Génesis 33:1-20
33 Jacobca 400 jaricunahuan Esaú shamujujtami ricurca. Chaita ricushpami huahuacunataca Leaman, Raquelman y paicunapa ishcandi sirvientacunaman separashpa curca.
2 Sirvienta huarmicunataca paicunapa huahuacunandimi primer grupopi churarca. Leataca paipa huahuacunandimi segundo grupopi churarca. Cutin Raqueltaca Josendimi último grupopi churarca.
3 Jacobca tucuicunata ñaupashpami rirca. Ña paipa huauquipaman quimirijushpaca, 7 viajeta alpacaman cumurishpami* chayagrirca.
4 Cutin Esauca paita tuparingapami calpashpa rirca. Jacobtaca ugllarishpami ñavipi mucharca, ishcandicunami huacai callarirca.
5 Esauca huarmicunata y huahuacunata ricushpami tapurca: “Canhuan shamunajushca huarmicuna y huahuacunaca ¿picunata can?”. Shina tapujpimi Jacobca nirca: “Ñuca amolla, Taita Diosca cai huahuacunata carashpami bendiciahuashca”.
6 Chai ratomi sirvienta huarmigucunapash paicunapa huahuacunandi quimirishpa Esaupa ñaupapi alpacaman cumurirca.
7 Shinallata Lea y paipa huahuacunapashmi Esaupaman quimirishpa alpacaman cumurirca. Por ultimoca José y Raquelpashmi Esaupaman quimirishpa alpacaman cumurirca.
8 Esauca Jacobtaca tapurcami: “¿Imashpata ashtaca gentecunata y animalcunata cachamuhuarcangui?”. Shina nijpimi Jacobca nirca: “Ñuca amolla, canba ñaupapi ali ricuringapami shina cachamujuparcani”.
9 Chaimi Esauca nirca: “Ñuca huauquilla, ñucaca ñami ashtacatapacha charipani. Caicunaca canbami can, canllata japipailla”.
10 Pero Jacobca nircami: “Ama shina nihuaichu. Si quiquinba ñaupapi ali ricurinica, rogaitami rogapani carangapaj ñuca apamushcacunata chasquipai. Porque canba ñavita ricungapami caicunataca apamupashcani. Canga alimanmi ñucataca chasquihuashcangui. Canba ñavita ricushpaca Taita Diospa ñavita ricunshnami cashcani.
11 Ama shinagu cashpa, carangapaj ñuca apamushcacunata chasquipai. Taita Diosca ninandami bendiciahuashca y tucui imata minishtishcatami charipani”. Carangapaj apashcacunata Esaú chasquingacamanmi Jacobca cutin cutin rogajurcalla.
12 Jipamanga Esauca nircami: “Jacuchi, ñucaca cangunata cumbashpa rishallami”.
13 Pero Jacobca nircami: “Ñuca amolla, uchilla huahuacunata ñuca charishcataca alimi yachapangui. Llamacunata y vacacunatapash paicunapa criacunandimi charipani. Si shuj punllapilla ushashcata* apurachishpa apajpica, tucuilla animalcunami huañupanga.
14 Pero por favor ñuca amolla, ñucata ñaupashpa ripailla. Ñuca amolla, urcucunalla tiaj Seír pushtupi quiquinhuan tuparingacamanmi ñucaca huagracunapa y huahuacunapa pasopi alimanda rigripani”.
15 Chaimi Esauca nirca: “Por lo menos huaquin gentecunatallapash saquingapami munapani”. Pero Jacobca nircami: “Ñuca amolla, ama preocuparipaichu. Quiquinba ñaupapi ali ricurishpallata ñucapaca suficientemi capan”.
16 Chai punllaca Seír pushtumanmi Esauca tigrarca.
17 Cutin Jacobca Sucot pushtumanmi rirca. Chaipimi Jacobca paipaca shuj huasita rurarca y animalcunapaca chugllacunata shayachirca. Chaimandami chai pushtutaca Sucot* shutita churarca.
18 Jacobca Padán-Aram pushtumandami Siquem llactaman sano y salvo chayagrirca. Chai llactaca Canaán alpacunapimi can. Paipa carpacunataca Siquem llacta ladollapimi shayachirca.
19 Chai jipaca paipa carpacunata shayachishca shuj pushtumandami 100 piezas de platata* pagarca. Chai pushtutaca Hamor shuti runapa churicunatami Jacobca randirca. Hamor runaguca Siquem runagupa taitami carca.
20 Chaipimi Jacobca shuj altarta shayachirca. Y chai altartaca, Taita Diosca Israelpa Taita Diosmi can nishpami shutichirca.
Notacuna
^ Respetashcata ricuchingapami shina ruran carca.
^ O “pudishcata”.
^ Cai shutica “chugllacuna” o “pacajuna huasicuna” nijunmi.
^ Hebreo shimipica “qesi·táh” nijunmi. Caica punda tiempo culquimi carca. Ima materialhuan rurashcata, mashna valorta charishcatapash na yacharinllu.
