Josué 10:1-43
10 Jerusalén llactata mandaj Adoni-Zédec shuti reyca, Josué Hai llactata mishashpa tucuchishcatami uyarca. Josueca Hai llactata y chai llactapa reytapash Jericó llactatashna y chai llactapa reytashnami rurashcarca. Shinallata Gabaón llactamanda gentecunaca, israelitacunahuan ama macanajungapaj shuj tratota* rurashpa, israelitacunahuan causanajushcatami uyarca.
2 Chaimi chai reyca ninanda preocuparirca. Porque Gabaón llactaca reycunapa llactacunashna jatun jatun llactami carca. Chai llactaca Hai llactatapash yali jatunbachami carca. Y chai llactamanda jaricunapash alipacha shinlli soldadocunami carca.
3 Chaimandami Jerusalén llactamanda Adoni-Zédec shuti reyca, Hebrón llactamanda Hoham shuti reyman, Jarmut llactamanda Piram shuti reyman, shinallata Lakís llactamanda Jafía shuti reyman y Eglón llactamanda Debir shuti reyman cashna nichun cacharca:
4 “Gabaón llactata atacangapaj shamushpa ayudahuaichi. Porque paicunaca Josuehuan y tucuilla israelitacunahuan ama macanajungapami de acuerdo quidashca” nircami.
5 Chaita uyashpami Jerusalén, Hebrón, Jarmut, Lakís y Eglón llactacunamanda amorreo gentecunapa 5 reycunaca paicunapa soldadocunandi tandanajurca. Shina tandanajushpami paicunaca Gabaón llactapa contra macanajungapaj ri callarirca.
6 Gabaón llactamanda gentecunaca Guilgal pushtupi shayachishca carpacunaman rishpa Josueta cashna nichunmi cacharca: “Quiquinba esclavo ñucanchicunataca ama jichushpa saquipanguichu.* Ñucanchita salvangapaj y ayudangapaj ucha shamupai. Urcumanda tucuilla amorreo gentecunapa reycunami ñucanchipa contra shayarishca” nircami.
7 Chaimi Josueca paipa tucuilla alipacha shinlli soldadocunandi Guilgal pushtumanda vichai rirca.
8 Jehová Diosca Josuetaca cashnami nirca: “Paicunataca ama manllaichu. Porque paicunataca canba maquipimi churashcani. Paicunamandaca maijanbash candaca na mishaita ushangachu” nircami.
9 Guilgal pushtumanda tuta entero rishpami Josueca paicunataca cungashcapi atacarca.
10 Jehová Diosca israelitacuna ricujtami amorreo gentecunataca pandachirca. Chaipimi israelitacunaca ashtaca ashtaca amorreo gentecunata Gabaón llactapi huañuchirca. Israelitacunaca amorreo gentecunataca Bet-Horón pushtuman vichai rina ñanda catishpami Azecá y Maquedá pushtucaman huañuchishpa catinajurca.
11 Amorreo gentecunaca israelitacunamanda escaparishpami Bet-Horón llactata urai rina ñanda calpanajurca. Chaipimi Azecá pushtucaman jahua cielomanda jatun rumishna runducunata Jehová Dios shitamujpi paicunaca huañurca. Ashtahuangarin amorreo gentecunaca israelitacuna espadahuan huañuchishcatapash yalimi rundu urmamujpi huañurca.
12 Jehová Dios amorreo gentecunata israelitacuna ricujta mishashca punllapimi, Josueca Jehová Diosta mañashpa israelitacunapa ñaupapi cashna nirca:
“Indi, Gabaón llacta rectopi shayarishpa quidai.Lunapash Ayalón pambacuna* rectopi shayarishpa quidai” nircami.
13 Chaimi israelitacuna paicunapa contracunata mishangacaman indipash shayarishca quidarca y lunapash ni maiman na cuyurircachu. ¿Nachu chaica Jasar shuti libropipash escribishca can? Indica cielo chaupipimi shayarishca quidarca. Más o menos punlla enterotami indica na huashajurca.
14 Chai punllapishnaca nunca na Jehová Diosca shuj runapa mañashcataca shinapachaca uyashcarcachu. Ni pundapash, ni jipapash na shina punllaca tiashcachu. Porque Jehová Diosmi israelitacunamandaca macanajujurca.
15 Chai jipami Josueca tucuilla israelita soldadocunandi Guilgal pushtupi shayachishca carpacunaman tigrarca.
16 Chaicamanga chai 5 reycunaca escaparishpami Maquedá cuevapi pacajushca carca.
17 Josuemanga “chai 5 reycunataca Maquedá cuevapi pacajushcatami tarircanchi” nishpami villarca.
18 Chaimi Josueca cashna nirca: “Chai cueva entradapica jatun rumicunata churaichi. Shinallata chai cuevata vigilachunga jaricunata churaichi.
19 Pero cangunamanda restoca contracunata catishpa huañuchigrichi. Paicunapa llactacunaman yaicuchunga ama saquinguichichu. Porque Jehová Diosca paicunataca cangunapa maquipimi churashca” nircami.
20 Josueca, israelitacunahuan ashtaca ashtaca amorreo gentecunata huañuchishpami misharca. Pero huaquingunaca escaparishpami jatun pircacunahuan muyundi pircashca llactacunapi pacajungapaj rirca.
21 Chai jipaca macanajungapaj rishca israelitacunaca na imapash tucushpallatami Josué tiajushca Maquedá pushtupi shayachishca carpacunaman gulpi tigramurca. Israelitacunapa contraca nipi na imatapash nitaca* usharcachu.
22 Chai jipaca Josueca “chai cuevapa entradata pascashpa, chai 5 reycunata caiman apamuichi” nircami.
23 Chaimi chai 5 reycunata llujchishpa Josuepaman aparca. Chai reycunaca Jerusalén, Hebrón, Jarmut, Lakís y Eglón llactacunamandami carca.
24 Chai 5 reycunata apamujpimi Josueca tucuilla israelita jaricunata cayachun cacharca. Y paihuan rishca soldadocunapa comandantecunataca cashnami nirca: “Caiman quimirimuichi. Chai reycunataca cunga huashapi saruichi” nircami. Chaimi paicunaca quimirimushpa chai reycunataca cunga huashapi sarurca.
25 Chaipimi Josueca paicunataca cashna nirca: “Cangunaca na manllanachu canguichi. Ashtahuangarin shinlli tucushpa, na manllanachu canguichi. Porque cangunahuan macanajuj tucuilla contracunataca Jehová Diosca shinallatami ruranga” nircami.
26 Josueca chai 5 reycunata huañuchishpami, cada unota shuj jatun racu caspipi* chishiyangacaman huarcushpa saquirca.
27 Ña indi huashajujpimi Josueca chai reycunapa cuerpotaca chai jatun racu caspimanda* uriajuchishpa paicuna pacajushca cuevapillata shitachun mandarca. Chai cuevapa entradatapash jatun rumicunahuan tapachunmi mandarca. Y chai rumicunaca cunan punllacamanmi chai pushtupillata tianajun.
28 Chai punllami Josueca Maquedá llactata mishashpa espadahuan tucuillata tucuchirca. Maquedá llactapa reyta y chai llactamanda gulpi gentecunatami* huañuchishpa* saquirca. Maquedá llactamanda reytaca Jericó llactapa reytashnallatami huañuchirca.
29 Chai jipaca Josueca Maquedá llactamandami, tucuilla israelita soldadocunandi Libná llactahuan macanajungapaj rirca.
30 Jehová Diosca Libná llactata y chai llactapa reytapash israelitacunapa maquipimi churarca. Chai llactapi gulpi gentecunatapash* espadahuanmi huañuchishpa saquirca. Ni shujllapash na causaca quidarcachu. Chai llactamanda reytapash Jericó llactapa reytashnallatami huañuchirca.
31 Chai jipaca enseguidami Josueca Libná llactamanda tucuilla israelita soldadocunandi Lakís llactaman rirca. Chaipimi paicunaca carpacunata shayachirca y paicunahuan macanajurca.
32 Jehová Diosca, Lakís llactatapashmi israelitacunapa maquipi churarca. Y chai llactataca ishcai punllapimi misharca. Chai llactatapash y chai llactamanda gulpi gentecunatapash* espadahuanmi tucuchirca. Chai llactataca Libná llactata tucuchishcashnallatami tucuchirca.
33 Chaimi Guézer llactamanda Horam shuti reyca, Lakís llactata ayudangapaj vichai rirca. Pero Josueca chai reytapash y paipa soldadocunatapash tucuillatami tucuchishpa saquirca. Ni shujllapash na causaca quidarcachu.
34 Chai jipami Josueca gulpi israelita soldadocunandi Lakís llactamanda, Eglón llactaman rirca. Chaipimi paicunaca carpacunata shayachirca y paicunahuan macanajurca.
35 Chai punllallatami chai llactata mishashpa espadahuan tucuchishpa saquirca. Chai punllaca Lakís llactapi rurashcashnallatami, chai llactamanda gulpi gentecunata* huañuchishpa saquirca.
36 Chai jipaca Josueca gulpi israelita soldadocunandimi Eglón llactamanda Hebrón llactaman rishpa paicunahuan macanajurca.
37 Chai llactata mishashpami chai llactapa reytapash, chai llactapi tiashca pueblocunatapash y chai llactamanda tucuilla gentecunatapash* espadahuan tucuchishpa saquirca. Ni shujllapash na causaca quidarcachu. Eglón llactata rurashcashnallatami cai llactatapash tucuilla gentecunandi* tucuillata tucuchishpa saquirca.
38 Ultimopica Josueca gulpi israelita soldadocunandi tigrashpami Debir llactahuan macanajungapaj rirca.
39 Chai llactata, chai llactapa reytapash y chai llactapi tiashca tucuilla pueblocunatapashmi misharca. Chai llactamanda gentecunatapash* tucuillatami espadahuan huañuchishpa* saquirca. Ni shujllapash na causaca quidarcachu. Debir llactataca Hebrón llactata, Libná llactata y Libná llactapa reyta tucuchishcashnallatami tucuchishpa saquirca.
40 Josueca urcucunamanda tucuilla alpacunatami misharca. Négueb y Sefelá pushtucunata, laderacunata y chaimanda tucuilla reycunatapashmi mishashpa saquirca. Ni shujllapash na causaca quidarcachu. Israel llactapa Jehová Dios mandashcashnami tucuilla gentecunata huañuchishpa* saquirca.
41 Josueca Cadés-Barnea llactamanda, Gaza llactacamanmi misharca. Y Gosén tucuilla alpacunatapashmi misharca. Paica Gabaón alpacunacamanmi misharca.
42 Josueca tucuilla reycunata mishashpami, paicunapa alpacunata japirca. Chai llactacunataca shuj viajepillami tucuchirca. Porque Israel llactapa Jehová Diosmi Israel llactamanda macanajujurca.
43 Chai jipami Josueca tucuilla israelita soldadocunandi Guilgal pushtupi shayachishca carpacunaman tigramurca.
Notacuna
^ O “pactota”.
^ Hebreo shimipica “canba maqui urmachunga ama saquinguichu” nijunmi.
^ O “Valle de Ayalón”.
^ Hebreo shimipica “paipa jalluta afilaitaca” nijunmi.
^ O “quirucunamanda”. Glosariopi “jatun racu caspi” shimita ricupangui.
^ Glosariopi “jatun racu caspi” shimita ricupangui.
^ O “tucuchitapacha tucuchishpa”.
^ O “tucuchitapacha tucuchishpa”.
^ O “tucuchitapacha tucuchishpa”.
