1 Samuel 4:1-22
4 Samuelca Taita Diospa nishcacunatami tucui israelitacunaman villashpa catijurca.
Chai punllacunapimi israelitacunaca filisteocunahuan macanajungapaj llujshirca. Israelitacunaca Ebenézer pushtu ladopimi carpacunata shayachirca. Cutin filisteocunaca Afec llactapimi carpacunataca shayachirca.
2 Filisteocunaca israelitacunahuan macanajungapami listo shayarirca. Chaipimi filisteocunaca israelitacunataca mishai callarirca. Chai macanajui pushtupica 4 mil israelita soldadocunatami filisteocunaca huañuchishpa saquirca.
3 Israelita soldadocuna carpacunaman tigrajpimi, israelitacunata ñaupaman pushaj jaricunaca* cashna nirca: “¿Imashpashi Jehová Diosca filisteocuna ñucanchita cunan punlla mishachun* saquirca? Ñucanchi contracunamanda salvachunga Jehová Diospa Arca del Pactota* Siló llactamanda llujchishpa apamushunchi” ninajurcami.
4 Chaimi paicunaca huaquin jaricunata Siló llactaman cacharca. Chai jaricunami Tucuilla Angelcunata Mandaj Jehová Diospa* Arca del Pactota apashpa rirca. Taita Diosmi querubín angelcunapa jahuapi* pai mandangapaj tiarina pushtupi tiarin. Chai jaricuna Taita Diospa* Arca del Pactota apashpa rinajujpica Elí runapa ishcandi churicuna, Hofní y Finehaspashmi cumbanajurca.
5 Israelitacuna shayachishca carpacunaman Jehová Diospa Arca del Pacto chayajhuanmi israelitacunaca alpa chujchujta ninanda caparinajurca.
6 Israelitacuna caparinajujta uyashpami filisteocunaca “¿imashpashi hebreocunapa* carpacuna shayachishca pushtupica shinapacha caparinajun?” ninajurcami. Jehová Diospa Arca israelitacunapa shayachishca carpacunapi cashcata yachaj chayashpaca,
7 filisteocunaca ninandami manllarinajurca. Paicunaca “Taita Diosmari carpacunata shayachishca pushtuman shamushca” ninajurcami. Shinallata paicunaca cashnami ninajurca: “¿Imashi tucushun? Shina pasajtaca nunca na ricushcanchichu.
8 ¿Imashi tucushun? ¿Ñucanchitaca pita cai poderoso Taita Diospa maquimandaca salvangayari? Paica Egipto llactamanda gentecunata desiertopi* tucui laya llaquicunahuan llaquichishpa huañuchishca Taita Diosmari can.
9 Cunanga filisteocuna, na manllashpa shinlli tucushpa macanajushunchi. Na cashpaca hebreocuna ñucanchita sirvishcashnallatami ñucanchipash paicunata sirvi callarinchiman. Shinaca na manllashpa macanajushunchi” ninajurcami.
10 Chai jipami filisteocunaca macanajui callarishpa israelitacunataca misharca. Chaimi israelitacunapash cada uno huasiman pacajushpa calparca. Chaipica ashtacacunami huañurca. 30 mil israelita soldadocunami huañurca.
11 Shinallata filisteocunaca Taita Diospa Arcata apashpami rirca. Y Elí runapa ishcai churicuna Hofní y Fineaspashmi huañurca.
12 Benjaminba jatun familiamanda shuj jarica, macanajui pushtumanda calpashpami Siló llactaman chai punllallata chayarca. Chai jarica ropapash liqui liqui, umapash alpallami chayarca.
13 Elí runa ñan ladolla asientopi tiajujpimi chai jarica chayarca. Elí runaca Taita Diospa* Arcamandami preocupadopacha shuyajurca. Chai jari llactaman chayashpa ima pasashcata villajpica tucui gentecunami llaquirishpa capari callarirca.
14 Shina caparinajujta uyashpami Elí runaca “¿imashpata chashnapacha caparinajunyari?” nishpa tapurca. Chaimi chai jarica Elí runaman ima pasashcata villangapaj calparca.
15 (Elí runaca 98 huatacunatami charirca. Paica nimata na ricui ushajurcachu).
16 Chai jarica Elí runataca cashnami nirca: “Macanajui pushtumandami ñucaca shamujuni. Cunanllatami chai pushtumanda escaparishpa shamujuni” nirca. Chaita uyashpami Elí runaca, “ñuca huahualla ¿imata pasashcayari?” nishpa tapurca.
17 Chai jarica cashnami nirca: “Filisteocuna mishashpa ashtacacunata huañuchijpimi israelitacunaca pacajungapaj calpashpa rirca. Quiquinba ishcai churicuna, Hofní y Fineaspashmi huañurca. Chai filisteocunaca Taita Diospa* Arcatami apashpa rirca” nircami.
18 Chai jari Taita Diospa* Arcamanda villajpimi Elí runaca pungu ladopi pai tiajushca asientomanda vichaisinga urmarca. Paica ña mayorlla y racu racu caimandami urmashpa cunga tullu faquirijpi huañurca. Paica 40 huatacunatami Israel llactapica juez* carca.
19 Elí runapa churi Finehaspa huarmica vijsayu ña ungunallami carca. Chai huarmica Taita Diospa* Arcata filisteocuna apashcata yachaj chayashpa y paipa suedro y paipa cusapash huañushcata yachaj chayashpami de repente unguna nanaicuna shamujpi cungurishpa huahuataca ungurca.
20 Chai huarmi ña huañunalla cajpimi paipa ladopi cashca huarmicunaca “ama manllaichu, shuj jari huahuagutami ungurcangui” ninajurcami. Pero chai huarmica nimata na nircachu.
21 Chai huarmica “Israel llactamandaca Taita Diospa brillajuj poderca anchurishcami” nishpami chai huahuataca Icabod* shutita churarca. Paica Taita Diospa* Arcata filisteocuna apashcamanda y paipa suedro y paipa cusapash huañushcamandami shina nirca.
22 Paica cashnami nirca: “Taita Diospa* Arcata apashcamandami Israel llactamandaca Taita Diospa brillajuj poderca anchurishcami” nircami.
Notacuna
^ Hebreo shimipica “imashpata Jehová Diosca ñucanchita mishashca” nijunmi.
^ Glosariopi “Arca del Pacto” shimita ricupangui.
^ Hebreo shimipica “Jehová de los Ejércitos” nijunmi.
^ O talvez “chaupipi”.
^ O “Dios verdadero”. Glosariopi “Dios verdadero” shimita ricupangui.
^ Israelitacunatami hebreocuna o hebreacuna nishpa rijsin carca. Glosariopi “hebreo” shimita ricupangui.
^ Caipica huaquin gentecunalla causaj, ima horapash na tarpushca chaquishca pambacunatami shina nijun.
^ O “Dios verdadero”. Glosariopi “Dios verdadero” shimita ricupangui.
^ O “Dios verdadero”. Glosariopi “Dios verdadero” shimita ricupangui.
^ O “Dios verdadero”. Glosariopi “Dios verdadero” shimita ricupangui.
^ O “Dios verdadero”. Glosariopi “Dios verdadero” shimita ricupangui.
^ Cai shutica “brillajuj poderca ¿maipitayari?” nijunmi.
^ O “Dios verdadero”. Glosariopi “Dios verdadero” shimita ricupangui.
^ O “Dios verdadero”. Glosariopi “Dios verdadero” shimita ricupangui.
