1 Samuel 3:1-21
-
Samuelca profeta cangapami agllai tucun (1-21)
3 Samuel huambraguca Elí runata ayudashpami Jehová Diosta sirvishpa catijurca. Chai punllacunapica Jehová Diosca paipa villaicunataca huaquingunamanllami villan carca. Shinallata Taita Dios muscuipishna ricuchishcacunapash na yapa tiarcachu.
2 Shuj tutaca Elí runaca paipa cuartopimi puñujurca. (Paica na ali ricui ushajurcachu).
3 Cutin Samuelca Jehová Diospa tabernáculo huasipimi* puñujurca. Chai huasipimi Taita Diospa Arcaca tiajurca. Shinallata Taita Diospa huasipi tiajushca lamparaca prindiriajurcarami.
4 Chaipimi Jehová Diosca Samuelta cayarca. Y Samuelca, “caipimi capani” nircami.
5 Chaimi Elipaman calpashpa cashna nirca: “Ñuca amolla ¿ñucata cayahuarcanguichu? Caipimi capani” nirca. Chaimi Elica cashna nirca: “Ñucaca na cayamurcanichu, puñungapaj tigrailla” nircami. Shina nijpimi Samuelca puñungapaj tigrarca.
6 Jehová Diosca cutinmi “Samuel” nishpa cayarca. Chaimi Samuelca jatarishpa, Elipaman rishpa cashna nirca: “Ñuca amolla ¿ñucata cayahuarcanguichu? Caipimi capani” nirca. Shinapash Elica cashnami nirca: “Ñuca huahualla, na cayarcanichu puñungapaj tigrailla” nircami.
7 (Samuelca Jehová Diostaca nara ali rijsishcarcachu. Shinallata Jehová Diosca paihuanga nara parlashcarcachu).
8 Jehová Diosca tercera vezta cayashpami “Samuel” nishpa cayarca. Chaimi Samuelca jatarishpa, Elipaman rishpa cashna nirca: “¿Ñucata cayahuarcanguichu? Caipimi capani” nirca.
Chaipimi Elí runaca Jehová Dios Samuelta cayajushcata cuenta japirca.
9 Chaimi Elí runaca Samueltaca cashna nirca: “Puñungapaj tigrailla. Cutin cayajta uyashpaca cashna ningui: ‘Jehová Dios ñucaca quiquinba sirvijmi capani. Ñucaca uyajupanimi parlapailla’ ningui” nircami. Chaimi Samuelca cutin puñungapaj tigrarca.
10 Chai jipami Jehová Diosca cutinllata “Samuel, Samuel” nishpa cayarca. Chaimi Samuelca “ñucaca canda sirvijmi capani. Ñucaca uyajupanimi parlapailla” nirca.
11 Jehová Diosca Samueltaca cashnami nirca: “Ricui, Israel llactapica imatacharimi ruragrini. Pipash chaita uyashpaca ninandami manllaringa.*
12 Chai punllaca Elí runamanda y paipa familiamanda* ñuca imata nishcataca tucui tucuitami pactachisha.
13 Elí ña yachashca pecadomanda para siempre paipa familiata ñuca juzgagrijujtami Elimanga villana cangui. Porque paipa churicunaca ñucata na respetashcatami ricuchinajun. Pero Elica paipa churicunataca na corregishcachu.
14 Chaimandami ima ofrendata cujpipash Elipa familiapa pecadota perdonangapaca na pactangachu nishpa Elipa familiamanga juramentushcani” nircami.
15 Chai jipami Samuelca pacaringacaman puñushpa quidarca. Pacarijhuanmi paica Jehová Diospa huasi punguta pascarca. Samuelca Taita Dios imata villashcata Eliman villanataca manllajurcami.
16 Shinapimi Elica Samueltaca “Samuel, ñuca huahualla” nishpa cayarca. Chaimi paica “caipimi capani” nirca.
17 Chaimi Elica cashna tapurca: “Taita Diosca ¿imatata nirca? Por favor tucuita villahuai. Taita Dios imata nishcata na tucuita villahuajpica Taita Diosllatami candaca castiganga” nircami.
18 Shina nijpimi Samuelca nimata na pacashpa tucuita Elimanga villarca. Chaita uyashpami Elica cashna nirca: “Jehová Diosmi chaitaca nishca. Shinaca paipa ricuipi ima ali cajta rurachunlla” nircami.
19 Samuelca viñashpami catijurca y Jehová Diosca paitaca bendiciashpami catijurca. Shinallata Taita Diosca paipa nishcacunataca tucuitami pactachijurca.
20 Dan llactamanda, Beer-Seba llactacaman causaj tucuilla israelitacunami Samuel Jehová Diospa agllashca profeta* cashcata cuenta japirca.
21 Siló llactapimi Jehová Diosca muscuipishna Samuelmanga ricurishpa catijurca. Porque Siló llactapimi Jehová Diosca paipa villaicunata Samuelmanga villarca. Shinami Jehová Diosca paipa voluntadta rijsichirca.
Notacuna
^ Hebreo shimipica “templo huasipimi” nijunmi. Glosariopi “tabernáculo huasi” shimita ricupangui.
^ Hebreo shimipica “paipa rinrica huacanga” nijunmi.
^ Hebreo shimipica “huasimanda” nijunmi.
