Jonás 2:1-10
2 Chai jatun pescadopa vijsa ucupi cashpami, Jonasca paipa Taita Dios Jehovataca cashna nishpa mañarca:
2 “Ninandapacha llaquirishpami quiquin Jehová Diostaca mañarcani. Canmi ñucataca uyahuarcangui.
Ñapacha huañugrijushpami* ñucaca ayudahuai nishpa ninanda caparijurcani.
Y canmi ñucataca uyahuarcangui.
3 Quiquinmi mar yacu ucu ucucaman shitahuarcangui.
Mar yacupi olascunaca caiman chaimanmi ñucataca apahuarca.
Can cachamushca jatun jatun olascunami ñuca jahuata yalirca.
4 Chaipimi ñucaca pensarircani: ‘Quiquinba ñaupamandaca caruyashcanimari. ¿Imashinata quiquinba templo huasitaca cutin ricuita ushashayari?’.
5 Ashtahuan ashtahuan pambarishpami, ñapacha huañugrijurcani.
Mar yacu ucu ucupipachami carcani.
Algas jihuacunapash ñuca umapica ninandami pillurihuarca.
6 Mar yacu ucu ucucamanmi* pambarijurcani.
Cai alpapash shuj punguta vichanshnami* ñucataca para siempre vichagrihuajurca.
Pero Jehová, ñuca Taita Dioslla, quiquinmi ucu ucu pushtumanda llujchimuhuarcangui.*
7 Ña huañugrijushpaca, quiquin Jehová Diostami ñucaca yariparcani.*
Shina yarijpimi ñuca oraciondaca quiquinba templo huasimanda uyaparcangui.
8 Imapapash na sirvij santocunata adorajcunaca paicunata juyaj* Taita Diostaca cunganllami.
9 Pero ñucaca quiquinda ninanda agradicimandami quiquinmanga sacrificiocunata carapasha.
Quiquinman imata prometishcataca cumplishami.
Jehová Dios, quiquinllami ñucataca salvaita ushahuangui”.
10 Chai jipami chai jatun jatun pescadoca Jehová Dios mandajpi Jonastaca mar yacu manñapi lansarca.
Notacuna
^ Hebreo shimipica “urcucunacamanmi” nijunmi.
^ O “vichicanshnami”.
^ Hebreo shimipica “canmi ñuca causaitaca utujumanda llujchimuhuarcangui” nijunmi.
^ O “yuyariparcani”.
