1 Samuel 8:1-22
8 Samuelca ña mayorlla cashpami paipa churicunataca Israel llactapi juezcuna* cachun nombrarca.
2 Paipa punda churica Joel shutimi carca. Y paipa cati churica Abías shutimi carca. Paicunaca Beer-Seba llactapimi juezcuna carca.
3 Pero Samuelpa churicunaca paicunapa taitapa ejemplotaca na catircachu. Paicunaca charij tucungapalla munashpami gentecunapa imapash regalocunataca pacalla chasquin carca. Chaimi paicunaca shujcunapalla lado tucushpa yangata juzgan carca.
4 Tiempohuanga Israel llactata ñaupaman pushaj jaricunaca* tucuilla tandanajushpami Samuelta ricungapaj Ramá llactaman rirca.
5 Paicunaca Samueltaca cashnami nirca: “Quiquinga ñami mayor capangui y quiquinba churicunapash quiquinba ejemplotaca na catishcachu. Shinaca chaishuj llactacuna charishcashnallata ñucanchitapash gobernachun shuj reyta churapai” ninajurcami.
6 “Ñucanchita gobernachun shuj reyta churapai” nijta uyashpaca Samuelca ninandami culirarca.* Chaimi Samuelca Jehová Diosta mañarca.
7 Y Jehová Diosca Samueltaca cashnami nirca: “Israelitacuna tucui ima nishcata rurailla. Paicunaca candaca na rechazashcachu, ñucatami paicunapa rey cachun na munan.
8 Paicunaca Egipto llactamanda ñuca llujchishca punllamandapachami cunangaman lo mismota ruranajushca. Paicunaca yanga dioscunatara adorashpami ñucataca siempre saquihuanajushca. Y cunanga candapashmi chashnallata ruranajun.
9 Paicuna nishcashna rurailla. Pero chaita rurashcamanda ima pasanatami advirtina cangui. Paicunata gobernagrijuj rey imata mañana derechota charishcatapashmi villana cangui” nircami.
10 Chai jipami Samuelca reyta mañanajuj gentecunahuan parlashpa, paicunamanga Jehová Dios tucui ima nishcata villarca.
11 Samuelca paicunataca cashnami nirca: “Cangunata gobernagrijuj reyca caita rurana derechotami charinga: Cangunapa churicunata apashpami guerrapa carretacunapi churanga, shinallata caballocunapi tiarishpa purij soldadocuna cachunmi churanga. Y huaquingunaca reypa carretacunata ñaupashpami calpanajunga.
12 Huaquingunataca mil soldadocunata mandachun y shujcunataca 50 soldadocunata mandachunmi churanga. Cutin shujcunataca reypa alpacunapi yapuchun y cosechachunmi churanga. Shinallata shujcunataca guerrapa espadacunata, arcocunata, flechacunata, lanzacunata y paipa carretacunata rurachunmi churanga.
13 Cangunapa ushicunataca perfumecunata rurachun, yanuchun y tandacunata rurachunmi apanga.
14 Chai reyca cangunapa ashtahuan ali alpacunata, uvas y olivos pambacunata japishpami paipa sirvientecunaman cunga.
15 Chai reyca cangunapa alpacunapi fucushca granocunamanda y uvascunamandaca diezmota* japishpami reypa huasipi trabajaj funcionariocunaman y paipa sirvientecunaman cunga.
16 Shinallata cangunapa sirvientecunata, cangunapa mejor huagracunata, burrocunatapash apashpami reyca paipa trabajachinga.
17 Cangunapa llamacunamanda, chivocunamandaca diezmotami japinga. Shinallata cangunapash paipa sirvientecunami tucunguichi.
18 Pero shuj punllaca canguna agllashca rey llaquichijpimi cangunaca llaquiringuichi. Y Jehová Diosta ayudahuai nishpa mañajpica paica na uyangachu” nircami.
19 Shinapash israelitacunaca na cazushpami Samueltaca cashna ninajurca: “Na importanllu. Ñucanchicunaca shuj reytami charingapaj munanchi.
20 Shinami ñucanchica chaishuj llactacunashna cashun. Ñucanchi reymi ñucanchitaca gobernanga, diriginga y ñucanchi contracunahuan macanajunga” ninajurcami.
21 Israelitacuna nishcata uyashca jipami Samuelca tucuita Jehová Diosmanga villarca.
22 Chaimi Jehová Diosca Samueltaca cashna nirca: “Paicunata uyailla y paicunata gobernachun shuj reyta churailla” nircami. Chaimi Samuelca israelitacunataca “cada uno cangunapa llactaman tigraichilla” nirca.
Notacuna
^ Hebreo shimipica “Samuelpa ricuipica nali carca” nijunmi.
