1 Samuel 31:1-13
-
Saulpash y paipa quimsa churicunapashmi huañun (1-13)
31 Filisteocunaca israelitacunahuanmi macanajunajurca. Chaimi israelitacunaca filisteocunamanda pacajushpa rinajurca. Shinapash tauca israelitacunami Guilboa urcupi huañurca.
2 Filisteocunaca Saultapash, paipa churicunatapashmi ninanda catirianajurca. Filisteocunaca Saulpa churicunatapashmi huañuchirca. Paicunaca Jonatán, Abinadab y Malki-Suami carca.
3 Filisteocunaca Saultaca ashtahuan atacashpami catinajurca. Flechacunata disparajcunaca Saulta tarishpami paitaca flechacunahuan ninanda chugrichirca.
4 Chaimi Saulca paipa ayudantetaca* cashna nirca: “Canba espadata llujchishpa huañuchihuai. Taita Diosta na sirvij* filisteo soldadocuna llaquinaita maltratashpa huañuchihuachunga na munanichu” nircami. Shinapash chai ayudanteca ninanda manllaimandami chaita rurangapaca na munarca. Chaimandami Saulca espadata japishpa paillata huañuchirirca.
5 Saulpa escudota y espadata apashpa ayudaj runaca, Saúl huañushcata ricushpaca paipashmi espadahuan huañuchirirca.
6 Shinami chai punllaca Saulpash, paipa quimsa churicunapash, Saulpa escudota y espadata apashpa ayudaj runapash huañurca. Shinallata Saulpa tucuilla sirvientecunapashmi huañurca.
7 Israelitacuna escaparishcata ricushpa, Saulpash y paipa churicunapash huañushcata ricushpaca Jezreel llactapa pambacunapi* y Jordán alpacunapi causashca israelitacunaca chaimanda llujshishpami escaparirca. Chai jipami filisteocuna shamushpa chai llactacunapi causai callarirca.
8 Cayandi punllapaca filisteocunaca huañushcacunapa valischa cosascunata japingapami rirca. Filisteocunaca Guilboa urcupi cashpaca Saulpa y paipa quimsa churicunapa huañushca cuerpocunatami tarirca.
9 Paicunaca Saulpa umata fitishpami paipa armadurata llujchirca. Chai jipami filisteocunaca paicuna ima rurashcata villachunga tucuilla filisteocunapa alpacunaman mensajerocunata cacharca. Paicunaca paicunapa santocunapa templocunapi y tucuilla gentecunamanbash villachunmi mensajerocunataca cacharca.
10 Filisteocunaca Saulpa armadurataca Astoret shuti yanga dioscunapa templopimi churarca. Shinallata Saulpa cuerpotaca Bet-San shuti llactapa pircacunapimi huarcushpa saquirca.
11 Jabés-Galaad llactamanda gentecunaca filisteocuna Saulhuan imata rurashcatami yachaj chayarca.
12 Chaimi tucuilla soldadocunaca tuta entero rishpa Bet-San llactaman chayarca. Chaipica Saulpa y paipa churicunapa cuerpocunata pircacunamanda anchuchishpami Jabés llactaman tigrarca. Chaipimi paicunapa cuerpocunataca rupachirca.
13 Chai jipaca paicunapa tullucunataca Jabés llactapi tiashca tamarisco shuti quiru* ucupimi pambarca. Shinallata paicunaca 7 punllacunatami imagutapash na micushpa ayunanajurca.*
Notacuna
^ Caipi ayudante nishpaca soldadocunata mandajpa espadata, lanzata, escudota y shuj cosascunata apashpa ayudaj runamandami parlajun. Chai ayudantepashmi soldadocunata mandajhuan igual macanajun carca.
^ Hebreo shimipica “circuncisionda na rurashca” nijunmi. Glosariopi “circuncisión” shimita ricupangui.
^ O “Valle de Jezreel”.
^ O “yura”.
