1 Samuel 5:1-12
5 Filisteocuna Taita Diospa* Arcata quichushpaca Ebenézer pushtumanda, Asdod llactacamanmi aparca.
2 Chai jipami filisteocunaca Taita Diospa* Arcataca Dagón yanga diospa templo huasiman apashpa, Dagón yanga diospa ladopi churarca.
3 Asdod llactamanda gentecuna cayandi punlla tutamandata jatarishpaca chai Dagón yanga dios uraisinga alpaman urmashcatami ricurca. Jehová Diospa Arca ñaupapimi urmashca sirijurca. Chaimi paicunaca chai diosta japishpa tiajushca pushtupillata cutin shayachirca.
4 Shinallata cayandi punlla tutamandata jatarishpaca paicunaca chai Dagón yanga dios cutin Jehová Diospa Arca ñaupapi uraisinga alpaman urmashcatami ricurca. Chai diospa umapash y ishcai maquicunapash templo huasi entradapimi faquirishca sirijushcarca. Solo pescado* formata charij partellami imapash na pasashcarca.
5 Chaimandami Asdod llactapica cunan punllacaman Dagón yanga diospa sacerdotecunapash y chai yanga diospa templo huasiman yaicuj gentecunapash pungu entradataca na sarushpa yaicun.
6 Jehová Diosca Asdod llactamanda gentecunatapash y chai llacta ladollapi causaj gentecunatapashmi castigarca. Paicunataca hemorroides unguihuanmi llaquichirca.
7 Asdod llactamanda gentecuna ima pasajushcata ricushpaca cashnami ninajurca: “Taita Diosca ñucanchita y ñucanchi Dagón diostapash ninandami llaquichishca. Chaimandami israelitacunapa Taita Diospa Arcaca na caipi quidanachu can” ninajurcami.
8 Chaimi filisteocunapa tucuilla gobernantecunata tandachishpa paicunataca “israelitacunapa Taita Diospa Arcahuanga ¿imatata rurashun?” nishpa tapunajurca. Paicunaca “israelitacunapa Taita Diospa Arcataca Gat llactamanmi apana canchi” ninajurcami. Chaimandami chai llactaman aparca.
9 Gat llactaman Arcata apashca jipaca Jehová Diosca chai llactata llaquichishpami ninanda manllachirca. Chai llactamanda tucuilla gentecunatami hemorroides unguihuan castigarca.
10 Chaimandami paicunaca Taita Diospa* Arcataca Ecrón llactaman aparca. Shinapash chai llactaman Arca chayajhuanmi ecronita gentecunaca cashna nishpa caparinajurca: “Ñucanchita y ñucanchi llactamanda gentecunata huañuchingapami israelitacunapa Taita Diospa Arcata apamushcanguichi” ninajurcami.
11 Chaimandami paicunaca filisteocunapa gobernantecunata tandachishpa cashna ninajurca: “Ñucanchicunapash y ñucanchi llactamanda gentecunapash ama huañuchun, israelitacunapa Taita Diospa Arcataca caimanda llujchishpa Israel llactaman tigrachichi” ninajurcami. Llactamanda tucuilla gentecuna huañunata ninanda manllaimandami shina ninajurca. Taita Diosca* ninandami paicunataca castigashcarca.
12 Causa quidashca gentecunaca hemorroides unguihuanmi castigai tucurca. Chaimandami chai llactamanda gentecunaca ayudahuai nishpa ninanda caparinajurca. Y paicunapa caparishcapash jahua cielocamanmi uyarirca.
Notacuna
^ O “Dios verdadero”. Glosariopi “Dios verdadero” shimita ricupangui.
^ O “Dios verdadero”. Glosariopi “Dios verdadero” shimita ricupangui.
^ Hebreo shimipica “Solo Dagón” nijunmi.
^ O “Dios verdadero”. Glosariopi “Dios verdadero” shimita ricupangui.
^ O “Dios verdadero”. Glosariopi “Dios verdadero” shimita ricupangui.
