa ishcandi huarmicunami* cumbanajurca. Paipa huarmicunaca shujca Jezreel llactamanda Ahinoam shuti huarmi, cutin chaishujca Abigaíl shuti carmelita huarmimi carca. Abigailca huañushca Nabalpa huarmimi cashcarca.
4 David Gat llactaman pacajungapaj rishcata yachaj chayashpami Saulca paitaca ñana mascashpa catirca.
5 Chaimi Davidca Akistaca cashna nirca: “Ñucaca quiquinba sirvijmi capani. Quiquin gobernajuj llactapi quiquinhuan causanaca na alichu canman. Shinaca quiquinba ricuipi ali cajpica ¿nacha llactacunapuramandaca shuj alpata chaipi causachun cuhuanguiman?” nircami.
6 Chai punllami rey Akisca Ziclag llactata Davidmanga curca. Chaimandami Ziclag llactaca cunangaman Judá jatun familiamanda reycunapa can.
7 Davidca filisteocunapa alpacunapica shuj huata y chuscu quillacunatami causarca.
8 Guesurita gentecuna, guirzita gentecuna y amalequita gentecunaca Telam shuti pushtumanda, Sur shuti pushtucaman y Egipto llactacaman tiashca alpacunapimi causanajurca. Chaimandami Davidca paipa soldadocunandi paicunata atacangapaj rin carca.
9 Chai alpacunapi paicunata atacashpaca Davidca tucuilla jaricunata y huarmicunatami huañuchishpa saquin carca. Shinallata paicunapa llamacunata, huagracunata, burrocunata, camellocunata y paicunapa ropacunatapash apashpami rin carca. Chai jipaca rey Akispamanmi tigran carca.
10 Chaimi rey Akisca Davidtaca “cunanga ¿maijan llactacunatallata atacangapaj rircangui?” nishpami tapun carca. Chaimi Davidca cashna nin carca: “Judá jatun familiapa sur ladota,* jerahmeelita gentecunapa alpacunapa sur ladota y quenita gentecunapa alpacunapa sur ladotami atacangapaj rircani” ninmi carca.
11 Pipash ama Gat llactaman apai tucuchunmi Davidca tucuilla jaricunata y huarmicunata huañuchishpa saquin carca. Davidca “paicunaca ‘caita y chaitami Davidca rurarca’ nishpa villanga” yashpami shina ruran carca. (Davidca filisteocunapa alpacunapi causashca tucui tiempopimi shina ruran carca).
12 Rey Akisca David nishcata crishpami cashna pensarijurca: “Davidca siempremi ñucapa sirviente canga. Porque israelitacunaca seguromi paitaca millanayachishpa ricunajunga” yashpami pensarijurca.
Notacuna
^ Israelitacunapa tiempopica israelitacuna tauca huarmicunahuan cazarachunmi Taita Diosca saquirca. Pero Jesús shamushpaca Jehová Dios callarimanda churashcashnami cristianocunaca shujlla jarihuan y shujlla huarmihuan cazarana cashcata yachachirca (Gé 2:24; Mt 19:4-6ta ricupangui).
^ O “Négueb pushtuta”.
