Jonás 3:1-10
3 Jehová Diosca por segunda vezmi Jonastaca cashna nirca:
2 “Nínive jatun llactaman rishpa ñuca imata nishcata villagri”.
3 Shina nijpimi Jonasca Jehová Dios imata mandashcata cazushpa, Nínive llactaman ri callarirca. Nínive llactaca jatun jatun llactami* carca. Chai llactata chaquilla muyungapaca quimsa punllatami paran carca.
4 Jonasca chai llactaman yaicushpami shuj punllata purishca jipaca, cashna nishpa villachijurca: “40 punllacunapimi Nínive llactaca ña tucuchi tucugrijun”.
5 Shina nijpimi Nínive llactamanda gentecunaca Taita Dios imata nishcata crishpa ayunanajurca.* Mayorcunamanda callarishpa uchilla huahuacunacaman, charijcunapash y pobrecunapashmi tieso tieso telacunata* churajurca.
6 Chaita yachaj chayashpami, Nínive llactamanda reyca pai tiajushca tronomanda jatarishpa pai jahualla churajushca juyailla ropata* llujchirirca. Tieso tieso telata churajushpami, uchufa jahuapi tiarirca.
7 Ashtahuangarin reyca tucuilla Nínive llactapimi cashna nishpa villachun mandarca:“Reypash y paipa funcionariocunapash cashna nishpami mandan, ni shuj gentepash, ni animalcunapash nimata na micunachu can. Nima nimata na micunachu can. Ni yacutapash na ufianachu can.
8 Shinallata gentecunapash y animalcunapash tieso tieso telata churajuchun. Taita Diostapash ninanda rogachun. Paicunapa nali ñandapash saquichun y nalita ruranatapash saquichun.
9 Shina rurajpica talvez Taita Diosca ñanachari ñucanchitaca llaquichinga. Pai ninanda culirashca cashpapash calmaringapashchari. Huañuimandapash talvez salvarita ushashunbashchari”.
10 Taita Diosca paicuna imata rurashcata y nali ñanda saquishcatapashmi ricurca. Chaimi Taita Diosca paicunata llaquichishami nishca cashpapash, pai imata pensashcataca cambiarca. Y ñana paicunataca llaquichircachu.
Notacuna
^ Hebreo shimipica “Taita Diospa ñaupapica shuj jatun llactami” nijunmi.
^ Glosariopi “tieso tieso tela” shimita ricupangui.
^ O “llachapata”. O “reycuna churajuna ropata”.
