1 Samuel 28:1-25
-
Saulca En-Dor llactapi huañushcacunahuan parlaj huarmipamanmi rin (1-25)
28 Chai punllacunapica israelitacunata atacangapami filisteocunaca soldadocunata tandachirca. Chaimandami rey Akisca Davidtaca cashna nirca: “¿Canga canba soldadocunandi ñucahuan guerraman rina cashcataca intindinguichu?” nircami.
2 Shina nijpimi Davidca paitaca “ñucaca quiquinda sirvijmi capani. Ñuca imata ruragrijujtaca quiquinga alimi yachangui” nirca. Chaimi Akisca, “chaimandallatami candaca ñucata siempre cuidaj soldado* cachun churasha” nircami.
3 Chai punllacunapaca Samuelca ñami huañushca carca. Y tucuilla israelitacunami paimandaca llaquilla carca. Samueltaca pai causashca Ramá llactapimi pambarca. Huañushcacunahuan parlangapaj munaj gentecunata y adivinocunataca Israel llactamanda llujchishpami Saulca cachashcarca.
4 Filisteo soldadocunaca tandanajushpami Sunem llactaman rishpa carpacunata shayachirca. Cutin Saulca Israel llactamanda soldadocunata tandachishpami Guilboa urcupi carpacunataca shayachirca.
5 Filisteocuna carpacunata shayachishca pushtuta ricushpaca Saulca ninandami manllai callarirca.
6 Jehová Diospa guiata Saúl mañajujpipash Jehová Diosca nunca na contestarcachu. Ni muscuicunapi, ni Urim* nishcahuan y ni profetacunahuanbash nunca na contestarcachu.
7 Chaimandami Saulca paipa sirvientecunataca cashna nishpa mandarca: “Huañushcacunahuan parlaj huarmita mascagrichi. Imatacharimi paitaca tapungapaj munani” nircami. Shina nijpimi Saulpa sirvientecunaca cashna nirca: “En-Dor llactapimi huañushcacunahuan parlaj shuj huarmi tian” nircami.
8 Chaimi Saulca paita ama rijsichun shuj ropata churajushpa, paipa ishcai sirvientecunandi tuta chai huarmipaman rirca. Saulca chai huarmitaca cashnami nirca: “Espiritucunata cayashpa ñucahuan jipa punllacunapi ima pasanata por favor villahuai. Ñuca cayachun munashca personata cayamui” nircami.
9 Shinapash chai huarmica cashnami nirca: “¿Ñucata huañuchichunllu quiquinga umachingapaj munahuangui? Quiquinga huañushcacunahuan parlangapaj munaj gentecunata y adivinocunata Israel llactamanda Saúl llujchishpa cachashcataca alimi yachangui” nircami.
10 Shina nijpimi Saulca Jehová Diospa shutipi jurashpa paitaca cashna nirca: “Causajuj Jehová Diospa shutipimi candaca jurani candaca cai asuntomandaca nipipash na culpangachu” nircami.
11 Shina nijta uyashpami chai huarmica Saultaca “¿pitata cayachun munangui?” nirca. Chaimi Saulca “Samuelta cayamui” nirca.
12 Chai huarmica Samuel runashnalla caj runata ricushpaca* ninandami caparirca. Paica “quiquinga Saulmari cashcangui. ¿Imashpata umachihuashcanguiyari?” nircami.
13 Chaimi Saulca chai huarmitaca “ama manllaichu. Imata ricujushcata villahuai” nirca. Shina nijpimi chai huarmica “pichari alpamanda vichai shamujujtami ricujuni. Paica shuj dios cuendami ricurin” nircami.
14 Shina nijhuanmi Saulca “paica ¿imashinata can?” nishpa tapurca. Chaimi chai huarmica cashna nirca: “Shuj mayorlla runami vichai shamujun. Paica sin mangas churajuna ropata churajushcami can” nircami. Shina nijpimi Samuel can yashpami Saulca cungurishpa alpacaman cumurirca.
15 Samuelca* Saultaca “¿imashpata ñucata cayashpa molestahuangui?” nircami. Chaimi Saulca cashna nirca: “Filisteocunami atacahuanajun. Y Taita Diosca ñucataca saquihuashcami. Paica ñuca mañaicunataca ni profetacunahuanbash, ni muscuicunahuanbash ñana contestahuanllu. Chaimi imata ruranataca na atinajuni. Chaimandami imata ruranata quiquin nihuachun cayapashcani” nircami.
16 Shinapash Samuelca* paitaca cashnami nirca: “Jehová Diosca canda saquishpami canba contra tucushca. Shinaca ¿imashpata ñucatara tapuhuangui?
17 Jehová Diosca ñucaman villashcashnami ruragrin. Jehová Diosca can Israel llactata gobernajujta quichushpami David gobernachun churanga.
18 Canga Jehová Diosta na cazushpami paita culirachishca amalequita gentecunataca na tucuchishpa saquircangui. Chaimandami cunanga Jehová Diosca candaca shina tratajun.
19 Shinallata Jehová Diosca tucuilla israelitacunatapash y candapash filisteocunapa maquipimi churanga. Filisteocuna candapash y canba churicunatapash caya huañuchijpimi cangunaca ñucahuan canguichi.* Jehová Diosca israelita soldadocunatapashmi filisteocunapa maquipi churanga” nircami.
20 Chaita uyashcandimi Saulca alpapi shitarishpa quidarca. Samuel* nishcata uyashpaca Saulca ninandami manllarirca. Shinallata punlla entero y tuta entero imatapash na micushcamandami fuerza illa carca.
21 Chai huarmi Saulpaman quimirishpa Saúl manllarishcapacha cajta ricushpaca cashnami nirca: “Ñuca amolla, ñuca causaitapash peligropi* churashpami quiquin mandashcata rurarcani.
22 Ñuca amolla cunanga ñucata uyahuai por favor. Quiquin cutin shinlli tucushpa ñanda japishpa ri ushangapaca shuj pedazo tandaguta micupai” nircami.
23 Shinapash Saulca na munashpami “imatapash na micushachu” nirca. Shinapash paipa sirvientecuna y chai huarmipash cutin cutin micupai ninajujpimi paicunataca uyarca. Chaimi Saulca alpamanda jatarishpa camapi tiarirca.
24 Chai huarmica paipa huasipica shuj vira vira shicutami charirca. Chai shicutaca uchalla huañuchishpami* yanurca. Shinallata harina jacutapash masashpami levadura illa tandata rurarca.
25 Chai jipami Saulman y paipa sirvientecunamanbash micuchun cararca. Micushca jipami paicunaca tutapillata chaimanda rirca.
Notacuna
^ Hebreo shimipica “tucui punllacuna ñuca umapa guardia” nijunmi.
^ Glosariopi “Urim y Tumim” shimicunata ricupangui.
^ Caipica chai huarmi imata ricushcatami parlajun. Chai huarmitaca shuj demoniomi Samuel runashnalla ricurishpa pandachijurca.
^ Caipica shuj demoniomi Samuel runashnalla ricurishpa Saulhuan parlajun yarin.
^ Caipica shuj demoniomi Samuel runashnalla ricurishpa Saulhuan parlajun yarin.
^ Caipica paicunapash Samuel runashnallata huañunamandami parlajun.
^ Caipica shuj demoniomi Samuel runashnalla ricurishpa Saulhuan parlajun yarin.
^ O “sacrificashpa”.
