1 Timoteo 2:1-15
2 Chaimandami primeroca Taita Diosta rogachun, oracionda rurachun, tucui clase o tucui laya gentecunapa favor mañachun y agradicishpa mañachun tucuicunata nipani.
2 Shinallata reycunamanda, tucui gobiernocunamanda mañachunmi nipani. Shinami tranquilo causashun, Taita Diosta tucui shunguhuan sirvishun y tucuita uchalla rurai ushashun.
3 Shina mañanami, ñucanchita Salvaj Taita Diospa ñaupapica, ali can y paica alicachishpa o cushijushpami ricun.
4 Porque Taita Diosca tucui clase o tucui laya gentecuna salvarichun y paipa cabal yachachishcacunata aligutapacha yachajuchunmi munan. Chaimi Taita Diospa voluntad can.
5 Taita Diosca shujlla Taita Diosmi can. Shinallata, Taita Dioshuan y gentecunahuan rurashca tratopi* ayudadorpash shujllami can. Y chai ayudadorca Cristo Jesusmi can.
6 Paimi tucui gentecunata paicunapa pecadocunamanda salvangapaca, minishtirishca preciota paganshna paipa causaita curca. Chaitaca villana tiempopimi gentecunaca villanga.
7 Chaimandami Taita Diosca predicachunbash y apóstol cachunbash ñucataca agllahuarca. Na judío gentecunaman Taita Diospi crinata y cabal yachachishcacunata yachachichunmi shina agllahuarca. Ñucaca ciertotami nijupani, na llullajupanichu.
8 Shinaca, tucui ladocunapi gentecuna Taita Diosta mañashpa catichunmi munapani. Y Taita Diosta mañajushpaca, limpio shunguhuan maquita cieloman vichai churashpa, na culirashpa, imatapash na nirinajushpa mañachunmi munapani.
9 Shinallata huarmigucunapash juyaillagu ricuringapaca, ajchata yapata arreglarinapi, orota o perlas rumicunata* utilizanapi, valishca ropacunata churajunapipash na yapata preocuparijunachu can. Chaipa randica, aliguta mudarishpami, ima ropaguta* churajushpapash na pinganaita churajushpa y aliguta pensarishpa mudarina can.
10 Juyailla ricuringapaca, huarmigucunaca Taita Diosta catij huarmigucuna caimandami, ali ruraicunata rurana can.
11 Huarmigucunaca sujetarishpa upallami* yachajuna* can.
12 Huarmicuna yachachichun, jaricunata mandachunbash na munapanichu. Chaipa randica upallami cana can.
13 Porque Taita Diosca Adandami primeroca rurarca. Y chai jipami Evataca rurarca.
14 Ashtahuanbash, Adanga na umachi tucurcachu. Sino huarmimi umachitapacha umachi tucurca. Shinami paica pecador tucurca.
15 Ashtahuangarin, huarmicunapaca huahuagucunata charinaca alimi can. Porque shinami nali ruraicunataca na ruranga. Pero Taita Diospi confiashpa, paipa ñaupapi limpio ricurishpa, juyashpa y aliguta pensarishpami paicunaca catina can.
Notacuna
^ Perlas rumiguca marpi tiaj huaquin conchacunapa ucupimi viñan. Cai perlas rumiguca valishcapachami can.
^ O “llachapaguta”.
^ O “tranquila, calmarishpami”.
^ Caipica “congregacionbi yachajunatami” shina nijun.
