1 Samuel 7:1-17
7 Quiryat-Jearim llactamanda jaricuna shamushpami Jehová Diospa Arcataca Abinadab runapa huasiman apashpa rirca. Abinadab runapa huasica jahua lomapimi carca. Chai jaricunaca Abinadab runapa churi Eleazartami Jehová Diospa Arcata cuidachunga nombrarca.
2 Quiryat-Jearim llactaman Arcata apashca punllamandaca 20 huatacunami yalishcarca. Chaipimi gulpi israelitacunaca Jehová Diosta mascai callarirca.*
3 Chaimi Samuelca israelitacunataca cashna nirca: “Canguna tucui shunguhuan Jehová Diosman tigrangapaj munashpaca, shuj llactacunamanda yanga dioscunata, Astoret shuti yanga dioscunata adoranata saquishpami shitana canguichi. Shinallata Jehová Diostaca tucui shungumi paitalla sirvina canguichi. Shinallami Taita Diosca cangunataca filisteocunapa maquimandaca salvanga” nircami.
4 Chaimi israelitacunaca Baal yanga dioscunata y Astoret shuti yanga dioscunata shitashpa adoranataca saquirca. Y Jehová Diostalla sirvi callarirca.
5 Chaimandami Samuelca paicunataca cashna nirca: “Gulpi israelitacunata Mizpá llactapi tandanajuchun cayaichi. Chaipimi ñucaca cangunamanda Jehová Diosta mañasha” nircami.
6 Chaimi gulpi israelitacunaca Mizpá llactapi tandanajurca. Paicunaca shuj pozomanda yacuta llujchishpami Jehová Diospa ñaupapi talirca.* Chai punllaca imagutapash na micushpami ayunanajurca.* Chaipimi israelitacunaca “Jehová Diospa contrami pecadota rurashcanchi” ninajurca. Samuelca Mizpá llactapimi israelitacunataca juez* shina sirvi callarirca.
7 Israelitacuna Mizpá llactapi tandanajushcata yachaj chayashpami filisteocunapa gobernantecunaca israelitacunata atacangapaj vichai rirca. Israelitacuna chaita yachaj chayashpaca ninandami manllarinajurca.
8 Chaimi israelitacunaca Samueltaca cashna ninajurca: “Ñucanchita ayudachun y filisteocunapa maquimandapash salvachunga, ñucanchi Jehová Diosta mañanataca ama saquipanguichu” ninajurcami.
9 Chaimi Samuelca Jehová Diosman shuj rupachina ofrendata* carangapaj shuj huahua llamaguta japirca. Shina rurashpami Samuelca israelitacunata ayudapangui nishpa Jehová Diostaca rogashpa mañarca. Chaimi Jehová Diosca Samuelpa mañaitaca uyarca.
10 Taita Diosman rupachina ofrendata Samuel cujujpimi filisteocunaca israelitacunahuan macanajungapaj chayanajurca. Chai punllami Jehová Diosca jahua cielota culunlla huacachishpa filisteocunataca ninanda manllachirca. Shinami israelitacunaca filisteocunata misharca.
11 Israelitacunaca Mizpá llactamanda llujshishpami filisteocunataca catiria rirca. Israelitacunaca Bet-Car pushtu sur ladocamanmi filisteocunataca huañuchishpa catirca.
12 Chai jipami Samuelca shuj jatun rumita japishpa Mizpá llacta y Jesaná shuti pushtu chaupipi churarca. Samuelca “Jehová Diosca cunangamanmi ayudajushca” nishpami chai rumitaca Ebenézer* shutita churarca.
13 Shinami filisteocunaca mishai tucurca. Filisteocunaca ñana israelitacunapa alpacunaman yaicushpa dueñoyai usharcachu. Samuelpa tucui causaipimi Jehová Diosca filisteocuna israelitacunata ama atacachun ricuriajurca.
14 Shinallata Ecrón llactamanda Gat llactacaman filisteocuna quichushca tucuilla llactacunata y alpacunatami israelitacunaca cutin japirca.
Shinallata israelitacunaca amorreo gentecunahuanga tranquilomi causanajurca.
15 Samuelca huañungacamanmi israelitacunapa juez carca.
16 Samuelca cada huatami israelitacuna charishca problemacunata arreglangapaj Betel, Guilgal y Mizpá llactacunaman rin carca.
17 Chai jipami Samuelca paipa huasiman tigran carca. Paipa huasica Ramá llactapimi carca. Chaipipashmi Samuelca israelitacuna charishca problemacunata arreglan carca. Ramá llactapimi Samuelca Jehová Diosman shuj altarta shayachirca.
Notacuna
^ O “Jehová Diospa ñaupapi llaquiri callarirca”.
^ O “regarca”.
^ O “ofrenda quemada”. Glosariopi “ofrenda quemada” shimita ricupangui.
^ Cai shutica “ayudangapaj rumi” nijunmi.
